ഫോർട്ട് വർത്ത് പോലീസ് വെടിവെയ്പ്പ്: വാഹനാന്വേഷണത്തിനിടയിൽ പ്രതി കൊല്ലപ്പെട്ടു

പി പി ചെറിയാൻ

ടെക്സസ്: തെക്കൻ ഫോർട്ട് വർത്തിൽ പോലീസുമായുള്ള വാഹനാന്വേഷണത്തിനിടയിൽ ഉണ്ടായ ഏറ്റുമുട്ടലിൽ പ്രതി കൊല്ലപ്പെട്ടു. ഫോർട്ട് വർത്ത് പോലീസ് ചീഫ് എഡി ഗാർസിയയാണ് ഇക്കാര്യം വ്യക്തമാക്കിയത്.

ശനിയാഴ്ച രാത്രി 8 മണിയോടെ സൗത്ത് ഫ്രീവേയുടെ 9000-ാം ബ്ലോക്കിൽ പ്രതിക്കായി പോലീസ് തെരച്ചിൽ നടത്തുന്നതിനിടയിലാണ് സംഭവം. പോലീസിനെ കണ്ട ഉടൻ രക്ഷപ്പെടാൻ ശ്രമിച്ച പ്രതിയെ ഉദ്യോഗസ്ഥർ പിന്തുടർന്നു. തുടർന്ന് അടുത്തെത്തിയ പോലീസിന് നേരെ ഇയാൾ തോക്ക് ചൂണ്ടിയതിനെ തുടർന്നാണ് ആത്മരക്ഷാർത്ഥം പോലീസ് വെടിയുതിർത്തത്.

പ്രായപൂർത്തിയാകാത്ത ആൺകുട്ടിയെ ലൈംഗികമായി പീഡിപ്പിച്ച കേസിൽ പ്രതിയായ ഇയാൾ, തന്റെ ശരീരത്തിലുണ്ടായിരുന്ന നിരീക്ഷണ വാച്ച് (അങ്കിൾ മോണിറ്റർ) അറുത്തുമാറ്റി ഒളിവിൽ പോയയാളാണ്.

വാഹനം പിന്തുടർന്ന് പിടികൂടാൻ ശ്രമിച്ച പോലീസിന് നേരെ പ്രതി കൈത്തോക്കുമായി തിരിയുകയും, തുടർന്ന് പോലീസ് ഉദ്യോഗസ്ഥൻ വെടിയുതിർക്കുകയുമായിരുന്നു. സംഭവസ്ഥലത്തുതന്നെ പ്രതി മരിച്ചു.

കൊല്ലപ്പെട്ട വ്യക്തിയുടെ വിവരങ്ങൾ ഞായറാഴ്ച രാവിലെയോടെ പോലീസ് പുറത്തുവിട്ടിട്ടില്ല. വരുന്ന ആഴ്ചകളിൽ നടക്കുന്ന വാർത്താസമ്മേളനത്തിൽ സംഭവവുമായി ബന്ധപ്പെട്ട കൂടുതൽ വിവരങ്ങൾ ഔദ്യോഗികമായി അറിയിക്കുമെന്ന് പോലീസ് അറിയിച്ചു.