ടെല്‍ അവീവ്: അഞ്ച് ഹമാസ് കമാന്‍ഡര്‍മാരെ വധിച്ചതായി ഇസ്രായേല്‍. ഗാസയ്ക്ക് താഴെയുള്ള തുരങ്കത്തില്‍ ഒത്തുകൂടിയ 11 മുതിര്‍ന്ന ഹമാസ് സൈനിക നേതാക്കളുടെ ചിത്രം പുറത്തുവിട്ടുകൊണ്ടാണ് അവരില്‍ അഞ്ച് പേര്‍ കൊല്ലപ്പെട്ടതായി ഇസ്രയേല്‍ സൈന്യം അറിയിച്ചത്.
ഹമാസിന്റെ ഏരിയല്‍ ഡിവിഷന്‍ മേധാവി, രണ്ട് ബറ്റാലിയന്‍ കമാന്‍ഡര്‍മാര്‍, ഒരു ബ്രിഗേഡ് കമാന്‍ഡര്‍, ഒരു ഡെപ്യൂട്ടി ബ്രിഗേഡ് കമാന്‍ഡര്‍ എന്നിവരെയാണ് ഇല്ലാതാക്കിയതെന്ന് സൈന്യം അറിയിച്ചത്.
ചൊവ്വാഴ്ച പുറത്തുവിട്ട ഹമാസ് നേതാക്കളുടെ അപൂര്‍വ ഫോട്ടോ, വടക്കന്‍ ഗാസ നഗരമായ ബെയ്റ്റ് ലാഹിയയിലെ ഇന്തോനേഷ്യന്‍ ആശുപത്രിക്ക് സമീപമുള്ള ഒരു റെസിഡന്‍ഷ്യല്‍ കെട്ടിടത്തിനു താഴെയുള്ള ഒരു തുരങ്കത്തില്‍ സംഘം ഒളിച്ചിരിക്കുമ്പോള്‍ എടുത്തതാണെന്ന് ഇസ്രായേല്‍ സൈന്യം പറഞ്ഞു.
ഗാസയില്‍ പിടിച്ചെടുത്ത ചിത്രം ഇസ്രായേല്‍ രഹസ്യാന്വേഷണ വിഭാഗം വിശകലനം ചെയ്‌തെങ്കിലും ആരാണ് ചിത്രം എടുത്തതെന്ന് വെളിപ്പെടുത്തിയിട്ടില്ല. ഫോട്ടോയുടെ കൃത്യമായ തീയതിയും സ്ഥലവും ഉള്‍പ്പെടെയുള്ള ചില വിശദാംശങ്ങള്‍ സ്വതന്ത്രമായി പരിശോധിക്കാന്‍ കഴിഞ്ഞിട്ടില്ലെന്ന് വാര്‍ത്തപുറത്തുവിട്ട മാധ്യമങ്ങള്‍ അറിയിച്ചു.
ഇസ്രായേല്‍ ചരിത്രത്തിലെ ഏറ്റവും മാരകമായ ദിവസമായ ഒക്ടോബര്‍ 7 ന് തെക്കന്‍ ഇസ്രായേലില്‍ സംഘം ആക്രമണം നടത്തിയതുമുതല്‍ ഹമാസ് നേതൃത്വത്തെ ഇസ്രായേല്‍ സേന ലക്ഷ്യമിട്ടിരുന്നു.
അന്നുമുതല്‍, സംഘടനയെ തകര്‍ക്കുക എന്ന ഉദ്ദേശത്തോടെ ഇസ്രായേല്‍ ഹമാസിനെതിരെ യുദ്ധം പ്രഖ്യാപിച്ചു. 2007 മുതല്‍ സംഘം നിയന്ത്രിച്ചിരുന്ന ഗാസ ഉപരോധിച്ചു, സാധാരണക്കാര്‍ക്കുള്ള ഭക്ഷണവും ഇന്ധനവും വിതരണം ചെയ്യുന്നത് വെട്ടിക്കുറയ്ക്കുകയും ഗാസാമുനമ്പില്‍ മാരകമായ ബോംബാക്രമണം നടത്തുകയും ചെയ്തു.
”ഹമാസ് ഞങ്ങളെ വേര്‍പെടുത്താന്‍ ആഗ്രഹിച്ചു; ഞങ്ങള്‍ അതിനെ കീറിമുറിക്കുകയാണ്,” ഗാസയില്‍ ഇപ്പോഴും ബന്ദികളാക്കിയ ഇസ്രായേലി കുടുംബങ്ങളുമായി കൂടിക്കാഴ്ച നടത്തിയ ശേഷം പ്രധാനമന്ത്രി ബെഞ്ചമിന്‍ നെതന്യാഹു ചൊവ്വാഴ്ച പറഞ്ഞു. ഹമാസിനെ അടിച്ചമര്‍ത്തുന്നത് തുടരണമോ അതോ കൂടുതല്‍ കൈമാറ്റങ്ങള്‍ അനുവദിക്കുന്ന മറ്റൊരു ഉടമ്പടിക്ക് വിലപേശണോ എന്ന കാര്യത്തില്‍ നെതന്യാഹുവിന്റെ സര്‍ക്കാര്‍ സമ്മര്‍ദ്ദത്തിലാണ്.
ഹമാസിന്റെ പകുതിയോളം ബറ്റാലിയന്‍ കമാന്‍ഡര്‍മാരെ ഇസ്രായേല്‍ കൊന്നൊടുക്കിയതായി നെതന്യാഹു അവകാശപ്പെട്ടെങ്കിലും കൊല്ലപ്പെട്ട എല്ലാവരുടെയും പേരും വിവരങ്ങള്‍ അദ്ദേഹം നല്‍കിയിട്ടില്ല.
പഴങ്ങളും പാനീയങ്ങളും മറ്റ് ഭക്ഷണങ്ങളും കൊണ്ട് അലങ്കരിച്ച നീണ്ട, താഴ്ന്ന മേശയ്ക്കുസമീപം നേതാക്കള്‍ ഇരിക്കുന്നതാണ് ഫോട്ടോ. ആയുധങ്ങളും പോരാളികളും സാമഗ്രികളും ഒളിപ്പിക്കാനും കൊണ്ടുപോകാനും ഹമാസ് നിര്‍മ്മിച്ച നൂറുകണക്കിന് തുരങ്കങ്ങള്‍ എന്‍ക്ലേവിന് താഴെയുണ്ട്.
അബു അനസ് എന്നറിയപ്പെടുന്ന വടക്കന്‍ ഗാസ സൈനിക മേധാവി അഹമ്മദ് അല്‍-ഗണ്ടൂര്‍, അദ്ദേഹത്തിന്റെ ഡെപ്യൂട്ടി വെയ്ല്‍ റജബ് എന്നിവരുള്‍പ്പെടെ ചിത്രത്തിലെ മൂന്ന് പുരുഷന്മാരെങ്കിലും കൊല്ലപ്പെട്ടതായി ഹമാസിന്റെ സൈനിക വിഭാഗമായ ഖസ്സാം ബ്രിഗേഡ് കഴിഞ്ഞ മാസം സ്ഥിരീകരിച്ചിരുന്നു. മറ്റൊരാള്‍ ഹമാസ് ബറ്റാലിയന്‍ കമാന്‍ഡറായിരുന്ന റാഫേത് സല്‍മാന്‍ ആയിരുന്നു. നവംബറില്‍, ഇസ്രായേല്‍ സൈന്യത്തിന്റെ വക്താവ്, മിസ്റ്റര്‍ അല്‍-ഗണ്ടൂര്‍ ഒളിച്ചിരുന്ന ഭൂഗര്‍ഭ സൈറ്റില്‍ തങ്ങളുടെ സൈന്യം ആക്രമണം നടത്തിയതായി പറഞ്ഞു.
ഒക്ടോബര്‍ 7-ലെ ആക്രമണത്തിന്റെ ആസൂത്രണത്തില്‍ പങ്കുവഹിച്ചതായി ഇസ്രായേല്‍ പറഞ്ഞ ചിത്രത്തിലെ മറ്റ് രണ്ട് പേര്‍ ആരോപിക്കപ്പെട്ടിരുന്നു. അതിലൊരാളായ അസെം അബു റക്ബയാണ് ഹമാസിന്റെ ഡ്രോണ്‍ പ്രോഗ്രാമിന് മേല്‍നോട്ടം വഹിച്ചിരുന്നതെന്ന് സൈന്യം പറഞ്ഞു.
വടക്കന്‍ ഗാസയുടെ ചില ഭാഗങ്ങള്‍ തകര്‍ത്തുനിരപ്പാക്കുകയും ജനസംഖ്യയുടെ 90 ശതമാനത്തിലധികം ആളുകളെ മാറ്റിപ്പാര്‍പ്പിക്കുകയും 15,500-ലധികം ആളുകള്‍ കൊല്ലപ്പെടുകയും ചെയ്ത ശക്തമായ ഇസ്രായേലി അധിനിവേശത്തിനിടയിലാണ് നേതാക്കളുടെ കൊലപാതകങ്ങള്‍ ഹമാസിന് തിരിച്ചടിയായതെന്ന് ഗസാന്‍ ആരോഗ്യ മന്ത്രാലയം അറിയിച്ചു.
യുദ്ധം ആരംഭിച്ചതിന് ശേഷം ആയിരക്കണക്കിന് ഹമാസ് പോരാളികളെ കൊന്നതായി ഇസ്രായേല്‍ സൈനിക മേധാവികള്‍ ഈ ആഴ്ച കണക്കാക്കി.
ഇസ്രായേല്‍ സൈന്യത്തിന്റെ കണക്കനുസരിച്ച് ഒക്ടോബര്‍ 7 മുതലുള്ള പോരാട്ടത്തില്‍ ഏകദേശം 400 ഇസ്രായേലി സൈനികര്‍ മരിച്ചു.
തെക്കന്‍ ഗാസയില്‍ ഒളിച്ചിരിക്കുന്നതായി കരുതപ്പെടുന്ന ഉന്നത ഹമാസ് നേതാക്കളെ കണ്ടെത്തി കൊല്ലാനുള്ള ശ്രമത്തിന്റെ ഭാഗമായി ഇസ്രായേല്‍ സൈന്യം അടുത്ത ദിവസങ്ങളില്‍ ഗാസയിലേക്ക് മുന്നേറി. ഇനിയും വധിക്കപ്പെടാനായി ഇസ്രയേല്‍ ലക്ഷ്യമിടുന്നവരുടെ പട്ടികയില്‍ ഗാസയിലെ ഹമാസിന്റെ നേതാവ് യഹ്യ സിന്‍വാറും ഖസ്സാം ബ്രിഗേഡ്സിന്റെ തലവന്‍ മുഹമ്മദ് ദീഫും ഉള്‍പ്പെടുന്നു.
ഒരു ഘട്ടത്തില്‍, സൈന്യവും ഹമാസ് പോരാളികളും ചൂടേറിയ നഗര പോരാട്ടത്തില്‍ ഏര്‍പ്പെട്ടിരിക്കുന്ന തെക്കന്‍ ഗാസയിലെ ഏറ്റവും വലിയ നഗരമായ ഖാന്‍ യൂനിസിലാണ് സിന്‍വാറും മിസ്റ്റര്‍ ഡീഫും ഉണ്ടെന്ന് കരുതിയത്.
”നമ്മുടെ സൈന്യം സിന്‍വാറിന്റെ വീട് വളയുകയാണ്. അവന് രക്ഷപ്പെടാന്‍ കഴിയും, പക്ഷേ ഞങ്ങള്‍ അവനില്‍ എത്തുന്നതുവരെ സമയത്തിന്റെ കാര്യമേ ഉള്ളൂ.-ബുധനാഴ്ച, നെതന്യാഹു എക്‌സ് പ്ലാറ്റ്ഫോമില്‍ പോസ്റ്റ് ചെയ്ത ഒരു വീഡിയോയില്‍ പറഞ്ഞു.
സിന്‍വാര്‍ ‘നിലത്തിന് മുകളിലല്ല’ എന്ന് പിന്നീട് ഒരു ഇസ്രായേലി സൈനിക വക്താവ് പറഞ്ഞെങ്കിലും കൂടുതല്‍ വിശദാംശങ്ങള്‍ വെളിപ്പെടുത്തിയില്ല.
ഗ്രൂപ്പിന്റെ നിലവിലെ നേതാക്കളെ കൊല്ലാന്‍ ഇസ്രയേലിന് കഴിഞ്ഞാലും, ഹമാസിനെ ഉന്മൂലനം ചെയ്ത് അധികാരത്തില്‍ നിന്ന് പുറത്താക്കുക എന്ന പ്രഖ്യാപിത ലക്ഷ്യം ഇസ്രായേല്‍ പൂര്‍ത്തീകരിക്കുമെന്ന് ഉറപ്പില്ല.
ഇസ്ലാമിക് സ്റ്റേറ്റിനും അല്‍ ഖ്വയ്ദയ്ക്കുമെതിരെ യു.എസ് യുദ്ധം ചെയ്തു, രണ്ട് ഭീകര ഗ്രൂപ്പുകളെയും മോശമായി തകര്‍ത്തെങ്കിലും ഒന്നിനെയും ഇല്ലാതാക്കാന്‍ കഴിഞ്ഞിട്ടില്ല.
ഹമാസ് നേതാക്കള്‍ ഉള്‍പ്പെട്ട ഫോട്ടോ പുറത്തുവിടാന്‍ തീരുമാനിച്ചത് എന്തുകൊണ്ടാണെന്ന് ഇസ്രായേല്‍ സൈന്യം വ്യക്തമാക്കിയിട്ടില്ല.
ഹമാസിന്റെ രണ്ടാമത്തെ വലിയ വടക്കന്‍ ബ്രിഗേഡിന് കാര്യമായ കേടുപാടുകള്‍ സംഭവിച്ചതായി ചൊവ്വാഴ്ച ഒരു പ്രസ്താവനയില്‍ ഇസ്രായേല്‍ സൈന്യം പറഞ്ഞു. ഗാസ സിറ്റി ബ്രിഗേഡില്‍ നിന്ന് ബറ്റാലിയനുകള്‍ക്ക് ഗുരുതരമായ നാശനഷ്ടം വരുത്തിയതായി ഇസ്രായേല്‍ സൈന്യവും അവകാശപ്പെട്ടു.
