ന്യൂഡൽഹി: ജന്തർ മന്തറിൽ പ്രതിഷേധിച്ചതിനെ തുടർന്ന് ഒരാഴ്ചയായി തിഹാർ ജയിലിൽ കഴിയുകയായിരുന്ന കോക്രോച്ച് ജനതാ പാർട്ടി (സി.ജെ.പി) നേതാക്കളായ സൗരവ് ദാസിനെയും അശുതോഷ് റങ്കയെയും മോചിപ്പിക്കാൻ പ്രത്യേക എക്സിക്യൂട്ടീവ് മജിസ്‌ട്രേറ്റ് ഉത്തരവിട്ടു. ഇരുവരുടെയും ജാമ്യവ്യവസ്ഥകൾ അംഗീകരിച്ചതോടെയാണ് മോചനത്തിന് വഴിയൊരുങ്ങിയത്.
അനുമതിയില്ലാതെ പ്രതിഷേധം നിരോധിച്ച ജന്തർ മന്തർ മേഖലയിലേക്ക് കടന്നുകയറി ദേശീയപതാക വീശുകയും മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് മുദ്രാവാക്യം വിളിക്കുകയും ചെയ്തെന്ന കേസിലാണ് ഇരുവരെയും ഒക്ടോബർ 14ന് ജുഡീഷ്യൽ കസ്റ്റഡിയിൽ വിട്ടത്. സമാധാനവും ക്രമസമാധാനവും നിലനിർത്തുന്നതിനായി നേരത്തേ നൽകിയ ബോണ്ട് ലംഘിച്ചെന്ന ആരോപണവും ഇവർക്കെതിരെയുണ്ടായിരുന്നു.
ഒക്ടോബർ 19ന് ഇവരുടെ കസ്റ്റഡി രണ്ട് ദിവസത്തേക്ക് കൂടി നീട്ടിയിരുന്നു. തിരഞ്ഞെടുപ്പ് പട്ടികയുടെ പ്രത്യേക തീവ്ര പരിഷ്‌കരണവുമായി ബന്ധപ്പെട്ട ക്രമക്കേടുകൾ ആരോപിച്ചാണ് സി.ജെ.പിയും മറ്റ് സംഘടനകളും പ്രതിഷേധം നടത്തിവരുന്നത്. തിരഞ്ഞെടുപ്പ് കമ്മീഷൻ പക്ഷപാതം കാണിച്ചെന്ന ആരോപണം നിഷേധിച്ചിട്ടുണ്ട്.
Leave a Comment
Your comment will be visible after admin approval.