ഇന്ത്യൻ വിസാ ചട്ടങ്ങളിൽ വൻ മാറ്റം; വിസാ വിഭാഗങ്ങൾ 13ൽ നിന്ന് ഒൻപതായി കുറച്ചു, അപേക്ഷാ ഫോമിലെ വിവരങ്ങൾ 70 ശതമാനം വരെ ഒഴിവാക്കി

Global Indian Writer · November 17, 2026 · 1 min read · 0 Comments · 0 Shares

ന്യൂഡൽഹി: വിദേശികൾക്ക് ഇന്ത്യയിലേക്കുള്ള യാത്ര കൂടുതൽ എളുപ്പമാക്കുന്നതിനായി വിസാ ചട്ടങ്ങളിൽ സമഗ്രമായ പരിഷ്കാരങ്ങളുമായി കേന്ദ്ര സർക്കാർ. വിസയുടെ പ്രധാന വിഭാഗങ്ങൾ 13ൽ നിന്ന് ഒൻപതായി കുറച്ചു. ഉപവിഭാഗങ്ങളുടെ എണ്ണം 49ൽ നിന്ന് 23 ആയും ചുരുക്കി. വിസാ അപേക്ഷാ ഫോമുകളിൽ ആവശ്യമായ വിവരങ്ങളുടെ എണ്ണം 65 മുതൽ 70 ശതമാനം വരെ കുറച്ചതായും കേന്ദ്ര ആഭ്യന്തര മന്ത്രാലയം അറിയിച്ചു.

2026 ഓഗസ്റ്റ് 27നാണ് പുതിയ പരിഷ്കാരങ്ങൾ നടപ്പാക്കുന്നതിനുള്ള തീരുമാനം കൈക്കൊണ്ടത്. നവംബർ 11ന് കേന്ദ്ര സർക്കാർ ഇതുസംബന്ധിച്ച വിശദാംശങ്ങൾ പുറത്തുവിട്ടു. വിനോദസഞ്ചാരം, ചികിത്സ, വിദ്യാഭ്യാസം, ഗവേഷണം, നിക്ഷേപം, ബിസിനസ് തുടങ്ങിയ ആവശ്യങ്ങൾക്കായി ഇന്ത്യയിലെത്തുന്ന വിദേശികൾക്ക് അനുയോജ്യമായ വിസ കണ്ടെത്തുന്നതും അപേക്ഷാ നടപടികൾ ലളിതമാക്കുന്നതുമാണ് പരിഷ്കാരങ്ങളുടെ ലക്ഷ്യം. പുതിയ സംവിധാനപ്രകാരം വിസ അനുവദിക്കുന്നതിനായി വിവരസാങ്കേതിക സംവിധാനങ്ങൾ പുതുക്കിവരികയാണെന്നും ഈ വർഷാവസാനത്തോടെ പുതിയ ചട്ടങ്ങൾ പൂർണമായി നടപ്പാക്കുമെന്നും മന്ത്രാലയം വ്യക്തമാക്കി.

ടൂറിസ്റ്റ് വിസ ഇനി വിസിറ്റർ വിസ

ടൂറിസ്റ്റ് വിസയുടെ പേര് മാറ്റി വിസിറ്റർ വിസ എന്നാക്കി. വിനോദസഞ്ചാരത്തിനു പുറമേ ചില ഹ്രസ്വകാല ആവശ്യങ്ങൾക്കും ഈ വിസ ഉപയോഗിക്കാം. V-1, V-2 എന്നിങ്ങനെ രണ്ട് വിഭാഗങ്ങളാണ് ഇതിനുള്ളത്.

V-1 വിസ 30 ദിവസത്തേക്ക് ഒന്നിലധികം തവണ പ്രവേശിക്കാവുന്ന രീതിയിലാണ് അനുവദിക്കുക. ബിസിനസ് കൂടിക്കാഴ്ചകൾ, മെഡിക്കൽ കൺസൾട്ടേഷനുകൾ, വെൽനസ് റിട്രീറ്റുകൾ, ഹ്രസ്വകാല ചികിത്സ, ഇന്ത്യൻ ഭാഷകൾ, സംഗീതം, കല, കരകൗശലവിദ്യ എന്നിവയിലെ ഹ്രസ്വകാല കോഴ്സുകൾ തുടങ്ങിയവയും ഇതിന്റെ പരിധിയിൽ വരും.

കൂടുതൽ കാലയളവിൽ ഇന്ത്യ സന്ദർശിക്കാൻ ഉദ്ദേശിക്കുന്നവർക്ക് V-2 വിസ ലഭിക്കും. യോഗ്യതയും നിബന്ധനകളും അനുസരിച്ച് ഒന്ന്, അഞ്ച്, പത്ത് വർഷത്തെ കാലാവധിയിലാണ് ഇത് അനുവദിക്കുക. V-1 വിസയിൽ അനുവദിച്ചിട്ടുള്ള പ്രവർത്തനങ്ങൾക്കു പുറമേ പർവതാരോഹണത്തിനും ഈ വിസ ഉപയോഗിക്കാം. പർവതാരോഹണത്തിനായി ആറുമാസത്തെ ഒന്നിലധികം പ്രവേശന വിസയ്ക്കും പ്രത്യേക വ്യവസ്ഥയുണ്ട്.

മെഡിക്കൽ വിസയിൽ പുതിയ വിഭാഗങ്ങൾ

ചികിത്സയ്ക്കായി ഇന്ത്യയിലെത്തുന്ന വിദേശികൾക്കുള്ള വിസാ സംവിധാനവും പുനഃക്രമീകരിച്ചു. സാധാരണ ചികിത്സയ്ക്കും ആയുഷ് ചികിത്സയ്ക്കും പ്രത്യേകം വിഭാഗങ്ങളുണ്ടാകും. ആയുഷ് ചികിത്സ ഒഴികെയുള്ള ചികിത്സകൾക്കായി M-1 വിസയും ആയുഷ് ചികിത്സയ്ക്കായി M-3 വിസയും അനുവദിക്കും. രണ്ടിനും സാധാരണയായി ഒരു വർഷത്തെ കാലാവധിയും ഒന്നിലധികം പ്രവേശനത്തിനുള്ള സൗകര്യവുമുണ്ടാകും. ഇ-വിസയ്ക്കും ഈ വ്യവസ്ഥ ബാധകമാണ്.

രോഗികളെ അനുഗമിക്കുന്നവർക്കും പ്രത്യേകം വിസാ വിഭാഗങ്ങളുണ്ട്. M-1 വിസയുള്ളവരുടെ സഹായികൾക്ക് M-2 വിസയും M-3 വിസയുള്ളവരുടെ സഹായികൾക്ക് M-4 വിസയും ലഭിക്കും. തുടർചികിത്സയ്ക്കും ഒന്നിലധികം ആശുപത്രി സന്ദർശനങ്ങൾക്കും ഓരോ തവണയും പുതിയ വിസയ്ക്ക് അപേക്ഷിക്കേണ്ട സാഹചര്യം കുറയ്ക്കുകയാണ് ഇതിലൂടെ ലക്ഷ്യമിടുന്നത്.

വിദ്യാർഥികൾക്കും ഗവേഷകർക്കും പ്രത്യേക വിഭാഗം

വിദ്യാഭ്യാസത്തിനും ഗവേഷണത്തിനുമായി ഇന്ത്യയിലെത്തുന്ന വിദേശികൾക്കുള്ള സ്റ്റുഡന്റ് വിസയും രണ്ട് വിഭാഗങ്ങളാക്കി. സ്കൂൾ, ബിരുദ, ബിരുദാനന്തര പഠനങ്ങൾക്കായി S-1 വിസ അനുവദിക്കും. പി.എച്ച്.ഡി ഗവേഷകർ, ഗവേഷണത്തിനായി ഇന്ത്യയിലെത്തുന്ന വിദേശ വിദ്യാർഥികൾ, വിസിറ്റിങ് ഫാക്കൽറ്റി, ശാസ്ത്രീയ-നരവംശശാസ്ത്ര പഠനസംഘങ്ങൾ, ഇന്റേൺഷിപ്പ്, എക്സ്ചേഞ്ച് വിദ്യാർഥികൾ തുടങ്ങിയവർക്കായി S-2 വിസയും ലഭിക്കും.

‘സ്റ്റഡി ഇൻ ഇന്ത്യ’ പോർട്ടൽ വഴി ഇന്ത്യൻ വിദ്യാഭ്യാസ സ്ഥാപനങ്ങളിൽ പ്രവേശനം നേടുന്ന വിദേശ വിദ്യാർഥികൾക്ക് ഇ-S1 വിസ അനുവദിക്കാം. പരമാവധി അഞ്ച് വർഷമോ പഠനകാലാവധിയോ, ഇതിൽ ഏതാണോ കുറവ്, അത്രയും കാലത്തേക്കായിരിക്കും വിസ അനുവദിക്കുക. ഒന്നിലധികം തവണ ഇന്ത്യയിൽ പ്രവേശിക്കാനും ഇതിലൂടെ സാധിക്കും.

ബിസിനസ് വിസയിലും മാറ്റം

ബിസിനസ് വിസ B-1, B-2 എന്നിങ്ങനെ രണ്ടായി തിരിച്ചു. ഇന്ത്യയിൽ വ്യവസായമോ ബിസിനസ് സംരംഭമോ ആരംഭിക്കുന്നതുൾപ്പെടെയുള്ള ദീർഘകാല, ലൈസൻസ് അടിസ്ഥാനത്തിലുള്ള പ്രവർത്തനങ്ങൾക്ക് B-1 വിസ അനുവദിക്കും. ഹ്രസ്വകാല കരാർ അടിസ്ഥാനത്തിലുള്ള ബിസിനസ് പ്രവർത്തനങ്ങൾ, നിക്ഷേപവുമായി ബന്ധപ്പെട്ട ഉൽപ്പാദന പ്രവർത്തനങ്ങൾ, സമ്മേളനങ്ങൾ, കായിക-സാംസ്കാരിക പരിപാടികൾ, സിനിമാ നിർമാണം തുടങ്ങിയവയ്ക്കാണ് B-2 വിസ.

ഇന്ത്യൻ കമ്പനികൾക്കായി പ്രവർത്തിക്കുന്ന വിദേശ സാങ്കേതിക വിദഗ്ധർ, എൻജിനീയർമാർ, വിഷയവിദഗ്ധർ എന്നിവർക്കും പുതിയ വ്യവസ്ഥയിൽ വ്യക്തമായ പരിഗണനയുണ്ട്. വ്യവസായശാലകളിലെ യന്ത്രസാമഗ്രികളുടെ സ്ഥാപനം, പ്രവർത്തനസജ്ജമാക്കൽ, ഗുണനിലവാര പരിശോധന, അറ്റകുറ്റപ്പണി, ജീവനക്കാർക്കുള്ള പരിശീലനം, സാങ്കേതികവിദ്യ കൈമാറ്റം തുടങ്ങിയ ആവശ്യങ്ങൾക്കായി എത്തുന്നവർക്ക് B-2 വിഭാഗത്തിലെ പ്രൊഡക്ഷൻ ഇൻവെസ്റ്റ്മെന്റ് ബിസിനസ് വിസ ഇ-വിസ സംവിധാനത്തിലൂടെ ലഭ്യമാക്കും. നേരത്തേ ഇ-B4 വിഭാഗത്തിലായിരുന്നു ഇത്തരം വിസകൾ അനുവദിച്ചിരുന്നത്.

ഒൻപത് പ്രധാന വിസാ വിഭാഗങ്ങൾ

പുതുക്കിയ സംവിധാനത്തിൽ ബിസിനസ്, നയതന്ത്ര, തൊഴിൽ, മാധ്യമപ്രവർത്തക, മെഡിക്കൽ, ഔദ്യോഗിക, വിദ്യാർഥി, വിസിറ്റർ, മിസലേനിയസ് എന്നിങ്ങനെ ഒൻപത് പ്രധാന വിഭാഗങ്ങളാണുള്ളത്. ഇന്ത്യൻ വംശജർ, അവരുടെ ജീവിതപങ്കാളികൾ, മക്കൾ, ദീർഘകാല വിസയുള്ള വിദേശികളുടെ ആശ്രിതർ, ചില പ്രത്യേക സ്ഥാപനങ്ങളിൽ ചേരുന്നവർ തുടങ്ങിയവരെ മിസലേനിയസ് വിഭാഗത്തിൽ ഉൾപ്പെടുത്തിയിട്ടുണ്ട്.

നിലവിൽ 172 രാജ്യങ്ങളിലെ പൗരന്മാർക്ക് ഇന്ത്യ ഇ-വിസ സൗകര്യം നൽകുന്നുണ്ട്. ഇലക്ട്രോണിക് ട്രാവൽ ഓതറൈസേഷൻ വഴിയാണ് 13 ഉപവിഭാഗങ്ങളിലായി ഇ-വിസ അനുവദിക്കുന്നത്. പുതിയ ചട്ടങ്ങൾ നടപ്പാക്കുന്നതോടെ അപേക്ഷാ നടപടികൾ ലളിതമാകുമെന്നും വിദേശ വിനോദസഞ്ചാരികൾ, വിദ്യാർഥികൾ, രോഗികൾ, ഗവേഷകർ, നിക്ഷേപകർ, ബിസിനസ് പ്രതിനിധികൾ എന്നിവരുടെ ഇന്ത്യയിലേക്കുള്ള വരവ് വർധിക്കുമെന്നുമാണ് കേന്ദ്ര സർക്കാരിന്റെ പ്രതീക്ഷ.

Share this story

Leave a Comment

Your comment will be visible after admin approval.