തിരുവനന്തപുരം നഗരസഭ ബിജെപി കൗൺസിലർ സുഗതനെതിരെ പൊലീസ് രജിസ്റ്റർ ചെയ്തിരിക്കുന്നത് 19 കേസുകൾ

തിരുവനന്തപുരം: തിരുവനന്തപുരം നഗരസഭ വാഴോട്ടുകോണം ബിജെപി കൗൺസിലർ സുഗതനെതിരെ പൊലീസ് രജിസ്റ്റർ ചെയ്തിരിക്കുന്നത് 19 കേസുകൾ. വധശ്രമം ഉൾപ്പെടെയുള്ള ഗുരുതരമായ വകുപ്പുകളാണ് ചുമത്തിരിക്കുന്നത്. സുഗതന്‍റെ അറസ്റ്റിൽ പ്രതിഷേധിച്ച് യുവമോർച്ച പ്രവർത്തകർ വട്ടിയൂർക്കാവ് എസ്എച്ച്ഒയുടെ വീട്ടിലേക്ക് മാർച്ച് നടത്തി.

തിരുവനന്തപുരം നഗരസഭ കൗൺസിലർ സുഗതന്‍റെ അറസ്റ്റിന് പിന്നാലെ പൊലീസ് നടപടിയെ വിമർശിച്ച് ബിജെപി രംഗത്തെത്തിയിരുന്നു. വട്ടിയൂർക്കാവിൽ പൊതുജനങ്ങൾക്ക് വേണ്ടി പൊരുതി നിന്നതിന്‍റെ പേരിലാണ് സുഗതനെതിരെ കേസുകളെന്നായിരുന്നു മുൻ ഡിജിപി ആർ. ശ്രീലേഖ ഫേസ്ബുക്കിൽ കുറിച്ചത്. എന്നാൽ പൊതുജന വിഷയത്തിൽ ഇടപെട്ടുകൊണ്ടുള്ള ഏതെങ്കിലും സമരങ്ങളുടെ പേരിൽ മാത്രമല്ല സുഗതനെതിരെ കേസുകൾ രജിസ്റ്റർ ചെയ്തിട്ടുള്ളതെന്നാണ് വ്യക്തമാവുന്നത്. സുഗതനെതിരെ വട്ടിയൂർക്കാവ് സ്റ്റേഷനിൽ മാത്രം 18 കേസുകൾ ഉണ്ട്. ഒരെണ്ണം നെടുമങ്ങാടും. എല്ലാ കേസുകളിലും സുഗതനാണ് ഒന്നാം പ്രതി.