ബ്രിട്ടീഷ് കൊളംബിയ: ഭൂമിയിലെ ജീവന്റെ ഉത്ഭവത്തെക്കുറിച്ചുള്ള ശാസ്ത്രജ്ഞരുടെ സംശയങ്ങള്‍ക്ക് ബ്രിട്ടീഷ് കൊളംബിയയിലെ ചെറിയൊരു തടാകം മറുപടി നല്‍കുമോ?
ബ്രിട്ടീഷ് കൊളംബിയയിലെ കംലൂപ്‌സില്‍ നിന്ന് 150 കിലോമീറ്റര്‍ വടക്കുപടിഞ്ഞാറായി ഒരു തടാകമുണ്ട്- ലാസ്റ്റ് ചാന്‍സ് തടാകം. ആഴം കുറഞ്ഞതും കലങ്ങിയ വെള്ളം നിറഞ്ഞതുമാണ് ഈ തടാകം.
‘ജീവിതത്തിന്റെ തൊട്ടില്‍’ എന്ന ശാസ്ത്രജ്ഞരുടെ വിളി ശരിയാണെന്ന നിഗമനത്തിലാണ് വാഷിംഗ്ടണ്‍ സര്‍വകലാശാലയില്‍ നിന്നുള്ള സമീപകാല പഠനം.
ശാസ്ത്രത്തിലെ ഉത്തരം കിട്ടാത്ത ഏറ്റവും വലിയ ചോദ്യത്തിന് ഉത്തരം നല്‍കാന്‍ തങ്ങള്‍ ശ്രമിക്കുന്നതെന്ന് പഠനത്തിന്റെ മുതിര്‍ന്ന എഴുത്തുകാരന്‍ ഡേവിഡ് കാറ്റ്‌ലിംഗ് പറഞ്ഞു.
പത്തൊന്‍പതാം നൂറ്റാണ്ടിലെ ശാസ്ത്രജ്ഞന്‍ ചാള്‍സ് ഡാര്‍വിന്റെ ‘ചൂടുള്ള ചെറിയ കുളം’ സിദ്ധാന്തത്തെ ലാസ്റ്റ് ചാന്‍സ് തടാകം പിന്തുണയ്ക്കുന്നുവെന്ന് കാറ്റ്‌ലിംഗ് പറഞ്ഞു. ശരിയായ ചേരുവകളുള്ള ആഴം കുറഞ്ഞ തടാകങ്ങളില്‍ ഭൂമിയില്‍ ജീവന്‍ ഉണ്ടാകാമെന്ന് ഡാര്‍വിന്‍ പറഞ്ഞു.
ഗവേഷകര്‍ പറയുന്നതനുസരിച്ച് ലാസ്റ്റ് ചാന്‍സ് തടാകത്തിന് ഈ ചേരുവകളെല്ലാമുണ്ട്. ഉയര്‍ന്ന അളവിലുള്ള ഉപ്പ്, കാരിബൂ പീഠഭൂമിയിലെ അഗ്നിപര്‍വ്വത പരപ്പില്‍ നിന്നുള്ള ധാതുക്കള്‍, ഫോസ്‌ഫേറ്റിന്റെ ഉയര്‍ന്ന സാന്ദ്രത എന്നിവയെല്ലാമുണ്ട്.
ജീവന്‍ രൂപപ്പെടണമെങ്കില്‍ ഫോസ്‌ഫേറ്റിന്റെ സാന്ദ്രത ഭൂമിയിലെ ജലാശയങ്ങളില്‍ സാധാരണയായി കാണപ്പെടുന്ന അളവിനേക്കാള്‍ 100 മുതല്‍ ഒരു ദശലക്ഷം മടങ്ങ് വരെ കൂടുതലായിരിക്കണമെന്ന് കാറ്റ്‌ലിംഗ് പറയുന്നു.
ഭൂമിയില്‍ നിരവധി ഫോസ്‌ഫേറ്റ് സാന്ദ്രമായ ജലാശയങ്ങളുണ്ട്. എന്നാല്‍ ഇതുവരെ രേഖപ്പെടുത്തിയിട്ടുള്ളതില്‍ ഏറ്റവും ഉയര്‍ന്ന അളവ് ലാസ്റ്റ് ചാന്‍സ് തടാകത്തിലാണെന്നാണ് ഗവേഷകര്‍ പറയുന്നത്. സസ്‌കാച്ചെവന്‍ സര്‍വകലാശാലയിലെ ഒരു മാസ്റ്റേഴ്‌സ് തീസിസിന്റെ അനുബന്ധത്തില്‍ ഈ വിവരങ്ങള്‍ ഉള്‍പ്പെടുത്തിയിട്ടുണ്ട്.
മഞ്ഞുകാലത്ത് തടാകം തണുത്തുറയുകയും വേനല്‍ക്കാലത്തിന്റെ അവസാനത്തില്‍ ഫോസ്‌ഫേറ്റ് സാന്ദ്രത ഏറ്റവും കൂടുതലായിരിക്കുമ്പോള്‍ ഉപ്പ് ഫലകം രൂപപ്പെടുകയും ചെയ്യുന്നതിനാല്‍ തടാകം വറ്റിവരളും. സംഘം വിവിധ സീസണുകളില്‍ മൂന്ന് തവണ തടാകം സന്ദര്‍ശിച്ചു.
ഏകദേശം നാല് ബില്യണ്‍ വര്‍ഷങ്ങള്‍ക്ക് മുമ്പ് ഇത്തരത്തില്‍ ഫോസ്‌ഫേറ്റ് സാന്ദ്രമായ തടാകങ്ങള്‍ ഭൂമിയില്‍ കൂടുതലായി കാണപ്പെടുമായിരുന്നുവെന്ന് കാറ്റ്‌ലിംഗ് പറയുന്നു.
സയന്‍സ് കോളമിസ്റ്റായ തോറ കച്ചൂര്‍ പറയുന്നത്, ഭൂമിയിലെ ജീവന്റെ ആരംഭം വിശദീകരിക്കാന്‍ ശ്രമിക്കുന്ന പലതിലും ഒന്നാണ് ഊഷ്മളമായ ചെറിയ കുളത്തിന്റെ സിദ്ധാന്തം.
സമുദ്രത്തിന്റെ അടിത്തട്ടില്‍ സ്ഥിതി ചെയ്യുന്ന ഉയര്‍ന്ന മര്‍ദ്ദം, ധാതു- സാന്ദ്രമായ ജലവൈദ്യുത നിര്‍ഗ്ഗമനങ്ങളില്‍ നിന്നാണ് ജീവന്‍ സൃഷ്ടിക്കപ്പെട്ടത് എന്നതാണ് മറ്റൊരു ജനപ്രിയ സിദ്ധാന്തം.
ലാസ്റ്റ് ചാന്‍സ് തടാകം പോലുള്ള തടാകങ്ങള്‍ക്ക് ഹൈഡ്രോതെര്‍മല്‍ നിര്‍ഗ്ഗമനത്തിലേത് പോലെ ഉയര്‍ന്ന മര്‍ദ്ദത്തിലുള്ള ഊര്‍ജം ഇല്ലെങ്കിലും അവയ്ക്ക് ആവശ്യമായ എല്ലാ ചേരുവകളും ഉണ്ടെന്ന് അവര്‍ പറയുന്നു.
ആദ്യകാല ജീവിതത്തെക്കുറിച്ചുള്ള മുന്‍ പഠനങ്ങളും ബ്രിട്ടീഷ് കൊളംബിയ കേന്ദ്രമായി നടന്നിട്ടുണ്ട്. 2011-ല്‍ അമേരിക്കന്‍, കനേഡിയന്‍ ശാസ്ത്രജ്ഞരുടെ ഒരു സംഘം രണ്ട് ബ്രിട്ടീഷ് കൊളംബിയ തടാകങ്ങളിലെ സൂക്ഷ്മജീവികളെ അടിസ്ഥാനമാക്കിയുള്ള ജീവിതത്തിന്റെ ആദ്യകാല രൂപങ്ങള്‍, സൂക്ഷ്മമായ ട്യൂണിംഗ് പര്യവേക്ഷണ വിദ്യകള്‍, ഭാവി ബഹിരാകാശ ദൗത്യങ്ങളില്‍ ഉപയോഗപ്രദമായേക്കാവുന്ന സൂചനകള്‍ എന്നിവ പഠനം നടത്തി.
ചില സമയങ്ങളില്‍ മറ്റ് ഗ്രഹങ്ങളില്‍ സമാനമായ രീതിയില്‍ ജീവന്‍ രൂപപ്പെട്ടിരിക്കാമെന്നാണ് ഈ പഠനത്തില്‍ നിന്നുള്ള കണ്ടെത്തലുകള്‍ സൂചിപ്പിക്കുന്നതെന്ന് കാറ്റ്‌ലിംഗ് പറഞ്ഞു.
ലാസ്റ്റ് ചാന്‍സ് തടാകത്തിന് സമാനമായ തടാകങ്ങളുടെ വികസനത്തിലേക്ക് നയിക്കുന്ന പാറ രൂപീകരണം പാറയുള്ള ഗ്രഹങ്ങളില്‍ സാധാരണമാണ്. വ്യത്യസ്ത അന്തരീക്ഷ സാഹചര്യങ്ങളില്‍, സൗരയൂഥത്തിന് കുറഞ്ഞ കാലപ്പഴക്കം മാത്രമുണ്ടായിരുന്നപ്പോള്‍ ചൊവ്വ, ശുക്രന്‍ പോലുള്ള ഗ്രഹങ്ങളില്‍ ഇത്തരത്തിലുള്ള തടാകങ്ങള്‍ രൂപപ്പെടാനുള്ള സാധ്യതയുണ്ട്. അത് ജീവന്റെ ഉത്ഭവത്തെക്കുറിച്ചുള്ള ഒരു നല്ല സന്ദേശമാണെന്നും കാറ്റ്‌ലിംഗ് പറഞ്ഞു.
