കാലിഫോർണിയ ഉപഭോക്തൃ സംരക്ഷണ ഏജൻസി തലവനായി രോഹിത് ചോപ്രയെ ഗവർണർ നിയമിച്ചു

പി.പി ചെറിയാൻ

സാൻ ഫ്രാൻസിസ്കോ: കാലിഫോർണിയയിൽ പുതുതായി രൂപീകരിച്ച ഉപഭോക്തൃ സംരക്ഷണ ഏജൻസിയുടെ തലവനായി ഇന്ത്യൻ വംശജനായ രോഹിത് ചോപ്രയെ ഗവർണർ ഗാവിൻ ന്യൂസം നിയമിച്ചു. ഫെഡറൽ കൺസ്യൂമർ ഫിനാൻഷ്യൽ പ്രൊട്ടക്ഷൻ ബ്യൂറോയുടെ മുൻ ഡയറക്ടറായിരുന്നു ഇദ്ദേഹം.

ജൂലൈ 1-ന് പ്രവർത്തനം ആരംഭിക്കുന്ന ‘കാലിഫോർണിയ ബിസിനസ് ആൻഡ് കൺസ്യൂമർ സർവീസസ് ഏജൻസി’യുടെ പ്രഥമ സെക്രട്ടറിയായാകും ചോപ്ര ചുമതലയേൽക്കുക.

സെനറ്റർ എലിസബത്ത് വാറന്റെ ശിഷ്യനായ ചോപ്രയെ കഴിഞ്ഞ വർഷം പ്രസിഡന്റ് ഡൊണാൾഡ് ട്രംപ് ഫെഡറൽ സ്ഥാനത്തുനിന്ന് നീക്കിയിരുന്നു. ബാങ്കുകൾക്കും വൻകിട ടെക് കമ്പനികൾക്കുമെതിരെ ശക്തമായ നിലപാടുകൾ സ്വീകരിക്കുന്ന വ്യക്തിയാണ് ഇദ്ദേഹം.

ഫെഡറൽ തലത്തിൽ ഉപഭോക്തൃ നിയമങ്ങളിൽ മാറ്റം വരുന്ന സാഹചര്യത്തിൽ, കാലിഫോർണിയയിലെ സാധാരണക്കാരുടെയും ചെറുകിട വ്യാപാരികളുടെയും താൽപ്പര്യങ്ങൾ സംരക്ഷിക്കാനാണ് ഈ നീക്കമെന്ന് ഗവർണർ പറഞ്ഞു. ചോപ്രയെ ‘ശക്തനും നിർഭയനുമായ’ നേതാവെന്നാണ് അദ്ദേഹം വിശേഷിപ്പിച്ചത്.

കുടുംബങ്ങളെയും ചെറുകിട ബിസിനസ്സുകളെയും ചൂഷണങ്ങളിൽ നിന്ന് സംരക്ഷിക്കുന്നതിൽ കാലിഫോർണിയ വിട്ടുവീഴ്ച ചെയ്യില്ലെന്ന് നിയമനത്തിന് പിന്നാലെ ചോപ്ര പ്രതികരിച്ചു.