ട്രംപ് ഭരണകൂടം മൗറീൻ കോമിയെ പുറത്താക്കിയത് നിയമവിരുദ്ധമെന്ന് കോടതി വിധി

പി പി ചെറിയാൻ

ന്യൂയോർക്ക്: മുൻ എഫ്.ബി.ഐ ഡയറക്ടർ ജെയിംസ് കോമിയുടെ മകളും മുൻ ഫെഡറൽ പ്രോസിക്യൂട്ടറുമായ മൗറീൻ കോമിയെ ട്രംപ് ഭരണകൂടം കഴിഞ്ഞ വർഷം പുറത്താക്കിയത് നിയമവിരുദ്ധമാണെന്ന് മാൻഹട്ടൻ ഫെഡറൽ കോടതി തിങ്കളാഴ്ച വിധിച്ചു.

ജെഫ്രി എപ്സ്റ്റീൻ, സീൻ കോംബ്‌സ് തുടങ്ങിയ പ്രമുഖരുടെ വിചാരണകൾ കൈകാര്യം ചെയ്തിരുന്ന പ്രമുഖ പ്രോസിക്യൂട്ടറായിരുന്നു മൗറീൻ കോമി. ജസ്റ്റിസ് ഡിപ്പാർട്ട്മെന്റ് അധികാരം ദുർവിനിയോഗം ചെയ്തുവെന്നും, ഫെഡറൽ അഡ്മിനിസ്ട്രേറ്റീവ് നിയമങ്ങളും മൗറീൻ കോമിയുടെ അവകാശങ്ങളും ലംഘിച്ചുവെന്നും ഫെഡറൽ ഡിസ്ട്രിക്റ്റ് കോടതി ജഡ്ജി ജെസ്സേ എം. ഫർമാൻ 55 പേജുള്ള വിധിന്യായത്തിൽ വ്യക്തമാക്കി.

2025 ജൂലൈയിലാണ് മൗറീൻ കോമിയെ ട്രംപ് ഭരണകൂടം കാരണം വ്യക്തമാക്കാതെ പുറത്താക്കിയത്. പിതാവ് ജെയിംസ് കോമി ട്രംപിന്റെ കടുത്ത വിമർശകനായതുകൊണ്ടാണ് തനിക്കെതിരെ നടപടിയെടുത്തതെന്ന് മൗറീൻ കോമി കോടതിയിൽ ചൂണ്ടിക്കാണിച്ചിരുന്നു.

പ്രസിഡൻ്റിൻ്റെ അധികാരപരിധിയുടെ അടിസ്ഥാനത്തിൽ അന്നത്തെ അറ്റോർണി ജനറൽ പാം ബോണ്ടിക്ക് മൗറീൻ കോമിയെ പുറത്താക്കാൻ അധികാരമുണ്ടെന്നായിരുന്നു ജസ്റ്റിസ് ഡിപ്പാർട്ട്മെന്റിന്റെ വാദം. എന്നാൽ ഇത് ഭരണഘടനയുടെ അടിസ്ഥാന തത്വങ്ങൾക്ക് എതിരാണെന്ന് ജഡ്ജി തള്ളി.

2025 ഡിസംബർ വരെയുള്ള കാലയളവിലെ ശമ്പളം മൗറീൻ കോമിക്ക് തിരികെ നൽകാൻ കോടതി ഉത്തരവിട്ടു.റോബർട്ട് മെനെൻഡസ് ഉൾപ്പെടെയുള്ളവരുടെ അഴിമതിക്കേസുകളും ഗിസ്‌ലെൻ മാക്സ്വെല്ലിനെതിരെയുള്ള സെക്സ് ട്രാഫിക്കിംഗ് കേസുകളും മൗറീൻ കോമി വിജയകരമായി നടത്തിയിട്ടുണ്ട്.

ഈ വിധി ട്രംപ് ഭരണകൂടത്തിന്റെ തീരുമാനങ്ങൾക്കെതിരെ നിയമപോരാട്ടം നടത്തുന്ന മറ്റ് ഫെഡറൽ ജീവനക്കാർക്കും വലിയ ആശ്വാസമാകും. അതേസമയം, കോടതി വിധിക്കെതിരെ അപ്പീൽ പോകുമെന്ന് ജസ്റ്റിസ് ഡിപ്പാർട്ട്മെന്റ് വ്യക്തമാക്കിയിട്ടുണ്ട്.