മാലെ: ഇന്ത്യയും മാലിദ്വീപും തമ്മില്‍ നിലനില്‍ക്കുന്ന നയതന്ത്ര തര്‍ക്കങ്ങള്‍ മാലിയുടെ ടൂറിസം മേഖലയ്ക്ക് വലിയ തിരിച്ചടിയായെന്ന് തുറന്നു പറഞ്ഞ് ദ്വീപ് രാഷ്ട്രത്തിന്റെ മുന്‍ പ്രസിഡന്റ് മുഹമ്മദ് നഷീദ്. ഇന്ത്യന്‍ ടൂറിസ്റ്റുകള്‍ കൂട്ടത്തോടെ മാലിയെ ബഹിഷ്‌കരിക്കാന്‍ ആഹ്വാനം ചെയ്തത് രാജ്യത്തിന്റെ സാമ്പത്തിക മേഖലയെ തളര്‍ത്തി.
ഇന്ത്യന്‍ വിനോദസഞ്ചാരികള്‍ തന്റെ രാജ്യത്തേക്ക് തുടര്‍ന്നും വരണമെന്ന് മാലിദ്വീപ് ജനത ആഗ്രഹിക്കുന്നുവെന്നും മാലിദ്വീപ് ജനതയുടെ പേരില്‍ താന്‍ മാപ്പ് ചോദിക്കുന്നതായും അദ്ദേഹം പറഞ്ഞു.
‘ഇത് മാലിദ്വീപിനെ വളരെയധികം ബാധിച്ചു. എനിക്ക് വളരെ ആശങ്കയുണ്ട്. മാലിദ്വീപിലെ ജനങ്ങളോട് ക്ഷമിക്കണം, ഇത് സംഭവിച്ചതില്‍ ഞങ്ങള്‍ ഖേദിക്കുന്നു. ഞങ്ങള്‍ ഇന്ത്യന്‍ ജനതയെത്താന്‍ ആഗ്രഹിക്കുന്നു. അവധിക്കാലത്ത് മാലിദ്വീപിലേക്ക് വരൂ, ഞങ്ങളുടെ ആതിഥ്യ മര്യാദയില്‍ ഒരു മാറ്റവും ഉണ്ടാകില്ല,’ മുന്‍ പ്രസിഡന്റ് മാധ്യമങ്ങളോട് പറഞ്ഞു.
‘ഇന്നലെ രാത്രി ഞാന്‍ പ്രധാനമന്ത്രി നരേന്ദ്ര മോഡിയെ കണ്ടിരുന്നു. അദ്ദേഹം ഞങ്ങള്‍ക്ക് എല്ലാ ആശംസകളും നേര്‍ന്നു. ഞാന്‍ മോഡിയുടെ വലിയ പിന്തുണക്കാരനാണ്. നരേന്ദ്ര മോഡിക്ക് എല്ലാ ആശംസകളും നേരുന്നു. ‘, അദ്ദേഹം പറഞ്ഞു
ബഹിഷ്‌കരണത്തിന് ഉത്തരവാദികളായവരെ നീക്കം ചെയ്യുന്നതില്‍ നിലവിലെ രാഷ്ട്രപതി സ്വീകരിച്ച ദ്രുത നടപടിയെ അദ്ദേഹം പ്രശംസിച്ചു. ”ഈ കാര്യങ്ങള്‍ പരിഹരിക്കപ്പെടേണ്ടതുണ്ടെന്ന് ഞാന്‍ കരുതുന്നു, ഞങ്ങള്‍ ഗതി മാറ്റുന്നതിലേക്ക് മടങ്ങുകയും ഞങ്ങളുടെ സാധാരണ ബന്ധത്തിലേക്ക് മടങ്ങുകയും വേണം,” മുന്‍ പ്രസിഡന്റ് പറഞ്ഞു.
‘മാലദ്വീപ് പ്രസിഡന്റ് ഇന്ത്യന്‍ സൈനികര്‍ രാജ്യം വിട്ട് പോകണമെന്ന് ആഗ്രഹിച്ചപ്പോള്‍, ഇന്ത്യ എന്താണ് ചെയ്തതെന്ന് നിങ്ങള്‍ക്കറിയാമോ? അവര്‍ കൈകള്‍ വളച്ചില്ല, അവര്‍ പേശികള്‍ കാണിച്ചില്ല. പക്ഷേ, മാലിദ്വീപ് സര്‍ക്കാരിനോട് ‘ശരി, നമുക്ക് അതിനെക്കുറിച്ച് ചര്‍ച്ച ചെയ്യാം എന്നാണ് പറഞ്ഞതെന്ന് നഷീദ് ചൂണ്ടിക്കാട്ടി.
‘പ്രസിഡന്റ് മുയിസു ഈ ചര്‍ച്ചകള്‍ നടത്തിയത് വളരെ നിര്‍ഭാഗ്യകരമാണ്. ഡോര്‍ണിയര്‍ വിമാനത്തിനെയും ഹെലികോപ്റ്ററുകളെയും പറ്റിയുള്ള ചര്‍ച്ചകള്‍ അവസാനിപ്പിക്കാം. നമ്മുടെ ദ്വീപുകള്‍ വളരെ ദൂരെയാണ്, എല്ലാ ദ്വീപുകളിലും വികസിതമായ ആശുപത്രികളില്ല, അതിനാല്‍, പലപ്പോഴും രോഗികളെ മാലിയിലേക്ക് കൊണ്ടുവരേണ്ടതുണ്ട്, കൂടാതെ അത് വേഗത്തില്‍ ചെയ്യാന്‍ കഴിയുന്നത് വിമാനമാര്‍ഗമായിരിക്കും, അതിനാല്‍ ഞങ്ങള്‍ക്ക് അത് ആവശ്യമാണ്.’-ഡോര്‍ണിയര്‍ വിമാനത്തെക്കുറിച്ചും ഹെലികോപ്റ്ററുകളെക്കുറിച്ചുമുള്ള ചര്‍ച്ചകള്‍ അവസാനിപ്പിക്കാന്‍ നഷീദ് പ്രസിഡന്റ് മുഹമ്മദ് മുയിസുവിനോട് അഭ്യര്‍ത്ഥിച്ചു .
എല്ലാ ഇന്ത്യന്‍ സൈനികരെയും തന്റെ രാജ്യത്ത് നിന്ന് പുറത്താക്കുമെന്ന തിരഞ്ഞെടുപ്പ് വാഗ്ദാനം പാലിക്കുമെന്ന് നവംബറില്‍ പ്രസിഡന്റായി ചുമതലയേറ്റ ശേഷം ചൈന അനുകൂല നേതാവായി കാണുന്ന മുയിസു പ്രഖ്യാപിച്ചിരുന്നു. ഇന്ത്യന്‍ സൈനികരുടെ ആദ്യ സംഘത്തെ തന്റെ രാജ്യത്ത് നിന്ന് പിന്‍വലിക്കാനുള്ള സമയപരിധി മാര്‍ച്ച് 10 ആയി മുയിസു നിശ്ചയിച്ചിരുന്നു
പ്രധാനമന്ത്രി നരേന്ദ്ര മോഡിക്കും ഇന്ത്യക്കുമെതിരായ ചില മാലിദ്വീപ് മന്ത്രിമാരുടെ ആക്ഷേപകരമായ പരാമര്‍ശങ്ങളുടെ പേരില്‍ നയതന്ത്ര തര്‍ക്കം പൊട്ടിപ്പുറപ്പെട്ടതിനെത്തുടര്‍ന്ന് ഇന്ത്യന്‍ വിനോദസഞ്ചാരികള്‍ കൂട്ടത്തോടെ മാലിദ്വീപ് യാത്ര ഉപേക്ഷിച്ചിരുന്നു. ഹോട്ടലുകളുടെയും വിമാനടിക്കറ്റുകളുടെയും ബുക്കിങ് റദ്ദാക്കിയത് ദ്വീപ് രാഷ്ട്രത്തിന് വലിയ തിരിച്ചടിയായി. 2023-ല്‍ മാലിദ്വീപിലേക്ക് ഏറ്റവും കൂടുതല്‍ സന്ദര്‍ശകര്‍ എത്തിയത് ഇന്ത്യയില്‍ നിന്നാണ്. 209,198 പേര്‍ എത്തി. 209,146 പേര്‍ എത്തിയ റഷ്യ രണ്ടാം സ്ഥാനത്തും 187,118 പേര്‍ എത്തിയ ചൈന മൂന്നാം സ്ഥാനത്തുമാണ്.
