പാശ്ചാത്യ മാധ്യമങ്ങളുടെ അടിച്ചമർത്തൽ ശക്തമാക്കുന്നതിന്റെ ഭാഗമായി പാശ്ചാത്യ നിർമ്മിത സിനിമകളും ടിവി പ്രോഗ്രാമുകളും കാണുന്നത് വിലക്കിയിരിക്കുകയാണ് കിം ജോങ് ഉൻ ഭരിക്കുന്ന ഉത്തര കൊറിയ. കുട്ടികൾ ഹോളിവുഡ് സിനിമകൾ കണ്ടാൽ മാതാപിതാക്കളെ ശിക്ഷിക്കുമെന്നാണ് പുതിയ നിയമം എന്ന് രാജ്യത്തെ വൃത്തങ്ങൾ റേഡിയോ ഫ്രീ ഏഷ്യയോട് പറഞ്ഞു.
പുതിയ ചട്ടം അനുസരിച്ച്, വിദേശ സിനിമകൾ കാണുമ്പോൾ പിടിക്കപ്പെടുന്ന കുട്ടികളുടെ രക്ഷിതാക്കളെ ആറ് മാസത്തേക്ക് ലേബർ ക്യാമ്പുകളിലേക്ക് വിടും. കുട്ടികൾക്ക് അഞ്ച് വർഷം തടവും ലഭിക്കും. കുട്ടികൾ ഹോളിവുഡ് സിനിമകൾ കാണുന്നത് പിടിക്കപ്പെട്ടാൽ മുമ്പ് മാതാപിതാക്കൾക്ക് മുന്നറിയിപ്പ് നൽകുമായിരുന്നു. എന്നാൽ, ഇത്തവണ പാശ്ചാത്യ സംസ്‌കാരത്തിന് അടിമപ്പെടുന്ന കുട്ടികളുള്ള മാതാപിതാക്കളോട് ഒരു ദയയും കാണിക്കില്ല എന്നാണ് പുതിയ നിയമം.
ഉത്തര കൊറിയയിലെ യുവജനങ്ങൾ മറ്റ് രാജ്യങ്ങളുടെ മൂല്യങ്ങളും മാനദണ്ഡങ്ങളും തുറന്നുകാട്ടുന്നു എന്ന ഭയത്തിൽ നിന്നാണ് ഈ അടിച്ചമർത്തൽ. അതിർത്തി കടന്ന് പാശ്ചാത്യ മാധ്യമങ്ങളെ കടത്തുന്നത് വധശിക്ഷയിലൂടെ പോലും ശിക്ഷിക്കപ്പെടാം.
