അരൂർ: ആലപ്പുഴക്ക് പോവുകയായിരുന്ന ധൻബാദ് എക്സ്പ്രസ് തീവണ്ടിയുടെ പിന്നിലെ ബോഗിക്ക് സമീപത്ത് നിന്നും പുക ഉയർന്നു. ഇതോടെ തീവണ്ടി എഴുപുന്ന ശ്രീനാരായണപുരം ഭാഗത്ത് മുക്കാൽ മണിക്കൂറോളം പിടിച്ചിട്ടു. അപകടമൊന്നും റിപ്പോർട്ട് ചെയ്തിട്ടില്ല. വ്യാഴാഴ്ച വൈകിട്ട് അഞ്ചരയോടെയായിരുന്നു സംഭവം.
ശ്രീനാരായണപുരം റെയിൽഗേറ്റ് തീവണ്ടി കടന്നപ്പോൾ അവിടുത്തെ ഗേറ്റ്മാനാണ് പിന്നിൽ നിന്ന് പുക ഉയരുന്നത് കണ്ടത്. ഇദ്ദേഹം അറിയിച്ചതിനെ തുടർന്ന് പൊടുന്നനെ തീവണ്ടി നിർത്തുകയായിരുന്നു. തീവണ്ടിയുടെ ആക്സിൽ അമിതമായി ചൂടായതാണ് പുക ഉയരുന്നതിന് കാരണമെന്ന് പരിശോധനയിൽ വ്യക്തമായി. പിന്നീട് ഗാർഡെത്തി പരിശോധന നടത്തി പിടിച്ച ആക്സിൽ റിലീസ് ചെയ്തു. തീവണ്ടി യാത്ര തുടർന്നു. ഇതേ തുടർന്ന് എഴുപുന്ന അടക്കമുള്ള ലെവൽ ക്രോസുകൾ തുറക്കാൻ താമസിച്ചത് വാഹന യാത്രികരെ ഏറെ വലച്ചു.
