ഡാർവിനിൽ WMC ഗ്ലോബൽ നേതാക്കൾക്ക് മന്ത്രി ജിൻസൺ ചാൾസ് ഉച്ചവിരുന്ന് ഒരുക്കി

ഡാർവിൻ (നോർത്തേൺ ടെറിട്ടറി): ഓസ്‌ട്രേലിയയിലെ ആദ്യ ഇന്ത്യൻ വംശജനായ മന്ത്രിയും നോർത്തേൺ ടെറിട്ടറി പീപ്പിൾ, സ്പോർട്ട് ആൻഡ് കൾച്ചർ മന്ത്രിയുമായ ജിൻസൺ ചാൾസ്, വേൾഡ് മലയാളി കൗൺസിൽ (WMC) ഗ്ലോബൽ നേതാക്കൾക്ക് ഡാർവിനിലെ നോവോട്ടൽ ഹോട്ടലിൽ പ്രത്യേക ഉച്ചവിരുന്ന് സ്വീകരണം നൽകി.

WMC ഗ്ലോബൽ പ്രസിഡന്റ് ഡോ. ബാബു സ്റ്റീഫൻ, ഗ്ലോബൽ ജനറൽ സെക്രട്ടറി ഷാജി മാത്യു, ഗ്ലോബൽ വൈസ് പ്രസിഡന്റ് (അഡ്മിനിസ്ട്രേഷൻ) ജെയിംസ് കൂടൽ, ഫാർ ഈസ്റ്റ് റീജിയൻ പ്രസിഡന്റ് കിരൺ ജെയിംസ്, മാത്യു മാറ്റം എന്നിവരുൾപ്പെടെയുള്ള നേതാക്കൾ സ്വീകരണത്തിൽ പങ്കെടുത്തു.

ഓസ്‌ട്രേലിയയുടെ സാമൂഹിക, സാമ്പത്തിക, സാംസ്കാരിക മേഖലകളിൽ ഇന്ത്യൻ സമൂഹവും മലയാളികളും നൽകുന്ന സംഭാവനകൾ, ബഹുസാംസ്കാരിക സഹകരണം, പ്രവാസി മലയാളികളുടെ പുതുതലമുറയ്ക്കുള്ള അവസരങ്ങൾ എന്നിവ കൂടിക്കാഴ്ചയിൽ ചർച്ചയായി. ഓസ്‌ട്രേലിയയിലും ഫാർ ഈസ്റ്റ് റീജിയനിലുമായി WMCയുടെ പ്രവർത്തനങ്ങൾ കൂടുതൽ ശക്തിപ്പെടുത്തുന്നതിനുള്ള സാധ്യതകളും നേതാക്കൾ പങ്കുവച്ചു.

ലോകമെമ്പാടുമുള്ള മലയാളികളെ സൗഹൃദത്തിന്റെയും സേവനത്തിന്റെയും സാംസ്കാരിക കൂട്ടായ്മയുടെയും വേദിയിൽ ഒരുമിപ്പിക്കുന്ന WMCയുടെ പ്രവർത്തനങ്ങളെ മന്ത്രി അഭിനന്ദിച്ചു.

ഊഷ്മളമായ സ്വീകരണത്തിനും ഹൃദ്യമായ ആതിഥ്യമര്യാദയ്ക്കും മന്ത്രി ജിൻസൺ ചാൾസിന് WMC നേതാക്കൾ നന്ദി അറിയിച്ചു.

ചിത്രം: മന്ത്രി ജിൻസൺ ചാൾസിനൊപ്പം ഡോ. ബാബു സ്റ്റീഫൻ, ഷാജി മാത്യു, ജെയിംസ് കൂടൽ, കിരൺ ജെയിംസ്, മാത്യു മാറ്റം എന്നിവർ.