മംഗളൂരു -റാസൽഖൈമ : എയർ ഇന്ത്യ എക്‌സ്പ്രസ് നേരിട്ടുള്ള വിമാന സർവീസ് ആരംഭിച്ചു

മംഗളൂരു: യുഎഇയിലെ പ്രമുഖ വ്യാവസായിക തുറമുഖ നഗരമായ റാസൽഖൈമയിലേക്ക് എയർ ഇന്ത്യ എക്‌സ്പ്രസ് നേരിട്ടുള്ള വിമാന സർവീസ് ആരംഭിച്ചു. പുതിയ റൂട്ട് നിലവിൽ വന്നതേടെ മംഗളൂരു അന്താരാഷ്ട്ര വിമാനത്താവളത്തിന്റെ അന്താരാഷ്ട്ര സർവീസ് ശൃംഖല കൂടുതൽ വിപുലമായി. 2026 ലെ ശൈത്യകാല ഷെഡ്യൂളിന്റെ രണ്ടാം ദിവസമാണ് പുതിയ സെക്ടറിലേക്ക് സർവീസ് ആരംഭിച്ചതെന്ന് വിമാനത്താവള അധികൃതർ അറിയിച്ചു.

ഗൾഫ് റൂട്ടിലേക്കുള്ള വലിയ യാത്രക്കാരുടെ ആവശ്യകത വ്യക്തമാക്കിക്കൊണ്ട്, തിങ്കളാഴ്ച മംഗളൂരുവിൽനിന്ന് പുറപ്പെട്ട ആദ്യ വിമാനത്തിൽ (IX 871) 146 യാത്രക്കാരുണ്ടായിരുന്നു. തുടർന്ന് റാസൽഖൈമയിൽ നിന്ന് മംഗളൂരുവിലെത്തിയ മടക്ക വിമാനത്തിൽ (IX 872) 36 യാത്രക്കാരും എത്തിച്ചേർന്നു.

എയർ ഇന്ത്യ എക്‌സ്പ്രസ് ആഴ്ചയിൽ രണ്ട് ദിവസങ്ങളിലാണ് ഈ സെക്ടറിൽ സർവീസ് നടത്തുന്നത്. തിങ്കൾ, ശനി ദിവസങ്ങളിലാണ് വിമാനങ്ങൾ ക്രമീകരിച്ചിരിക്കുന്നത്.

IX 871: തിങ്കൾ, ശനി ദിവസങ്ങളിൽ രാവിലെ 9.30-ന് മംഗളൂരുവിൽനിന്ന് പുറപ്പെടും.

IX 872: തിങ്കൾ, ശനി ദിവസങ്ങളിൽ വൈകുന്നേരം 6.25-ന് റാസൽഖൈമയിൽനിന്ന് മംഗളൂരുവിൽ എത്തിച്ചേരും.

പുതിയ ശീതകാല ഷെഡ്യൂൾ പ്രകാരം മംഗളൂരു വിമാനത്താവളത്തിൽ നിന്ന് ആസൂത്രണം ചെയ്ത 58 പ്രതിവാര അന്താരാഷ്ട്ര വിമാനങ്ങളിൽ 38 എണ്ണവും യുഎഇയിലേക്കാണെന്ന് അധികൃതർ വ്യക്തമാക്കി. ഇതിൽ 20 സർവീസുകൾ ദുബായിലേക്കും 16 എണ്ണം അബൂദബിയിലേക്കും രണ്ടെണ്ണം റാസൽഖൈമയിലേക്കുമാണ്. ബാക്കിയുള്ള വിമാനങ്ങൾ മിഡിൽ ഈസ്റ്റിലെ മറ്റ് പ്രധാന നഗരങ്ങളിലേക്കാണ് പറക്കുന്നത്. ദുബൈ, ഷാർജ എന്നീ നഗരങ്ങളിലേക്ക് റാസൽഖൈമയിൽനിന്ന് ഏകദേശം ഒരു മണിക്കൂർ മാത്രമാണ് യാത്രാദൂരം എന്നതിനാൽ, യുഎഇയുടെ വിവിധ ഭാഗങ്ങളിലേക്ക് യാത്ര ചെയ്യുന്ന പ്രവാസികൾക്ക് പുതിയ സർവീസ് വലിയ തോതിൽ സൗകര്യപ്രദമാകുമെന്ന് വിമാനത്താവള അധികൃതർ ചൂണ്ടിക്കാട്ടി.