വാഷിങ്ടണ്: സിറിയയിലെ ഇസ്ലാമിക് സ്റ്റേറ്റ് ഭീകരരുടെ താവളങ്ങള്ക്ക് നേരെ അമേരിക്ക വന്തോതിലുള്ള വ്യോമാക്രമണം നടത്തി. ‘ഓപ്പറേഷന് ഹോക്കൈ സ്ട്രൈക്ക്’ എന്ന് പേരിട്ടിരിക്കുന്ന ഈ സൈനിക നടപടിയിലൂടെ ഐഎസിന്റെ എഴുപതോളം കേന്ദ്രങ്ങളാണ് തകര്ത്തത്. ഡിസംബര് 13-ന് സിറിയയിലെ പാല്മിറയില് ഐഎസ് ഭീകരന് നടത്തിയ ആക്രമണത്തില് രണ്ട് യുഎസ് സൈനികരും ഒരു അമേരിക്കന് പൗരനും കൊല്ലപ്പെട്ടതിന് പകരമായാണ് ഈ നീക്കം.
മധ്യ സിറിയയിലെ ഭീകരരുടെ പരിശീലന കേന്ദ്രങ്ങള്, ആയുധപ്പുരകള്, ഒളിത്താവളങ്ങള് എന്നിവയുള്പ്പെടെ 70-ലധികം ലക്ഷ്യങ്ങള് തകര്ത്തു. നൂറിലധികം കൃത്യതയാര്ന്ന മിസൈലുകളും ബോംബുകളുമാണ് ആക്രമണത്തിനായി ഉപയോഗിച്ചത്. യുഎസ് വ്യോമസേനയുടെ എഫ്-15 ഇ സ്ട്രൈക്ക് ഈഗിള്സ്, എ-10 തണ്ടര്ബോള്ട്ട് വിമാനങ്ങള്, അപ്പാച്ചെ ഹെലികോപ്റ്ററുകള്, ഹിമാര്സ് റോക്കറ്റ് ലോഞ്ചറുകള് എന്നിവ ആക്രമണത്തില് പങ്കെടുത്തു. ജോര്ദാന് വ്യോമസേനയുടെ യുദ്ധവിമാനങ്ങളും ഈ നീക്കത്തിന് പിന്തുണ നല്കി.
