അമേരിക്കൻ രാഷ്ട്രീയത്തിൽ തലമുറ മാറ്റത്തിന്റെ തിരമാലയെന്ന് മുന്നറിയിപ്പ് : ഒകാസിയോ-കോർട്ടെസ്

പി.പി ചെറിയാൻ

വാഷിംഗ്ടൺ: മുതിർന്ന തലമുറയുടെ നയങ്ങൾ കാരണം സാമ്പത്തിക അനിശ്ചിതത്വം നേരിടുന്ന യുവാക്കളുടെ രോഷം അമേരിക്കൻ രാഷ്ട്രീയത്തിൽ വലിയൊരു മാറ്റത്തിന് വഴിവെക്കുകയാണെന്ന് ന്യൂയോർക്കിൽ നിന്നുള്ള ഡെമോക്രാറ്റിക് പ്രതിനിധി അലക്സാണ്ട്രിയ ഒകാസിയോ-കോർട്ടെസ്.

“മില്ലെനിയലുകൾ ഇനി വെറും കൊച്ചുകുട്ടികളല്ല, സ്വന്തമായി വീടും കുട്ടികളുമുള്ള മുതിർന്ന വ്യക്തികളാണ്. സാമ്പത്തിക ഭാവിയും കാലാവസ്ഥാ വിഷയങ്ങളും മുൻതലമുറകൾ അവഗണിച്ചതിലുള്ള വലിയ ദേഷ്യം യുവാക്കൾക്കുണ്ട്. വരും തിരഞ്ഞെടുപ്പുകളിൽ ഈ തലമുറ നിർണായക ശക്തിയായി മാറും,” ഒകാസിയോ-കോർട്ടെസ് പറഞ്ഞു.

യുവാക്കളുടെയും പ്രത്യേകിച്ച് യുവ പുരുഷന്മാരുടെയും പിന്തുണ വീണ്ടെടുക്കാൻ ഡെമോക്രാറ്റിക് പാർട്ടി അടിയന്തരമായി ഇടപെടണമെന്നും അവർ ആവശ്യപ്പെട്ടു. വരും വർഷങ്ങളിൽ അമേരിക്കൻ വോട്ടർമാരിൽ മില്ലെനിയലുകളുടെ പങ്കാളിത്തം വലിയ തോതിൽ ഉയരും. 2024-ൽ ആകെ വോട്ടർമാരുടെ 25 ശതമാനത്തോളം മില്ലെനിയലുകളായിരുന്നുവെന്ന് കണക്കുകൾ ചൂണ്ടിക്കാണിക്കുന്നു.

തന്റെ രാഷ്ട്രീയ നിലപാടുകളിലുണ്ടായ പക്വതയെക്കുറിച്ചും അവർ അഭിമുഖത്തിൽ സംസാരിച്ചു. മുൻപ് ഉയർന്നുവന്ന ‘പോലീസ് ഫണ്ടിംഗ് നിർത്തലാക്കൽ’ പോലുള്ള തീവ്രമായ മുദ്രാവാക്യങ്ങൾ അക്കാലത്തെ പ്രത്യേക സാഹചര്യത്തിൽ ഉയർന്നതാണെന്നും, ഇന്നത്തെ രാഷ്ട്രീയ സാഹചര്യത്തിൽ അത്തരം ഭാഷയല്ല പ്രയോഗിക്കുന്നതെന്നും അവർ കൂട്ടിച്ചേർത്തു.

ഉയർന്ന ഭവനവായ്പ നിരക്കുകളും വീടുകളുടെ അമിതവിലയും കാരണം സ്വന്തമായി വീട് വാങ്ങാൻ ബുദ്ധിമുട്ടുന്ന യുവാക്കൾക്കിടയിൽ മുൻതലമുറയോടുള്ള അമർഷം വർധിച്ചുവരുന്ന സാഹചര്യത്തിലാണ് ഡെമോക്രാറ്റിക് നേതാവിന്റെ ഈ നിർണായക പ്രതികരണം.