ജെയിംസ് കൂടൽ
കേരളം തന്റെ രാഷ്ട്രീയ ചരിത്രത്തിലെ നിർണ്ണായക ഘട്ടത്തിലൂടെ കടന്നുപോകുമ്പോൾ, വീണ്ടും ശക്തമായി ഉയരുന്ന ഒരു പേരാണ് രമേശ് ചെന്നിത്തലയുടേത്. കോൺഗ്രസ് പ്രസ്ഥാനത്തിന്റെ കരുത്തുറ്റ ശബ്ദമായ അദ്ദേഹം, ഹരിപ്പാട്ടിൽ നിന്ന് വീണ്ടും ജനവിധി തേടുമ്പോൾ, രാഷ്ട്രീയ വേദികളിൽ ഉയരുന്ന പ്രധാന ചോദ്യങ്ങളുമായി
ഗ്ലോബൽ ഇന്ത്യൻ മാനേജിംഗ് എഡിറ്റർ
ജെയിംസ് കൂടൽ എത്തുന്നു. ഗ്ലോബൽ ഇന്ത്യൻ ന്യൂസ് ഒരുക്കുന്ന “ഫേസ് ടു ഫേസ്” അഭിമുഖത്തിൽ, തന്റെ രാഷ്ട്രീയ യാത്രയും നിലവിലെ രാഷ്ട്രീയ സാഹചര്യങ്ങളും കേരളത്തിന്റെ ഭാവിയും അദ്ദേഹം തുറന്നു പറയുന്നു.
ഫേസ് ടു ഫേസ് അഭിമുഖം
രാഷ്ട്രീയത്തിലേക്കുള്ള നിങ്ങളുടെ യാത്ര എങ്ങനെ ആരംഭിച്ചു?
ആദ്യ കാലത്ത് രാഷ്ട്രീയത്തിൽ വലിയ താൽപ്പര്യമുണ്ടായിരുന്നില്ല. എന്നാൽ ജീവിതം എന്നെ പൊതുപ്രവർത്തനത്തിലേക്ക് നയിച്ചു. വിദ്യാർത്ഥിയായിരുന്ന കാലത്ത് ‘ഓണത്തിനു ഒരു പറ നെല്ല്’ എന്ന പ്രവർത്തനം ഒരു വഴിത്തിരിവായി. അത് രാഷ്ട്രീയം അല്ല, മനുഷ്യസ്നേഹമാണ് എന്നെ പ്രചോദിപ്പിച്ചത്. അതാണ് പിന്നീട് എന്റെ രാഷ്ട്രീയ ജീവിതത്തിന് അടിസ്ഥാനമായത്
കേരളത്തിൽ കോൺഗ്രസിന്റെ നിലവിലെ സ്ഥിതി നിങ്ങൾ എങ്ങനെ വിലയിരുത്തുന്നു?
കോൺഗ്രസ് ഇന്ന് വലിയ മുന്നേറ്റമാണ് നടത്തിയിരിക്കുന്നത്. സ്ഥാനാർത്ഥി നിർണ്ണയം കാര്യക്ഷമമായി പൂർത്തിയായി. ശക്തമായ സ്ഥാനാർത്ഥികളാണ് നാം രംഗത്തിറക്കിയിരിക്കുന്നത്. ജനമനോഭാവം വ്യക്തമായി യുഡിഎഫിന് അനുകൂലമാണ്. വിജയത്തിൽ സംശയമില്ല.”
യുഡിഎഫിൽ മത സ്വാധീനമുണ്ടെന്ന വിമർശനങ്ങൾക്കെതിരെ നിങ്ങളുടെ പ്രതികരണം?
“അതിലാണ് യുഡിഎഫിന്റെയും എൽഡിഎഫിന്റെയും വ്യത്യാസം. യുഡിഎഫിൽ എല്ലാവർക്കും അഭിപ്രായം പറയാനുള്ള സ്വാതന്ത്ര്യമുണ്ട് — മത, സാമൂഹിക നേതാക്കൾക്കുൾപ്പെടെ. എന്നാൽ അന്തിമ തീരുമാനം പാർട്ടിയാണ് എടുക്കുന്നത്. ആ തുറന്ന നിലപാടാണ് ഞങ്ങളുടെ ശക്തി.”
കർഷകരുടെ പ്രശ്നങ്ങളും മനുഷ്യ-വന്യജീവി സംഘർഷവും?
ഇന്ന് ഏറ്റവും കൂടുതൽ ബുദ്ധിമുട്ട് അനുഭവിക്കുന്നത് കർഷകരാണ്. മനുഷ്യ-വന്യജീവി സംഘർഷം ഗൗരവമുള്ള വിഷയമാണ്. കേന്ദ്ര-സംസ്ഥാന തലങ്ങളിൽ ഏകോപിതമായ ഇടപെടലും പ്രായോഗികമായ പരിഹാരങ്ങളും ആവശ്യമാണ്.
ഇത്തവണ ഭരണമാറ്റം സംഭവിക്കുമോ?
“കേരളത്തിലെ ജനങ്ങൾ ശക്തമായി മാറ്റം ആഗ്രഹിക്കുന്നു. അവർ നിരാശയിലും അവഗണനയിലും കഴിയുകയാണ്. യുഡിഎഫ് ഐക്യത്തോടെ മുന്നോട്ട് പോയാൽ വിജയം ഉറപ്പാണ്. ഈ തിരഞ്ഞെടുപ്പ് ജനങ്ങളുടെ വികാരങ്ങളുടെ പ്രതിഫലനമാണ്.”
കോൺഗ്രസിലെ സഹപ്രവർത്തകരുമായുള്ള ബന്ധം എങ്ങനെ കാണുന്നു?
“എനിക്ക് കെ. സുധാകരൻ എന്റെ ഏറ്റവും അടുത്ത സുഹൃത്താണ്. കെ.സി. വേണുഗോപാലും വി.ഡി. സതീശനും എന്റെ ചെറുപ്പക്കാരായ സഹോദരന്മാരെ പോലെ ആണ്. കോൺഗ്രസിന്റെ ശക്തി ഈ ഐക്യത്തിലാണ്.
ശശി തരൂർ കോൺഗ്രസിൽ ചെലുത്തുന്ന സ്വാധീനം?
“കോൺഗ്രസ് ഒരു ജനാധിപത്യ പാർട്ടിയാണ്. വ്യത്യസ്ത അഭിപ്രായങ്ങളെ ആദരിക്കുന്ന സംസ്കാരമാണ്. ശശി തരൂർ ഒരു കഴിവുള്ള നേതാവാണ്. പാർട്ടി ഘടനയ്ക്കുള്ളിൽ നിന്നാണ് അദ്ദേഹം പ്രവർത്തിക്കേണ്ടത്.
ഡിജിറ്റൽ, സൈബർ രാഷ്ട്രീയ പ്രചാരണത്തിന്റെ പ്രാധാന്യം?
“ഇന്ന് രാഷ്ട്രീയ പോരാട്ടങ്ങൾ വലിയ തോതിൽ ഡിജിറ്റൽ പ്ലാറ്റ്ഫോമുകളിലാണ് നടക്കുന്നത്. അതിനാൽ സൈബർ വിങ് ശക്തിപ്പെടുത്തേണ്ടത് അനിവാര്യമാണ്. അതിനായി ഞങ്ങൾ ഇതിനകം നടപടികൾ സ്വീകരിച്ചു, അതിന്റെ ഫലം കണ്ടുതുടങ്ങിയിട്ടുണ്ട്.”
താങ്കളാണോ മുഖ്യമന്ത്രിസ്ഥാനാർത്ഥി?
“അതെല്ലാം പാർട്ടിയും യുഡിഎഫും തീരുമാനിക്കേണ്ട കാര്യമാണ്. ഞാൻ ഒരിക്കലും അധികാരം തേടിയിട്ടില്ല. എന്റെ ശക്തി പാർട്ടിയും ജനങ്ങളുമാണ്.”
