“വിസ്മയങ്ങൾ വിരിയിച്ച കേരള ബജറ്റുമായി മുഖ്യമന്ത്രി വി.ഡി. സതീശൻ”: ജെയിംസ് കൂടൽ എഴുതുന്നു

“വിസ്മയങ്ങൾ വിരിയിച്ച കേരള ബജറ്റുമായി മുഖ്യമന്ത്രി വി.ഡി. സതീശൻ”: ജെയിംസ് കൂടൽ

ജെയിംസ് കൂടൽ

തറവാട്ടിലെ കരുക്കൾ ഒടിഞ്ഞുതുടങ്ങിയിട്ടും പഴയ മഹിമയുടെ കഥകൾ മാത്രം പറഞ്ഞ് ആശ്വാസം പകരുന്ന കാരണവന്മാരുണ്ട്. എന്നാൽ, വരവും ചെലവും കൃത്യമായി കണക്കുകൂട്ടി, യാഥാർഥ്യങ്ങൾ കുടുംബാംഗങ്ങളിൽനിന്ന് മറച്ചുവയ്ക്കാതെ, ഭാവിയിലേക്കുള്ള പുതിയ വഴികൾ കണ്ടെത്തുന്നവരാണ് യഥാർഥ ഗൃഹനാഥന്മാർ. ആ അർഥത്തിൽ, മുഖ്യമന്ത്രിയും ധനമന്ത്രിയുമായ വി.ഡി. സതീശൻ അവതരിപ്പിച്ച 2026-27 ലെ പുതുക്കിയ ബജറ്റ് കേരളത്തിന്റെ സാമ്പത്തിക യാഥാർഥ്യങ്ങളെ തുറന്നുപറയുന്നതിനൊപ്പം പുതിയ പ്രതീക്ഷകൾക്ക് വഴിതെളിക്കുന്ന ധനരേഖയാണ്.

പ്രവാസി വരുമാനത്തെ മാത്രം ആശ്രയിച്ചിരുന്ന സമ്പദ്‌വ്യവസ്ഥയിൽനിന്ന് നിക്ഷേപ-വിജ്ഞാന അധിഷ്ഠിത വളർച്ചയിലേക്കുള്ള മാറ്റത്തിനാണ് “ന്യൂ ഏജ് കേരളം” എന്ന കാഴ്ചപ്പാടിലൂടെ ബജറ്റ് ഊന്നൽ നൽകുന്നത്. തിരഞ്ഞെടുപ്പ് വാഗ്ദാനങ്ങൾ നിറവേറ്റാനും അടിസ്ഥാന സൗകര്യ വികസനത്തിനുമായി ₹14,500 കോടി അധികമായി വകയിരുത്തിയിട്ടും ധനക്കമ്മി ജിഎസ്‍ഡിപിയുടെ 3.45 ശതമാനമായി നിയന്ത്രിച്ചിരിക്കുന്നത് സാമ്പത്തിക അച്ചടക്കത്തിന്റെ സൂചനയാണ്. സംസ്ഥാനത്തിന്റെ സ്വന്തം നികുതി വരുമാനം ₹1.2 ലക്ഷം കോടിയായി ഉയരുമെന്ന പ്രതീക്ഷയും കേന്ദ്ര വിഹിതത്തിലെ വർധനവും പുതിയ ആത്മവിശ്വാസം പകരുന്നു.

വിഴിഞ്ഞം തുറമുഖത്തെ ആസ്പദമാക്കി “മിഷൻ സമുദ്ര” പദ്ധതിക്ക് ₹400 കോടി അനുവദിച്ചതിലൂടെ തുറമുഖാധിഷ്ഠിത സമ്പദ്‌വ്യവസ്ഥയുടെ പുതിയ അധ്യായത്തിനാണ് തുടക്കമാകുന്നത്. റോഡ് നവീകരണത്തിനായി റെക്കോർഡ് ₹5,952 കോടി, വ്യോമയാന-ലോജിസ്റ്റിക് ഹബ്ബുകൾക്കായി ₹200 കോടി, ഹരിത ഹൈഡ്രജൻ, ഗ്രീൻ അമോണിയ, പമ്പ്ഡ് സ്റ്റോറേജ് പദ്ധതികൾക്കായി ₹1,284.75 കോടി, അപൂർവ ധാതു-ക്രിട്ടിക്കൽ മിനറൽ കോറിഡോറിനായി ₹100 കോടി എന്നിവ കേരളത്തെ വ്യവസായ നിക്ഷേപങ്ങളുടെ കേന്ദ്രമാക്കി മാറ്റാനുള്ള ശ്രമത്തിന്റെ ഭാഗമാണ്.

യു.ഡി.എഫിന്റെ ജനകീയ വാഗ്ദാനങ്ങൾ ബജറ്റിൽ പ്രതിഫലിക്കുന്നതും ശ്രദ്ധേയമാണ്. സ്ത്രീകൾക്കും ട്രാൻസ്‌ജെൻഡർ വിഭാഗങ്ങൾക്കും സാധാരണ കെ.എസ്.ആർ.ടി.സി ബസുകളിൽ സൗജന്യ യാത്ര ഉറപ്പാക്കുന്ന ഇന്ദിരാ ഗ്യാരന്റി പദ്ധതിക്കായി ₹600 കോടി വകയിരുത്തിയിരിക്കുന്നു. സ്ത്രീസുരക്ഷയ്ക്കായി “മകൾക്കൊപ്പം” പദ്ധതി, വയോജന ക്ഷേമത്തിനായുള്ള സിൽവർ ഇക്കോണമി ആശയം, ആരോഗ്യ മേഖലയിൽ ₹2,074 കോടിയും കേരള ഹെൽത്ത് ആൻഡ് ലൈഫ് സയൻസ് സിറ്റിക്കായി ₹100 കോടിയും അനുവദിച്ചത് ക്ഷേമത്തിനും വികസനത്തിനും ഒരുപോലെ പ്രാധാന്യം നൽകുന്നതിന്റെ തെളിവാണ്.

കേരള നോളജ് വാലിക്ക് ₹100 കോടി, തൊഴിൽ അവസരങ്ങൾ നിരീക്ഷിക്കുന്ന “ജോബ് വാച്ച് ടവർ”, വയനാട് ട്രൈബൽ സർവകലാശാലയ്ക്കായി ₹50 കോടി, സ്വകാര്യ ബഹിരാകാശ സ്റ്റാർട്ടപ്പുകൾക്ക് പ്രോത്സാഹനമായി ₹5 കോടി എന്നിവ വിജ്ഞാന സമ്പദ്‌വ്യവസ്ഥയിലേക്കുള്ള കേരളത്തിന്റെ മുന്നേറ്റത്തെ സൂചിപ്പിക്കുന്നു. നികുതി വെട്ടിപ്പ് തടയാൻ ടാക്സ് ഇന്റലിജൻസ് സെല്ലിനും കിഫ്ബിയുടെ ഘടനാപരമായ പരിഷ്കാരങ്ങൾക്കുമായി വിദഗ്ധ സമിതിക്കും രൂപം നൽകുന്നത് സാമ്പത്തിക ഭരണത്തിൽ കൂടുതൽ സുതാര്യത ലക്ഷ്യമിടുന്നതിന്റെ അടയാളമാണ്.

സ്ത്രീ ശാക്തീകരണം, തൊഴിൽ സൃഷ്ടി, ആരോഗ്യ സുരക്ഷ, വിജ്ഞാനാധിഷ്ഠിത വളർച്ച, അടിസ്ഥാന സൗകര്യ വികസനം എന്നീ അഞ്ച് പ്രധാന യു.ഡി.എഫ് വാഗ്ദാനങ്ങൾക്ക് രൂപം നൽകാനുള്ള ശ്രമം ബജറ്റിലുടനീളം കാണാം. അതുകൊണ്ടുതന്നെ, ഇത് വെറും അക്കങ്ങളുടെ കൂട്ടിച്ചേർക്കലല്ല; കേരളത്തിന്റെ അടുത്ത തലമുറയുടെ സ്വപ്നങ്ങൾക്ക് അടിത്തറ പാകാനുള്ള വികസന രേഖ കൂടിയാണ്.

പൊട്ടിപ്പും തൊങ്ങലും നിറഞ്ഞ പ്രഖ്യാപനങ്ങളല്ല ഈ ബജറ്റിന്റെ ശക്തി. തറവാട്ടിലെ ചുമരുകൾക്ക് വിള്ളൽ വീണപ്പോൾ പഴയ പ്രൗഢി മാത്രം പറഞ്ഞിരുന്നില്ല; അവ പുനർനിർമിക്കാനുള്ള ധൈര്യമാണ് കാണിച്ചത്. അതുകൊണ്ടുതന്നെ, ഈ ബജറ്റ് ഒരു ധനരേഖ മാത്രമല്ല, യാഥാർഥ്യങ്ങളെ അഭിമുഖീകരിച്ചുകൊണ്ട് പ്രതീക്ഷകൾക്ക് പുതിയ ചിറകുകൾ നൽകുന്ന “ന്യൂ ഏജ് കേരള”ത്തിന്റെ പ്രഖ്യാപനപത്രിക കൂടിയാണ്.

വിസ്മയങ്ങൾ വിരിയിച്ച കേരള ബജറ്റ് — വർണക്കടലാസിലെ സ്വപ്നങ്ങളുടെ ആഘോഷമല്ല; യാഥാർഥ്യങ്ങളുടെ മണ്ണിൽ പ്രതീക്ഷയുടെ വിത്തുകൾ പാകുന്ന ധീരമായ കാൽവയ്പ്പ്.