തിരുവനന്തപുരം: ഇന്ന് ഓശാന പെരുന്നാൾ. യേശുക്രിസ്തുവിന്റെ ജെറുസലേം പ്രവേശനത്തെ അനുസ്മരിച്ച് ലോകമെമ്പാടുമുള്ള ക്രിസ്ത്യാനികൾ ഇന്ന് ഓശാന പെരുന്നാൾ ആചരിക്കുന്നു. സംസ്ഥാനത്തെ എല്ലാ ക്രൈസ്തവ ദേവാലയങ്ങളിലും രാവിലെ മുതൽ കുരുത്തോല പ്രദക്ഷിണം അടക്കമുള്ള ചടങ്ങുകൾ ഉണ്ടാവും.
ഇന്നുമുതൽ ഒരാഴ്ച ക്രൈസ്തവ സമൂഹത്തെ സംബന്ധിച്ച് വിശുദ്ധ വാരാചരണത്തിനും തുടക്കമാകും. ഓർത്തഡോക്സ് സഭ അധ്യക്ഷൻ മാത്യൂസ് തൃതീയൻ കാതോലിക്ക ബാവ കോട്ടയം പാമ്പാടി ദയറായിൽ ഓശാന ശുശ്രൂഷകൾക്ക് നേതൃത്വം നൽകും. യാക്കോബായ സഭയുടെ ജോസഫ് പ്രഥമൻ ബാവ കോട്ടയം പൊൻപള്ളി പള്ളിയിൽ ഓശാന ശുശ്രൂഷകളിൽ പങ്കെടുക്കും.
