നവംബര്‍ 1ന് ഇൻഡ്യ മുന്നണി നടത്തുന്ന മഹാറാലിക്ക് പിന്തുണയുമായി കോക്രോച്ച് ജനത പാര്‍ട്ടി

ഡൽഹി: എസ്ഐആറിനും മുഖ്യതെരഞ്ഞെടുപ്പ് കമ്മീഷണര്‍ ഗ്യാനേഷ് കുമാറിനുമെതിരെ നവംബര്‍ 1ന് ഇൻഡ്യ മുന്നണി നടത്തുന്ന മഹാറാലിക്ക് പിന്തുണയുമായി കോക്രോച്ച് ജനത പാര്‍ട്ടി.സിജെപി സ്ഥാപകൻ അഭിജീത് ദീപ്കെ ബുധനാഴ്ച എക്സിലൂടെ പിന്തുണ അറിയിച്ചു.

”ഗ്യാനു പുറത്തുപോകണം. നവംബര്‍ 1ന് ഇൻഡ്യ മുന്നണി സംഘടിപ്പിക്കുന്ന റാലിക്ക് കോക്രോച്ച് ജനത പാര്‍ട്ടി പിന്തുണ അറിയിക്കുന്നു. രാഷ്ട്രമാണ് എല്ലാത്തിലും വലുത്” അദ്ദേഹം എക്സിൽ കുറിച്ചു. ആർക്ക് വോട്ട് ചെയ്യണമെന്ന് സർക്കാർ തീരുമാനിക്കുന്നതിനേക്കാൾ ജനങ്ങൾ സ്വന്തം സർക്കാരിനെ തിരഞ്ഞെടുക്കുന്നു എന്ന തത്വത്തിലാണ് ജനാധിപത്യം സ്ഥാപിച്ചിരിക്കുന്നതെന്ന് സിജെപി പ്രസ്താവനയിൽ പറഞ്ഞു.എസ്‌ഐആർ നടപടിക്രമം ഇതിനെ ദുർബലപ്പെടുത്തിയെന്നും വോട്ടർ പട്ടികയിൽ നിന്ന് യോഗ്യരായ വോട്ടർമാരെ നീക്കം ചെയ്യുന്നതിനെക്കുറിച്ചുള്ള ആശങ്കകൾ ഉയർത്തുന്നുവെന്നും പാർട്ടി ആരോപിച്ചു.”ജനാധിപത്യത്തിന്റെ അടിസ്ഥാന തത്വം ജനങ്ങൾക്ക് അവരുടെ സർക്കാരിനെ തെരഞ്ഞെടുക്കാനുള്ള സ്വാതന്ത്ര്യം നൽകുക എന്നതാണ്, സർക്കാരിന് വോട്ടർമാരെ തെരഞ്ഞെടുക്കാനുള്ള സ്വാതന്ത്ര്യം നൽകുക എന്നതല്ല,” സിജെപി ചൂണ്ടിക്കാട്ടി.

തെരഞ്ഞെടുപ്പ് കമ്മീഷനിൽ പൊതുജന വിശ്വാസം പുനഃസ്ഥാപിക്കേണ്ടത് അത്യാവശ്യമാണെന്ന് പറഞ്ഞുകൊണ്ട് കോക്രോച്ച് ജനതാ പാർട്ടിയും ഗ്യാനേഷിന്‍റെ രാജി ആവശ്യപ്പെട്ടു. “നമ്മുടെ ഭരണഘടന എല്ലാ മുതിർന്ന പൗരന്മാർക്കും വോട്ടവകാശം നൽകിയിട്ടുണ്ട്. യോഗ്യരായ ഒരു പൗരനും ആ അവകാശം നിഷേധിക്കപ്പെടുന്നില്ലെന്ന് ഉറപ്പാക്കേണ്ടത് നമ്മുടെ ഉത്തരവാദിത്തമാണ്,” സിജെപി പറഞ്ഞു. നവംബർ 1 ന് ഡൽഹിയിലെ രാംലീല മൈതാനിയിലാണ് ഇൻഡ്യ മുന്നണി റാലി സംഘടിപ്പിച്ചിരിക്കുന്നത്.