കേരളത്തിൽ വീണ്ടും മഴ മുന്നറിയിപ്പ്

കൊച്ചി: കേരളം, തമിഴ്നാട്, കർണാടക എന്നിവിടങ്ങളിൽ അടുത്ത മൂന്ന് മുതൽ നാല് ദിവസം വരെ ശക്തമായ മഴക്ക് സാധ്യതയുണ്ടെന്ന് ഇന്ത്യൻ കാലാവസ്ഥാ വകുപ്പ് (ഐഎംഡി) അറിയിച്ചു. തെക്കുപടിഞ്ഞാറൻ മൺസൂൺ പിന്മാറ്റത്തിന്റെ അവസാന ഘട്ടത്തിലും ബംഗാൾ ഉൾക്കടലിൽ രൂപപ്പെട്ട ന്യൂനമർദത്തിന്റെ പശ്ചാത്തലത്തിലുമാണ് മുന്നറിയിപ്പ്.

തായ്‌ലൻഡിന് സമീപം രൂപംകൊണ്ട കാലാവസ്ഥാ വ്യതിയാനം വാരാന്ത്യത്തിൽ ശക്തിപ്രാപിച്ച് തിങ്കളാഴ്ച രാവിലെ ന്യൂനമർദമായി മാറിയതായി ഐ.എം.ഡി വ്യക്തമാക്കി. നിലവിൽ വടക്കൻ ആൻഡമാൻ കടലിനും മ്യാൻമർ തീരത്തിനും സമീപത്തുള്ള ഈ ന്യൂനമർദം ഇന്ത്യൻ തീരത്തേക്ക് നീങ്ങാൻ സാധ്യതയില്ല. പകരം, അടുത്ത മൂന്ന് ദിവസത്തിനുള്ളിൽ ഇത് തീവ്ര ന്യൂനമർദമായി ശക്തിപ്രാപിച്ച് മ്യാൻമർ, ബംഗ്ലാദേശ് തീരങ്ങളിലേക്കാണ് സഞ്ചരിക്കുകയെന്ന് കാലാവസ്ഥാ വകുപ്പ് അറിയിച്ചു.