വി.ഡി സതീശൻ നടത്തിയ സ്വകാര്യ ചാർട്ടേഡ് വിമാനയാത്രയുടെ ചെലവ് ചിപ്സൺ ഏവിയേഷൻ പ്രൈവറ്റ് ലിമിറ്റഡ് വഹിച്ചതിന് തെളിവ്

തിരുവനന്തപുരം: തിരുവനന്തപുരത്ത് നിന്ന് മലപ്പുറത്തേക്ക് മുഖ്യമന്ത്രി വി.ഡി സതീശൻ നടത്തിയ സ്വകാര്യ ചാർട്ടേഡ് വിമാനയാത്രയുടെ ചെലവ് ഡൽഹി ആസ്ഥാനമായുള്ള ചിപ്സൺ ഏവിയേഷൻ പ്രൈവറ്റ് ലിമിറ്റഡ് വഹിച്ചതായി വ്യക്തമാക്കുന്ന രേഖകൾ പുറത്തുവന്നു. ജിഎസ്ടി ഉൾപ്പെടെ 19.88 ലക്ഷം രൂപയാണ് യാത്രയ്ക്കായി കമ്പനി നൽകിയതെന്നാണ് രേഖകളിലുള്ളത്.കേളചന്ദ്ര ഗ്രൂപ്പിന്റെ ഉടമസ്ഥതയിലുള്ള വിമാനമാണ് മുഖ്യമന്ത്രിയുടെ യാത്രയ്ക്കായി ഉപയോഗിച്ചതെന്നാണ് പുറത്തുവന്ന വിവരങ്ങൾ. യാത്രയുടെ ചെലവ് ഒരു മലയാളി വ്യവസായി വഹിച്ചതാണെന്ന മുഖ്യമന്ത്രിയുടെ നേരത്തെയുള്ള വിശദീകരണത്തിന് വിരുദ്ധമാണ് പുതിയ രേഖകളെന്നാണ് റിപ്പോർട്ട്.

മുൻ സർക്കാരിന്റെ കാലത്ത് സംസ്ഥാന സർക്കാർ പ്രതിമാസം 80 ലക്ഷം രൂപ നിരക്കിൽ ഉപയോഗിച്ചിരുന്ന ഹെലികോപ്റ്ററിന്റെ കരാർ ഏജൻസിയും ചിപ്സൺ ഏവിയേഷനായിരുന്നു. മൂന്ന് വർഷത്തെ ഹെലികോപ്റ്റർ വാടക കരാറിന്റെ കാലാവധി അടുത്തിടെ അവസാനിച്ചിരുന്നു.

ഹെലികോപ്റ്റർ കരാർ പുതുക്കുന്നതിൽ സർക്കാരിന്റെ തീരുമാനം വരാനിരിക്കെയാണ് ചിപ്സൺ ഏവിയേഷൻ മുഖ്യമന്ത്രിയുടെ യാത്രയ്ക്കായി തുക നൽകിയതെന്നതാണ് ഇപ്പോൾ വിവാദത്തിന് ഇടയാക്കുന്നത്.

സംസ്ഥാന സർക്കാരിന്റെ സാമ്പത്തിക പ്രതിസന്ധിയെ തുടർന്നാണ് ഒരു വ്യവസായി യാത്രാച്ചെലവ് വഹിച്ചതെന്ന് മുഖ്യമന്ത്രി നേരത്തെ വ്യക്തമാക്കിയിരുന്നു. എന്നാൽ, ഹെലികോപ്റ്റർ കരാർ പുതുക്കൽ സംബന്ധിച്ച നടപടികൾ നിലനിൽക്കെ സ്വകാര്യ ഏവിയേഷൻ കമ്പനി യാത്രാച്ചെലവ് വഹിച്ചതുമായി ബന്ധപ്പെട്ട് രാഷ്ട്രീയ ചർച്ചകൾ ഉയർന്നിട്ടുണ്ട്.

മുഖ്യമന്ത്രി വി.ഡി. സതീശൻ സ്വകാര്യ ചാർട്ടേഡ് വിമാനത്തിൽ നടത്തിയ സൗജന്യ യാത്ര അഴിമതി നിരോധന നിയമപ്രകാരം ക്രിമിനൽ കുറ്റത്തിന്റെ പരിധിയിൽ വരുമെന്ന് അഭിഭാഷകൻ അരുൺ കുമാർ ആരോപിച്ചു. ഔദ്യോഗിക പദവിയിലുള്ള വ്യക്തി സർക്കാർ കാര്യങ്ങളുമായി ബന്ധപ്പെട്ട് സ്വകാര്യ സ്ഥാപനത്തിൽ നിന്ന് സൗജന്യം സ്വീകരിക്കുന്നത് നിയമപരമായി പരിശോധിക്കേണ്ട വിഷയമാണെന്നും അദ്ദേഹം പറഞ്ഞു.

അഴിമതി നിരോധന നിയമത്തിലെ സെക്ഷൻ 11 ചൂണ്ടിക്കാട്ടിയാണ് അരുൺ കുമാറിന്റെ വാദം. സർക്കാർ പരിഗണിക്കുന്ന വിഷയങ്ങളുമായി ബന്ധമുള്ള വ്യക്തിയിൽ നിന്ന് പ്രതിഫലം കൂടാതെയോ വിലപ്പെട്ട വസ്തുവോ ആനുകൂല്യമോ സ്വീകരിക്കുന്ന സാഹചര്യം നിയമത്തിന്റെ പരിധിയിൽ വരാമെന്ന് നിയമത്തിലെ വ്യവസ്ഥകൾ വ്യക്തമാക്കുന്നു.

മുഖ്യമന്ത്രിയുടെ യാത്രയ്ക്കായി ചിപ്സൺ ഏവിയേഷൻ പണം നൽകിയെന്ന റിപ്പോർട്ടുകൾക്കിടെയാണ് അരുൺ കുമാറിന്റെ പ്രതികരണം. മുഖ്യമന്ത്രിയുടെ യാത്രയ്ക്കായി കേളചന്ദ്ര ഏവിയേഷന്റെ വിമാനത്തിന് ചിപ്സൺ ഏവിയേഷൻ 19,88,595 രൂപ നൽകിയതായി പുറത്തുവന്ന ഇൻവോയ്സ് വിവരങ്ങൾ വ്യക്തമാക്കുന്നു.

ഇത്തരം സൗജന്യ യാത്രകൾ ഇനിയും നടത്തുമെന്ന മുഖ്യമന്ത്രിയുടെ നിലപാട് പൊതുസമൂഹത്തോടുള്ള വെല്ലുവിളിയാണെന്നും അരുൺ കുമാർ പറഞ്ഞു. ഉദ്യോഗസ്ഥരും മറ്റ് അധികാരസ്ഥാനങ്ങളിലുള്ളവരും സമാനമായി സ്വകാര്യ വ്യക്തികളിൽ നിന്ന് സൗജന്യങ്ങൾ സ്വീകരിക്കുന്നതിന് ഇത് തെറ്റായ മാതൃകയാകുമെന്നും അദ്ദേഹം ആരോപിച്ചു.എന്നാൽ, സംസ്ഥാന ഖജനാവിന് യാത്രയ്ക്കായി ഒരു രൂപ പോലും ചെലവായിട്ടില്ലെന്നും പരിചയക്കാരനാണ് വിമാനം ഏർപ്പെടുത്തിയതെന്നുമായിരുന്നു മുഖ്യമന്ത്രിയുടെ വിശദീകരണം.