ജോഹന്നാസ്ബര്ഗ്: ഓസ്ട്രേലിയ-കാനഡ-ഇന്ത്യ സാങ്കേതിക സഹകരണ കൂട്ടായ്മ പ്രഖ്യാപിച്ച് പ്രധാനമന്ത്രി നരേന്ദ്ര മോദി. ജോഹന്നാസ്ബര്ഗില് നടക്കുന്ന ജി20 ഉച്ചകോടിക്കിടെ ഓസ്ട്രേലിയന് പ്രധാനമന്ത്രി ആന്റണി അല്ബനീസുമായും കനേഡിയന് പ്രധാനമന്ത്രി മാര്ക്ക് കാര്ണിയുമായി നടത്തിയ ചർച്ചയ്ക്ക് ശേഷമാണ് പ്രധാനമന്ത്രിയുടെ പ്രഖ്യാപനം.
മൂന്ന് ഭൂഖണ്ഡങ്ങളിലുമുള്ള ജനാധിപത്യ ശക്തികള് തമ്മിലുള്ള സഹകരണം വര്ധിപ്പിക്കുന്നതാകും ഈ സംരംഭമെന്ന് മോദി എക്സിൽ കുറിച്ചു. ഉയര്ന്നുവരുന്ന സാങ്കേതികവിദ്യകള്, വിതരണ ശൃംഖലകളുടെ വൈവിധ്യവല്ക്കരണത്തിനുള്ള പിന്തുണ, ക്ലീൻ എനർജി, എഐയുടെ ബഹുജന സ്വീകാര്യത തുടങ്ങിയ വിഷയങ്ങളില് ശ്രദ്ധയൂന്നിയാകും പുതിയ സംരംഭം പ്രവര്ത്തിക്കുകയെന്നും പ്രധാനമന്ത്രി പറഞ്ഞു.
ഡ്രഗ്-ടെറര് നെക്സസ് (ലഹരി-ഭീകരവാദ ബന്ധം) ചെറുക്കുന്നതിനായി ഒരു പ്രത്യേക ജി20 സംരംഭത്തിനും അദ്ദേഹം ആഹ്വാനം ചെയ്തു. ലഹരിമരുന്ന് കടത്ത് ശൃംഖലകളെ തകര്ക്കുക, നിയമവിരുദ്ധമായ പണത്തിന്റെ ഒഴുക്ക് ഇല്ലാതാക്കുക, ഭീകരവാദ ഗ്രൂപ്പുകളുടെ ധനസഹായത്തിന്റെ പ്രധാന ഉറവിടം ദുര്ബലപ്പെടുത്തുക എന്നിവയില് ശ്രദ്ധ കേന്ദ്രീകരിക്കുന്നതാണ് പദ്ധതി. ജി20 രാജ്യങ്ങള് എല്ലാവരെയും ഉള്ക്കൊള്ളുന്നതും സുസ്ഥിരവും നാഗരിക വിജ്ഞാനത്തില് വേരൂന്നിയതുമായ മാതൃകകള് സ്വീകരിക്കണമെന്ന് പ്രധാനമന്ത്രി ഉച്ചകോടിയുടെ ഉദ്ഘാടന സമ്മേളനത്തില് പറഞ്ഞു. അറിവ്, വൈദഗ്ധ്യം, സുരക്ഷ എന്നിവയിലെ സഹകരണം പുനക്രമീകരിക്കാന് ലക്ഷ്യമിട്ടുള്ള മൂന്ന് പ്രധാന നിര്ദ്ദേശങ്ങളും പ്രധാനമന്ത്രി മുന്നോട്ടുവച്ചു.
