ഡാളസിൽ വൻ ലഹരിക്കടത്ത് ശൃംഖല തകർത്തു; 19 പേർക്കെതിരെ ഫെഡറൽ കുറ്റപത്രം

പി പി ചെറിയാൻ

ഡാളസ്:(ടെക്സസ്): ഡള്ളാസ് കേന്ദ്രീകരിച്ച് വർഷങ്ങളായി പ്രവർത്തിച്ച വലിയൊരു ലഹരിക്കടത്ത് ശൃംഖലയ്‌ക്കെതിരെ അമേരിക്കൻ ഫെഡറൽ അധികൃതരുടെ ശക്തമായ നടപടി. യു.എസിലെ ടെക്സസ് നോർത്തേൺ ഡിസ്ട്രിക്റ്റ് കോടതിയിൽ സമർപ്പിച്ച 24 കുറ്റങ്ങളടങ്ങുന്ന ഫെഡറൽ കുറ്റപത്രത്തിൽ 19 പ്രതികളാണ് ഉൾപ്പെട്ടിരിക്കുന്നത്.

വിദ്യാഭ്യാസ സ്ഥാപനങ്ങൾക്കും പൊതുസ്ഥലങ്ങൾക്കും സമീപം പോലും ലഹരി വിൽപ്പന നടത്തിയിരുന്ന ഈ സംഘത്തിനെതിരെ എഫ്.ബി.ഐയും ഹോംലാൻഡ് സെക്യൂരിറ്റി ടാസ്ക് ഫോഴ്‌സും അടക്കമുള്ള പ്രമുഖ ഏജൻസികളുടെ സംയുക്ത നീക്കത്തിലൂടെയാണ് വൻ മാഫിയ കുടുങ്ങിയത്.

നിരോധിക്കപ്പെട്ട ലഹരിമരുന്നുകൾ, തീവ്ര ശേഷിയുള്ള ആയുധങ്ങൾ, ലക്ഷക്കണക്കിന് ഡോളർ വിലമതിക്കുന്ന പണവും ആഭരണങ്ങളുമാണ് പ്രതികളിൽ നിന്നും പിടിച്ചെടുത്തത്

ഹോംലാൻഡ് സെക്യൂരിറ്റി ടാസ്ക് ഫോഴ്‌സ്, ഡള്ളാസ് പോലീസ് ഡിപ്പാർട്ട്‌മെന്റ്, എഫ്.ബി.ഐ (FBI), ഡി.ഇ.എ (DEA), ഐ.ആർ.എസ് (IRS-CI) എന്നിവരുടെ സംയുക്ത അന്വേഷണത്തിനൊടുവിലാണ് ഈ ലഹരി മാഫിയാ സംഘം നിയമത്തിന് മുന്നിലായത്. സ്കൂളുകൾ, പാർക്കുകൾ, കമ്മ്യൂണിറ്റി സെന്ററുകൾ എന്നിവയോട് ചേർന്നുപോലും ഇവർ ലഹരി വിൽപ്പന കേന്ദ്രങ്ങൾ (‘ഡ്രഗ് ഹൗസുകൾ’) നടത്തിയിരുന്നുവെന്ന് അന്വേഷണത്തിൽ കണ്ടെത്തിയിട്ടുണ്ട്. ഇത് പ്രദേശവാസികളിലും രക്ഷിതാക്കളിലും വലിയ ആശങ്കയാണ് ഉണ്ടാക്കിയിരുന്നത്.