പി.പി ചെറിയാൻ
വാഷിംഗ്ടൺ: പശ്ചിമേഷ്യയിലെ സംഘർഷം ലഘൂകരിക്കാൻ ഇറാന് മുന്നിൽ കർശന ഉപാധികൾ വെച്ച് യുഎസ് പ്രസിഡന്റ് ഡൊണാൾഡ് ട്രംപ്. ഇറാൻ ആണവ പദ്ധതികൾ പൂർണ്ണമായും ഉപേക്ഷിക്കണമെന്നും പ്രാദേശിക തീവ്രവാദ ഗ്രൂപ്പുകൾക്കുള്ള പിന്തുണ പിൻവലിക്കണമെന്നുമാണ് ട്രംപിന്റെ പ്രധാന ആവശ്യം.
ഇറാൻ നിലപാടിൽ മാറ്റം വരുത്താത്തതിനെത്തുടർന്ന് സമാധാന ചർച്ചകൾ അനിശ്ചിതത്വത്തിലായി. അമേരിക്കയുടെ നാവിക ഉപരോധം ഇറാന്റെ സമ്പദ്വ്യവസ്ഥയെ ബാധിച്ചിട്ടുണ്ടെങ്കിലും വിട്ടുവീഴ്ചക്കില്ലെന്നാണ് ഇറാന്റെ നിലപാട്.
സംഘർഷം കടുത്തതോടെ ആഗോള വിപണിയിൽ എണ്ണവില ബാരലിന് 107 ഡോളർ കടന്നു. ഹോർമുസ് കടലിടുക്കിലെ സുരക്ഷാ ഭീഷണിയെത്തുടർന്ന് ഇന്ധന വിതരണം തടസ്സപ്പെട്ടത് വികസ്വര രാജ്യങ്ങളെ വലിയ പ്രതിസന്ധിയിലാക്കിയിട്ടുണ്ട്.
ഇറാന്റെ ഭാഗത്തുനിന്ന് അനുകൂല നടപടികൾ ഉണ്ടാകാതെ ഉപരോധത്തിൽ ഇളവ് നൽകില്ലെന്ന് ട്രംപ് വ്യക്തമാക്കി. വരും ദിവസങ്ങളിൽ സഖ്യകക്ഷികളുമായി ചേർന്ന് കൂടുതൽ കർശന നടപടികളിലേക്ക് നീങ്ങാനാണ് അമേരിക്കയുടെ തീരുമാനം.
ഒമാനും പാകിസ്ഥാനും മധ്യസ്ഥശ്രമങ്ങൾ നടത്തുന്നുണ്ടെങ്കിലും മേഖലയിലെ അനിശ്ചിതത്വം തുടരുകയാണ്.
