ജീവിതത്തിന്റെ 95 ശതമാനവും ജനങ്ങൾക്കൊപ്പം ചെലവഴിച്ച നേതാവാണ് ഉമ്മൻ ചാണ്ടിയെന്ന് നടൻ ജഗദീഷ്. ഒരു രാഷ്ട്രീയ നേതാവ് എങ്ങനെയായിരിക്കണം എന്നുള്ളതിന്റെ ഏറ്റവും നല്ല ഉദാഹരണമായി കണക്കാക്കിയിട്ടുള്ളത് ഉമ്മൻ ചാണ്ടിയെയാണ് എന്നും ജഗദീഷ് പറഞ്ഞു. റോൾ മോഡലായാണ് അദ്ദേഹത്തെ കണ്ടിട്ടുള്ളത്. ഇന്ത്യയിലെ തന്നെ മികച്ച രാഷ്ട്രീയ നേതാവ് എന്ന് പറയുമ്പോൾ ഏറ്റവും തലയെടുപ്പുള്ള ഒരു പത്ത് നേതാക്കളിൽ ഉമ്മൻ ചാണ്ടി ഉണ്ടാകും. തിരുവനന്തപുരത്തെ ഉമ്മൻ ചാണ്ടിയുടെ പുതുപ്പള്ളി ഹൗസിൽ റിപ്പോർട്ടർ ടിവി ഡിജിറ്റൽ ഹെഡ് ഉണ്ണി ബാലകൃഷ്ണനോട് പ്രതികരിക്കുകയായിരുന്നു നടൻ.
ജഗദീഷിന്റെ വാക്കുകൾ
രാഷ്ട്രീയത്തിനപ്പുറമുള്ള ബന്ധമാണ് ഉമ്മൻ ചാണ്ടി സാറുമായുള്ളത്. വർഷങ്ങൾക്ക് മുൻപ് അദ്ദേഹത്തിന്റെ പത്നി മറിയാമ്മയ്ക്കൊപ്പം കാനറാ ബാങ്കിൽ ഞാൻ സേവനമനുഷ്‌ടിച്ചിട്ടുണ്ട്. അന്നത്തെ ബാങ്ക് എംപ്ലോയീസ് അസോസിയേഷനിലെ അംഗങ്ങളായിരുന്നു ഞങ്ങൾ. അന്നു തുടങ്ങിയ ബന്ധമാണ്. ഒരു രാഷ്ട്രീയ നേതാവ് എങ്ങനെയായിരിക്കണം എന്നുള്ളതിന്റെ ഏറ്റവും നല്ല ഉദാഹരണമായി ഞാൻ കണക്കാക്കിയിട്ടുള്ളത്, റോൾ മോഡലായി ഞാൻ കണ്ടിട്ടുള്ളത് അദ്ദേഹത്തെയാണ്.
സ്നേഹം, കാരുണ്യം, ത്യാഗം സൗഹാർദം, പ്രവർത്തകരുമായുള്ള ആത്മബന്ധം, ജനങ്ങളുമായുള്ള ബന്ധം ഇക്കാര്യങ്ങളിൽ ഒരു നേതാവെന്ന നിലയിൽ അങ്ങേയറ്റമാണ് അദ്ദേഹം. ജീവിതത്തിന്റെ 95 ശതമാനം ജനങ്ങളോടൊപ്പമാണ്.
