ചിക്കാഗോ: ചിക്കാഗോ സേക്രഡ് ഹാർട്ട് ക്നാനായ കത്തോലിക്കാ ഫൊറോനാ ഇടവകയുടെ ഇരുപതാം വാർഷികാഘോഷങ്ങളോടനുബന്ധിച്ച് ‘അബ്രഹാമിൻ ഗദ്ഗദം’ എന്ന ക്രിസ്തീയ ഭക്തിഗാന വീഡിയോ ആൽബത്തിന്റെ ഔപചാരിക പ്രകാശനം നടന്നു.
അജിത്ത് ബേബിയുടെ വോയ്സ് ഓഫ് ആഡം -ന്റെ സഹകരണത്തോടെ അനിൽ മറ്റത്തിക്കുന്നേൽ നേതൃത്വം നൽകുന്ന ജേക്കബ് മീഡിയാ ഓഫ് ചിക്കാഗോ അവതരിപ്പിക്കുന്ന ഈ ഗാനത്തിന്റെ രചന നിർവഹിച്ചിരിക്കുന്നത് ജോബി ഓളിയിൽ ആണ്. അനിൽ മറ്റത്തിക്കുന്നേൽ സംഗീതസംവിധാനം നിർവഹിച്ചിരിക്കുന്ന ഗാനം സജി മാലിത്തിരുത്തേലും പ്രശസ്ത പിന്നണി ഗായിക എലിസബത്ത് രാജുവും ചേർന്നാണ് ആലപിച്ചിരിക്കുന്നത്.
കല്ലറ ഓളിയിൽ പരേതനായ കെ. കെ. എബ്രഹാമിന്റെ 17-ാം ചരമവാർഷികത്തോടനുബന്ധിച്ച് അദ്ദേഹത്തിന്റെ സ്മരണയ്ക്കായാണ് ഈ ഗാനം നിർമ്മിച്ചിരിക്കുന്നത്. കെ. കെ. എബ്രഹാമിന്റെ ഭാര്യ തങ്കമ്മ എബ്രഹാമിൽ നിന്ന് ഗാനത്തിന്റെ പോസ്റ്റർ ഏറ്റുവാങ്ങിക്കൊണ്ട്, സെന്റ് തോമസ് സീറോ മലബാർ രൂപത വികാരി ജനറലും ക്നാനായ റീജിയൺ ഡയറക്ടറുമായ മോൺ. തോമസ് മുളവനാലും, സേക്രഡ് ഹാർട്ട് ക്നാനായ കത്തോലിക്കാ ഫൊറോനാ ഇടവക വികാരി ഫാ. എബ്രഹാം കളരിക്കലും ചേർന്ന് ഔപചാരിക പ്രകാശനകർമ്മം നിർവഹിച്ചു.
സേക്രഡ് ഹാർട്ട് ക്നാനായ ഇടവകാംഗമായ ജോബി ഓളിയിൽ രചിച്ച ഗാനം, ഇടവകയുടെ ഗായകസംഘത്തിന് ദീർഘകാലമായി നേതൃത്വം നൽകിവരുന്ന സജി മാലിത്തിരുത്തേൽ പ്രശസ്ത ഗായിക എലിസബത്ത് രാജുവിനൊപ്പം ആലപിക്കുമ്പോൾ, അത് സേക്രഡ് ഹാർട്ട് ക്നാനായ കത്തോലിക്കാ ഇടവകയ്ക്കും സമൂഹത്തിനും അഭിമാനകരമായ നിമിഷമാണെന്ന് ഫാ. എബ്രഹാം കളരിക്കൽ പറഞ്ഞു.
ചിക്കാഗോ ക്നാനായ സമൂഹത്തിന്റെ ഭാഗമായ അനിൽ മറ്റത്തിക്കുന്നേൽ സംഗീതസംവിധാനം നിർവഹിക്കുന്ന ആറാമത്തെ ഗാനമാണിത്. മുൻ ഗാനങ്ങളെപ്പോലെ തന്നെ ഈ ഗാനവും സംഗീതാസ്വാദകരുടെയും വിശ്വാസിസമൂഹത്തിന്റെയും ശ്രദ്ധ നേടുമെന്ന പ്രതീക്ഷ മോൺ. തോമസ് മുളവനാൽ പങ്കുവച്ചു.
ഗാനത്തിന്റെ ഓർക്കസ്ട്രേഷൻ പ്രദീപ് ടോം നിർവഹിച്ചിരിക്കുന്നു. റെക്കോർഡിംഗ് ബെന്നി തോമസ് – Ben Studio, Chicago, കൂടാതെ CAC, Kochi എന്നിവിടങ്ങളിലായാണ് പൂർത്തിയാക്കിയത്.
സേക്രഡ് ഹാർട്ട് ക്നാനായ കത്തോലിക്കാ ഫൊറോനാ ഇടവക, ചിക്കാഗോയും സെന്റ് തോമസ് ക്നാനായ കത്തോലിക്കാ ഇടവക, കല്ലറയും പശ്ചാത്തലമാക്കി ഒരുക്കിയ വീഡിയോയുടെ ചിത്രീകരണം ജോബി ചെറുപച്ചിക്കരയും സാജു വർഗീസും ചേർന്ന് നിർവഹിച്ചു. വീഡിയോ എഡിറ്റിംഗ് ജോബി ചെറുപച്ചിക്കരയും ഡിസൈൻ Astraയും നിർവഹിച്ചിരിക്കുന്നു.
ഈ ഗാനത്തിന്റെ നിർമ്മാണത്തിന് പിന്തുണയും ആശംസകളും നൽകിയ മോൺ. തോമസ് മുളവനാൽ, ഫാ. എബ്രഹാം കളരിക്കൽ, കല്ലറ സെന്റ് തോമസ് ക്നാനായ കത്തോലിക്കാ ഇടവക വികാരി ഫാ. പ്രിൻസ് മുളകുമറ്റത്തിൽ എന്നിവർക്കും പിന്നണിയിൽ പ്രവർത്തിച്ച എല്ലാവർക്കും അണിയറ പ്രവർത്തകർ നന്ദി അറിയിച്ചു.
Voice of Adam ഡയറക്ടർ അജിത്ത് ബേബിയുടെ നേതൃത്വത്തിൽ പുറത്തിറങ്ങുന്ന Living With Christ – എന്ന ആൽബത്തിന്റെ ഭാഗമായി ആയ ‘അബ്രഹാമിൻ ഗദ്ഗദം’ സെപ്റ്റംബർ അവസാനത്തോടെ Voice of Adam YouTube ചാനലിലൂടെ പ്രേക്ഷകരിലേക്ക് എത്തുമെന്ന് അജിത്ത് ബേബി അറിയിച്ചു.
Leave a Comment
Your comment will be visible after admin approval.