തേനി ജയിലിൽനിന്ന് 17 തടവുകാർ ചാടിപ്പോയി; ഒരാൾ പിടിയിൽ, 16 പേർക്കായി തിരച്ചിൽ ശക്തം

ചെന്നൈ: തമിഴ്‌നാട്ടിലെ തേനി ജില്ലയിലെ തെക്കമ്പട്ടി സബ് ജയിലിൽനിന്ന് ജയിൽ ജീവനക്കാരെ ആക്രമിച്ച ശേഷം 17 തടവുകാർ രക്ഷപ്പെട്ടു. തിങ്കളാഴ്ച രാത്രി നടന്ന സംഭവത്തിൽ ഒരാളെ പൊലീസ് പിടികൂടി. ശേഷിക്കുന്ന 16 പേർക്കായി തിരച്ചിൽ ഊർജിതമാക്കി.

ജയിലിലെ ഒരേ സെല്ലിൽ കഴിഞ്ഞിരുന്ന തടവുകാരിൽ ഒരാൾക്ക് അപസ്മാരം ബാധിച്ചതായി അഭിനയിച്ചതോടെയാണ് സംഭവങ്ങളുടെ തുടക്കം. സഹായിക്കാനായി സെല്ലിന്റെ വാതിൽ തുറന്ന ജയിൽ ജീവനക്കാരനെ തടവുകാർ സംഘം ചേർന്ന് ആക്രമിച്ച ശേഷം രക്ഷപ്പെടുകയായിരുന്നു. ആക്രമണത്തിൽ ഒരു ജയിൽ ജീവനക്കാരന് തലയ്ക്ക് പരിക്കേറ്റു. മറ്റ് രണ്ട് ജീവനക്കാർക്കും നിസ്സാര പരിക്കേറ്റതായി റിപ്പോർട്ടുകളുണ്ട്.

സംഭവത്തെ തുടർന്ന് തടവുകാരെ കണ്ടെത്താൻ 17 പ്രത്യേക പൊലീസ് സംഘങ്ങളെ നിയോഗിച്ചു. തേനി, ദിണ്ടിഗൽ, മധുര ജില്ലകളിലുൾപ്പെടെ പരിശോധന ശക്തമാക്കിയിട്ടുണ്ട്. ദിണ്ടിഗൽ ജില്ലയിൽ 16 ഇടങ്ങളിൽ ചെക്ക് പോസ്റ്റുകളും സ്ഥാപിച്ചു. കേരളത്തിലേക്ക് കടക്കാനുള്ള സാധ്യത കണക്കിലെടുത്ത് അതിർത്തി മേഖലകളിലും നിരീക്ഷണം ശക്തമാക്കിയതായി റിപ്പോർട്ടുകളുണ്ട്.

സംഭവത്തിൽ പൊലീസ് കേസെടുത്ത് അന്വേഷണം ആരംഭിച്ചു. ജയിൽ സുരക്ഷയിലെ വീഴ്ചകളും തടവുകാർ രക്ഷപ്പെട്ട സാഹചര്യങ്ങളും പരിശോധിച്ചുവരികയാണ്.