തിരുവനന്തപുരം: നിയമസഭാ സമ്മേളനത്തില് ശബരിമല സ്വര്ണക്കൊള്ള പരസ്പര ആയുധമാക്കി ഭരണപക്ഷവും പ്രതിപക്ഷവും. കേസിലെ ഒന്നാം പ്രതി ഉണ്ണികൃഷ്ണന് പോറ്റി സോണിയാ ഗാന്ധിയെ സന്ദര്ശിച്ചത് ആയുധമാക്കിയാണ് പ്രതിപക്ഷത്തിന്റെ പ്രതിഷേധത്തെ ഭരണപക്ഷം നേരിട്ടത്. സോണിയാ ഗാന്ധിയെ അറസ്റ്റ് ചെയ്ത് ചോദ്യം ചെയ്യണമെന്ന് വിദ്യാഭ്യാസ മന്ത്രി വി ശിവന്കുട്ടി ആവശ്യപ്പെട്ടു.
‘സോണിയാ ഗാന്ധിയെ സന്ദര്ശിച്ചതിനെ കുറിച്ച് പ്രതിപക്ഷം ഒന്നും പറയുന്നില്ലല്ലോ. സോണിയാ ഗാന്ധിയെ അറസ്റ്റ് ചെയ്ത് ചോദ്യം ചെയ്യണം. വീട് റെയ്ഡ് ചെയ്യണം. വീട്ടില് സ്വര്ണം ഉണ്ട്. സോണിയാ ഗാന്ധിയുടെ കയ്യില് സ്വര്ണം കെട്ടിയില്ലേ. അത് ഏത് സ്വര്ണമാണ്. തന്ത്രി എന്തിന് രണ്ട് തവണ അവിടെ പോയി. ആര് കൊണ്ടുപോയി. കോണ്ഗ്രസ് മറുപടി പറയണം’, ശിവന്കുട്ടി പറഞ്ഞു.
