ഒ’ഹെയറിലും മിഡ്‌വേയിലും വിമാന റദ്ദാക്കൽ തുടരുന്നു

Global Indian Writer · November 15, 2026 · 1 min read · 0 Comments · 0 Shares

അനിൽ മറ്റത്തിക്കുന്നേൽ

ഷിക്കാഗോ, നവംബർ 14 — അമേരിക്കയിലുടനീളം വിമാനങ്ങളുടെ പുറപ്പെടൽ താൽക്കാലികമായി നിർത്തിവച്ച ഫെഡറൽ ഏവിയേഷൻ അഡ്മിനിസ്ട്രേഷന്റെ (FAA) ഉത്തരവ് വെള്ളിയാഴ്ച പിൻവലിച്ചെങ്കിലും ഷിക്കാഗോയിലെ ഒ’ഹെയർ, മിഡ്‌വേ വിമാനത്താവളങ്ങളിൽ ശനിയാഴ്ചയും റദ്ദാക്കലും കാലതാമസവും തുടർന്നു. ശനിയാഴ്ച രാവിലെ ഏഴുമണിയോടെയുള്ള കണക്കിൽ ഒ’ഹെയറിൽ 400-ലേറെ സർവീസുകളും മിഡ്‌വേയിൽ അറുപതോളം സർവീസുകളും റദ്ദാക്കിയിരുന്നു. ഇരു വിമാനത്താവളങ്ങളിലുമായി ഇരുനൂറോളം സർവീസുകൾ വൈകി.

വ്യോമഗതാഗത നിയന്ത്രണ സംവിധാനത്തിന്റെ നവീകരണത്തിനിടെ പഴയ ഉപകരണങ്ങൾക്ക് അമിതഭാരം നേരിട്ടതോടെ ആശയവിനിമയത്തിലും റഡാർ സംവിധാനത്തിലും ഇടയ്ക്കിടെ തടസ്സമുണ്ടായെന്നാണ് ഫെഡറൽ അധികൃതരുടെ വിശദീകരണം. വെള്ളിയാഴ്ച നാലു മണിക്കൂറിലധികം നീണ്ട ഗ്രൗണ്ട് സ്റ്റോപ്പിന്റെ പ്രത്യാഘാതം ശനിയാഴ്ചയും രാജ്യത്തുടനീളം അനുഭവപ്പെട്ടു. ഞായറാഴ്ച അവസാനത്തോടെ സർവീസുകൾ സാധാരണ നിലയിലാകുമെന്നാണ് FAAയുടെ പ്രതീക്ഷ.

ഇന്ത്യയിൽനിന്ന് അമേരിക്കയിലെത്തിയ ചില യാത്രക്കാർക്ക് തുടർവിമാനങ്ങൾ റദ്ദായതോടെ ഇടത്താവളങ്ങളിൽ യാത്ര മുടങ്ങി. ഡൽഹിയിൽനിന്ന് ഫിലഡൽഫിയയിലെത്തിയ ഒരു യാത്രക്കാരന് ടാമ്പയിലേക്കുള്ള അവസാന സർവീസ് റദ്ദായതിനെ തുടർന്ന് വിമാനത്താവളത്തിന് സമീപം താമസിക്കേണ്ടിവന്നു. ഈ വാരാന്ത്യത്തിൽ യാത്ര ചെയ്യുന്നവർ വിമാനത്താവളത്തിലേക്ക് പുറപ്പെടുംമുമ്പ് ആദ്യ വിമാനത്തിന്റെയും കണക്ഷൻ സർവീസുകളുടെയും സ്ഥിതി എയർലൈനുമായി പരിശോധിക്കുന്നത് ഉചിതമാണ്.

Share this story

Leave a Comment

Your comment will be visible after admin approval.