പ്രശസ്ത ക്ലാസിക്കൽ നർത്തകരെ അണിനിരത്തി മൽഹാർ അനന്ത ആർട്സ് ഫെസ്റ്റിവൽ; കലാസന്ധ്യ ഒക്ടോബർ 25ന്

ചിക്കാഗോ: ഇന്ത്യൻ ക്ലാസിക്കൽ കലാപാരമ്പര്യത്തിന്റെ സമ്പന്നതയും വൈവിധ്യവും ലോകപ്രശസ്തരായ നർത്തകരിലൂടെ പുതുതലമുറയ്ക്കും കലാസ്വാദകർക്കും പരിചയപ്പെടുത്തുക എന്ന ലക്ഷ്യത്തോടെ മൽഹാർ ഡാൻസ് കമ്പനി സംഘടിപ്പിക്കുന്ന മൽഹാർ അനന്ത ആർട്സ് ഫെസ്റ്റിവൽ 2026 ഒക്ടോബർ 25 ഞായറാഴ്ച ഉച്ചകഴിഞ്ഞ് 3 മണിക്ക് സൈകമോർ ഹൈസ്കൂളിൽ നടക്കും. അമേരിക്കയിലെ കലാസ്വാദകർക്ക് ഇന്ത്യയുടെ തനത് ക്ലാസിക്കൽ നൃത്തരൂപങ്ങൾ ആസ്വദിക്കാനുള്ള അപൂർവ അവസരമായിരിക്കും ഈ കലോത്സവം.

പ്രശസ്ത മോഹിനിയാട്ടം നർത്തകി ഡോ. നീന പ്രസാദും പ്രശസ്ത കുച്ചിപ്പുടി നർത്തകി ശ്രീലക്ഷ്മി ഗോവർധനനുമാണ് ഫെസ്റ്റിവലിലെ മുഖ്യ കലാകാരികൾ. ഇന്ത്യയുടെ രണ്ട് പ്രധാന ക്ലാസിക്കൽ നൃത്തരൂപങ്ങളായ മോഹിനിയാട്ടവും കുച്ചിപ്പുടിയും ഒരേ വേദിയിൽ അവതരിപ്പിക്കാൻ കഴിയുന്നതിൽ അഭിമാനമുണ്ടെന്ന് ഫെസ്റ്റിവലിന്റെ ഡയറക്ടറും ക്യൂറേറ്ററുമായ ശ്രീവിദ്യ വിജയൻ പറഞ്ഞു.

കേന്ദ്ര സംഗീത നാടക അക്കാദമി അവാർഡും നൃത്യകലാനിധി പുരസ്കാരവും നേടിയ ഡോ. നീന പ്രസാദിന്റെ മോഹിനിയാട്ടത്തിന് ഇന്ത്യയിൽ നിന്നുള്ള പ്രമുഖ സംഗീതജ്ഞർ അകമ്പടി നൽകും. ചങ്ങനാശ്ശേരി മാധവൻ നമ്പൂതിരി (വോക്കൽ), കലാമണ്ഡലം അരുൺദാസ് (ഇടയ്ക്ക), ശ്യാം കല്യാൺ (വയലിൻ), രമേഷ് ബാബു (മൃദംഗം) എന്നിവരാണ് സംഗീതാവിഷ്കാരത്തിന് നേതൃത്വം നൽകുന്നത്. മോഹിനിയാട്ടത്തിന്റെ ലാസ്യഭംഗിയും ആവിഷ്കാരമികവും സംഗീതത്തിന്റെ അകമ്പടിയോടെ ആസ്വദിക്കാൻ ഈ അവതരണം അവസരമൊരുക്കും.

ഉസ്താദ് ബിസ്മില്ല ഖാൻ യുവ പുരസ്കാരവും കേരള സംഗീത നാടക അക്കാദമിയുടെ കലാശ്രീ പുരസ്കാരവും നേടിയ ശ്രീലക്ഷ്മി ഗോവർധനൻ കുച്ചിപ്പുടിയുടെ സവിശേഷമായ ഭാവചലനങ്ങളും നാടകീയതയും സമന്വയിപ്പിച്ചുള്ള കലാവിഷ്കാരം വേദിയിൽ അവതരിപ്പിക്കും. ചലനങ്ങളിലൂടെയും ഭാവങ്ങളിലൂടെയും കഥകൾ അവതരിപ്പിക്കുന്ന കുച്ചിപ്പുടിയുടെ സൗന്ദര്യം പ്രേക്ഷകർക്ക് അടുത്തറിയാൻ ഈ പ്രകടനം സഹായകമാകും.

ഫെസ്റ്റിവലിൽ ശ്രീവിദ്യ വിജയനും വർഷ വിജയനും ചേർന്ന് ഭരതനാട്യവും അവതരിപ്പിക്കും. ഇന്ത്യൻ ക്ലാസിക്കൽ നൃത്തത്തിന്റെ വിവിധ ഭാവങ്ങളും അവതരണശൈലികളും ഒരുമിക്കുന്ന വേദിയായി ഫെസ്റ്റിവൽ മാറുമെന്നാണ് സംഘാടകരുടെ പ്രതീക്ഷ.

“Ananta: The Infinite Cycle of Art, Stories and Expressions” എന്നതാണ് ഈ വർഷത്തെ ഫെസ്റ്റിവലിന്റെ പ്രമേയം. കലയുടെയും കഥകളുടെയും ആവിഷ്കാരങ്ങളുടെയും അനന്തമായ പ്രവാഹത്തെ അടയാളപ്പെടുത്തുന്ന ഈ പ്രമേയത്തിലൂടെ ഇന്ത്യൻ കലാപാരമ്പര്യത്തിന്റെ തുടർച്ചയും സർഗാത്മകതയും പ്രേക്ഷകരിലേക്ക് എത്തിക്കുകയാണ് സംഘാടകരുടെ ലക്ഷ്യം.

മൽഹാർ അനന്ത ആർട്സ് ഫെസ്റ്റിവലിന്റെ ഡയറക്ടറും ക്യൂറേറ്ററുമായി ശ്രീവിദ്യ വിജയനും എക്സിക്യൂട്ടീവ് ഡയറക്ടറായി വർഷ വിജയനും പ്രവർത്തിക്കുന്നു.

വേദി: Sycamore High School, 427 Spartan Trail, Sycamore, Illinois 60178.

തീയതി: 2026 ഒക്ടോബർ 25, ഞായറാഴ്ച.

സമയം: ഉച്ചകഴിഞ്ഞ് 3 മണി.

ഫെസ്റ്റിവലിലേക്കുള്ള ടിക്കറ്റുകൾ www.sycamoretickets.org എന്ന വെബ്സൈറ്റിലൂടെ ലഭ്യമാണ്.