ഡൽഹി: രാജ്യതലസ്ഥാനത്ത് പ്രവർത്തിക്കുന്ന അന്തർസംസ്ഥാന ഗുണ്ടാസംഘങ്ങളെ ഇല്ലാതാക്കുക എന്നതായിരിക്കണം ഡൽഹി പൊലീസിന്റെ പ്രഥമ പരിഗണനയെന്ന് കേന്ദ്ര ആഭ്യന്തരമന്ത്രി അമിത് ഷാ ഡൽഹി സർക്കാരിന് നിർദ്ദേശം നൽകി. അത്തരം സംഘങ്ങളെ ഉന്മൂലനം ചെയ്യാൻ കർശന നടപടി സ്വീകരിക്കാനും ഷാ നിർദ്ദേശം നൽകി. അനധികൃത നുഴഞ്ഞുകയറ്റക്കാരുടെ വിഷയം ദേശീയ സുരക്ഷയുമായി ബന്ധപ്പെട്ടിരിക്കുന്നുവെന്നും അവരെ കർശനമായി കൈകാര്യം ചെയ്യണമെന്നും ഷാ ആവശ്യപ്പെട്ടതായും റിപ്പോ‍ർട്ടുണ്ട്. “നഗരത്തിലെ അനധികൃത താമസക്കാരെ കണ്ടെത്തി നാടുകടത്തണം” ഡൽഹി പൊലീസിനോട് അമിത് ഷാ നിർദ്ദേശം നൽകിയതായി റിപ്പോർട്ട്‌.
തലസ്ഥാന നഗരത്തിൽ ബംഗ്ലാദേശികളും റോഹിംഗ്യകളും ഉൾപ്പെടെയുള്ള അനധികൃത കുടിയേറ്റക്കാരെ കൈകാര്യം ചെയ്യുമ്പോൾ വേഗത്തിലുള്ളതുമായ നിയമപരമായ സമീപനം സ്വീകരിക്കണമെന്ന് അമിത് ഷാ വെള്ളിയാഴ്ച ഡൽഹി പൊലീസിലെ ഉന്നതർക്ക് നിർദ്ദേശം നൽകി.”നിലവിൽ, ബംഗ്ലാദേശികളും റോഹിംഗ്യകളും കൂടുതലുള്ള കോളനികളിൽ അന്വേഷണം നടത്തിവരികയാണെന്നും അനധികൃത താമസക്കാർക്ക് താമസ സൗകര്യം ഒരുക്കിയവർക്കും വ്യാജ രേഖകൾ സമ്പാദിക്കാൻ സഹായിച്ചവർക്കുമെതിരെ കർശന നടപടി സ്വീകരിക്കുമെന്നും യോഗത്തിൽ പങ്കെടുത്ത മുതിർന്ന ഉദ്യോഗസ്ഥൻ പറഞ്ഞു. ഡൽഹി മുഖ്യമന്ത്രി രേഖ ഗുപ്ത, ഡൽഹി ആഭ്യന്തരമന്ത്രി ആശിഷ് സൂദ്, ഡൽഹി പെലീസ് കമീഷണർ സഞ്ജയ് അറോറ, മറ്റ് മുതിർന്ന ഉദ്യോഗസ്ഥർ എന്നിവർ യോഗത്തിൽ പങ്കെടുത്തു.
