ന്യൂഡൽഹി: ഇന്ത്യൻ ഒളിമ്പിക് അസോസിയേഷൻ (ഐഒഎ) പ്രസിഡന്റ് പി.ടി. ഉഷയുടെ ഐഒഎ ജനറൽ ബോഡിയിലേക്കുള്ള നാമനിർദേശത്തിനെതിരെ ഐസ് ഹോക്കി അസോസിയേഷൻ ഓഫ് ഇന്ത്യയിലെ ഒരു വിഭാഗം പരാതി നൽകി. ദേശീയ ഫെഡറേഷനിൽ ഉഷയ്ക്ക് അംഗത്വമില്ലെന്നും അതിനാൽ ഫെഡറേഷനെ പ്രതിനിധീകരിച്ച് ജനറൽ ബോഡിയിലേക്ക് നാമനിർദേശം ചെയ്യാൻ കഴിയില്ലെന്നുമാണ് പരാതിയിലെ പ്രധാന ആരോപണം.

ഐഒഎയുടെ പുതിയ എക്സിക്യൂട്ടീവ് കൗൺസിൽ തിരഞ്ഞെടുപ്പിൽ മത്സരിക്കാനുള്ള സാധ്യത നിലനിർത്തുന്നതിനായാണ് ഐസ് ഹോക്കി അസോസിയേഷൻ ഉഷയെ വനിതാ പ്രതിനിധിയായി നാമനിർദേശം ചെയ്തത്. നേരത്തെ സ്പോർട്സ്പേഴ്സൺസ് ഓഫ് മെറിറ്റ് (എസ്ഒഎം) വിഭാഗത്തിലേക്കുള്ള തിരഞ്ഞെടുപ്പിൽ ഉഷ പരാജയപ്പെട്ടിരുന്നു. വനിതാ വിഭാഗത്തിലെ നാല് സ്ഥാനങ്ങളിൽ അഞ്ചാം സ്ഥാനത്താണ് അവർ എത്തിയത്. ഇതോടെ ഐഒഎ പ്രസിഡന്റ് സ്ഥാനത്തേക്കുള്ള പുനർതിരഞ്ഞെടുപ്പ് നീക്കത്തിന് തിരിച്ചടിയുണ്ടായെങ്കിലും ഫെഡറേഷൻ വഴിയുള്ള നാമനിർദേശം മത്സരസാധ്യത വീണ്ടും തുറന്നു.

ഐഒഎ തിരഞ്ഞെടുപ്പ് ചട്ടപ്രകാരം ദേശീയ കായിക ഫെഡറേഷൻ നാമനിർദേശം ചെയ്യുന്ന പ്രതിനിധി അതത് ഫെഡറേഷനിലെ അംഗമായിരിക്കണം. ഐഒഎ ഭരണഘടനയിലെ ആർട്ടിക്കിൾ 10.4ലും ഇക്കാര്യം വ്യക്തമാക്കുന്നുണ്ട്. ഈ വ്യവസ്ഥ ഉഷയുടെ കാര്യത്തിൽ പാലിക്കപ്പെട്ടിട്ടില്ലെന്നാണ് പരാതിക്കാരുടെ വാദം.

കുൻസാങ് നാംഗ്യാലിന്റെ നേതൃത്വത്തിലുള്ള ഐസ് ഹോക്കി അസോസിയേഷൻ വിഭാഗത്തിന്റെ വൈസ് പ്രസിഡന്റാണെന്ന് അവകാശപ്പെടുന്ന അജിത് കക്കറാണ് തിരഞ്ഞെടുപ്പ് ഉദ്യോഗസ്ഥൻ സഞ്ജയ് കുമാർ ശ്രീവാസ്തവയ്ക്ക് പരാതി നൽകിയത്. ഉഷയ്ക്കൊപ്പം ഹർജീന്ദർ സിങ്ങിന്റെ നാമനിർദേശത്തെയും അദ്ദേഹം ചോദ്യം ചെയ്തിട്ടുണ്ട്. നാമനിർദേശത്തിന് അംഗീകാരം നൽകിയ സംഘടനയുടെ അധികാരവും ഭരണസമിതിയുടെ നിയമസാധുതയും പരിശോധിക്കണമെന്നും പരാതിയിൽ ആവശ്യപ്പെട്ടു.

ഐസ് ഹോക്കി അസോസിയേഷനിൽ നിലവിൽ രണ്ട് വിഭാഗങ്ങൾ തമ്മിൽ തർക്കം നിലനിൽക്കുന്നുണ്ട്. ഗുര്‍പ്രീത് സിങ് ബക്ഷിയുടെ നേതൃത്വത്തിലുള്ള വിഭാഗത്തെയാണ് ഐഒഎ അംഗീകരിക്കുന്നത്. എന്നാൽ, കേന്ദ്ര കായിക മന്ത്രാലയം ഐസ് ഹോക്കിയുടെ ദേശീയ ഫെഡറേഷനുകളിലൊന്നിനും അംഗീകാരം നൽകിയിട്ടില്ല. 2022ൽ സാധുവായ തിരഞ്ഞെടുപ്പ് നടന്നിട്ടില്ലെന്നും ഓഗസ്റ്റ് രണ്ടിന് 2026ൽ നടത്തിയ തിരഞ്ഞെടുപ്പിലൂടെയാണ് തങ്ങളുടെ വിഭാഗം അധികാരത്തിലെത്തിയതെന്നുമാണ് പരാതിക്കാരുടെ അവകാശവാദം.

ഡിസംബർ അഞ്ചിനാണ് ഐഒഎ എക്സിക്യൂട്ടീവ് കൗൺസിൽ തിരഞ്ഞെടുപ്പ് നടക്കുന്നത്. താൽക്കാലിക വോട്ടർപട്ടികയ്ക്കെതിരായ പരാതികൾ പരിശോധിച്ച് ശനിയാഴ്ച തീരുമാനമെടുക്കാനും അന്തിമ വോട്ടർപട്ടിക ഞായറാഴ്ച പ്രസിദ്ധീകരിക്കാനുമാണ് തിരഞ്ഞെടുപ്പ് ഉദ്യോഗസ്ഥന്റെ തീരുമാനം. ഉഷയുടെ നാമനിർദേശത്തിന്റെ സാധുത സംബന്ധിച്ച അന്തിമ തീരുമാനം ഇതോടെ നിർണായകമാകും.