ന്യുയോർക്ക്: കാനഡയിലെ കാട്ടുതീയിൽ നിന്നുള്ള പുക ന്യൂയോർക്ക് – ന്യൂ ജഴ്സി ഭാഗത്തെ ജനജീവിതം സ്തംഭിപ്പിച്ചിരിക്കുകയാണ്. നട്ടുച്ചയ്ക്കും ആകാശം ഇരുണ്ട് കിടക്കുന്ന അവസ്ഥ. ഈസ്റ്റ് കോസ്റ്റിലെ പല സ്റ്റേറ്റുകളിലും ഇതാണ് സ്ഥിതി. വൈകിട്ടത്തോടെ ഇത് രൂക്ഷമാകുമെന്നും നാളെയും സ്ഥിതി തുടരുമെന്നുമാണ് സൂചന.
ബുധനാഴ്ച ഉച്ചതിരിഞ്ഞതോടെ ന്യൂയോർക്ക് നഗരത്തിലെ ആകാശം അതിവേഗം ഇരുളുകയും അപ്‌സ്‌റ്റേറ്റിലെ സൂര്യനെ ഇല്ലാതാക്കിയ പുക രാജ്യത്തിന്റെ ഏറ്റവും വലിയ നഗരത്തെ വലയം ചെയ്യുകയുമായിരുന്നു. ആകാശത്തിന്റെ നിറം മാറ്റ ഓറഞ്ച് നിറമായി. വായുവിന്റെ ഗുണനിലവാരം മോശമായി. ചില വിമാനങ്ങൾ റദ്ദാക്കി.
മാസ്കുപയോഗിക്കാതെ പുറത്തിറങ്ങാൻ കഴിയില്ല. കുട്ടികളെ ഇടവേളകളിൽ വീടിനുള്ളിൽ നിർത്തി. ആളുകളോട് പുറത്തിറങ്ങുന്നത് ഒഴിവാക്കാൻ അധികൃതർ അഭ്യർത്ഥിച്ചു.
ബുധനാഴ്ച സിറാക്കൂസിലെ വായു ഗുണനിലവാര സൂചിക 400 കവിഞ്ഞു. AirNow പ്രകാരം, 100-ന് മുകളിലുള്ള വായു ശ്വസിക്കാൻ “അനാരോഗ്യകരവും” 300-ന് മുകളിൽ “അപകടകരവുമാണ്”. സിറ്റിയിൽ ക്വീൻസ്, ബ്രോങ്ക്സ് എന്നിവിടങ്ങളിൽ സൂചിക 200 കടന്നിരുന്നു.
സിറാക്കൂസിന് തെക്ക് 60 മൈൽ അകലെയുള്ള ബിംഗ്ഹാംടണിൽ, കാലാവസ്ഥാ നിരീക്ഷകനായ മൈക്ക് ഹാർഡിമാൻ പറഞ്ഞു, നഗരം ചൊവ്വയെപ്പോലെ കാണപ്പെടുന്നു, സിഗാറിന്റെ മണവും അടിക്കുന്നു എന്ന് ന്യു യോർക്ക് ടൈംസ് റിപ്പോർട്ട് ചെയ്തു.
ന്യൂയോർക്ക് നഗരത്തിലെ വായുവിന്റെ ഗുണനിലവാരം മോശമായിക്കൊണ്ടിരിക്കുമെന്ന് ഹാർഡിമാൻ പറഞ്ഞു. 1960-കൾക്ക് ശേഷമുള്ള ഏറ്റവും മോശമായ സ്ഥിതിയിൽ നഗരത്തിലെ വായുവിന്റെ നിലവാരം തുടരുന്നുവെന്ന് സിറ്റി ഹെൽത്ത് കമ്മീഷണർ അശ്വിൻ വാസൻ പറഞ്ഞു. സ്കൂളുകൾ തുറന്നിരുന്നുവെങ്കിലും ഔട്ട്ഡോർ പ്രവർത്തനങ്ങൾ നടത്തിയിരുന്നില്ലെന്ന് മേയർ എറിക് ആഡംസ് അറിയിച്ചു.
ന്യൂയോർക്ക് സ്റ്റേറ്റിന്റെ ഭൂരിഭാഗവും എയർ ക്വാളിറ്റി ഹെൽത്ത് അഡ്വൈസറി അലേർട്ടിന് കീഴിലായിരുന്നു. ബുധനാഴ്ച ഉച്ചതിരിഞ്ഞ്, എയർ ക്വാളിറ്റി ഇൻഡക്‌സ് കഴിഞ്ഞ ദിവസത്തേക്കാൾ ഉയർന്ന നിലയിലായിരുന്നു. ഇത് ആരോഗ്യമുള്ള ആളുകൾക്കിടയിൽ വ്യാപകമായ പ്രത്യാഘാതങ്ങളും ശ്വാസകോശ സംബന്ധമായ അവസ്ഥയുള്ളവർക്ക് ഗുരുതരമായ പ്രശ്നങ്ങളും ഉണ്ടാക്കും.
ജക്കാർത്ത അല്ലെങ്കിൽ ന്യൂഡൽഹി പോലെ പുകമഞ്ഞുള്ള മെഗാസിറ്റിയിൽ ഇത്തരമൊരു അവസ്ഥ സാധാരണമാണ്. എന്നാൽ ന്യൂയോർക്കിൽ അപൂർവമാണ് എന്ന് റിപ്പോർട്ടുകൾ ചൂണ്ടിക്കാട്ടുന്നു.
കിഴക്കൻ കാനഡയിൽ കാട്ടുതീ ആഴ്ചകളായി കത്തിക്കൊണ്ടിരിക്കുകയാണ്. ബുധനാഴ്ച പുലർച്ചെ വരെ 250 ഓളം തീപിടിത്തങ്ങൾ നിയന്ത്രിക്കാനാവാതെ കത്തുന്ന കാനഡയും മൂടലിലാണ്. ക്യൂബെക്കിന്റെയും ഒന്റാറിയോയുടെയും ഭാഗങ്ങൾ പുക മുന്നറിയിപ്പിന് കീഴിലായിരുന്നു, ടൊറന്റോയിലെയും മറ്റിടങ്ങളിലെയും വായു കൂടുതൽ വഷളാകാൻ സാധ്യതയുണ്ടെന്ന് വിദഗ്ധർ മുന്നറിയിപ്പ് നൽകി .
ഉപഗ്രഹ ചിത്രങ്ങൾ ബുധനാഴ്ച യുണൈറ്റഡ് സ്റ്റേറ്റ്സിന്റെ ചില ഭാഗങ്ങളിൽ മൂടൽ വിഴുങ്ങുന്നതായി കാണിച്ചു. വടക്കുകിഴക്കൻ, മിഡ്‌വെസ്റ്റിന്റെ വിശാലമായ ഭാഗങ്ങളിൽ മുന്നറിയിപ്പ് പ്രാബല്യത്തിൽ വന്നു. ഫിലാഡൽഫിയ കോഡ് റെഡ് ആയിരുന്നു. അതായത് സെൻസിറ്റീവ് ഗ്രൂപ്പുകൾക്ക് അപകടസാധ്യതയുണ്ട്.
ഉച്ചയ്ക്കും വൈകുന്നേരവും ന്യൂയോർക്ക് നഗരത്തിൽ പുകച്ചുരുളുകൾ എത്തിയതിനാൽ പുക രൂക്ഷമായിരിക്കും.
മൂടൽ കുറച്ച് ദിവസത്തേക്ക് നീണ്ടുനിൽക്കുമെന്ന് ദേശീയ കാലാവസ്ഥാ നിരീക്ഷണ കേന്ദ്രം അറിയിച്ചു. കൂടുതൽ പുക വ്യാഴാഴ്ച പിറ്റ്സ്ബർഗ് പോലുള്ള നഗരങ്ങളിലേക്ക് എത്തുമെന്ന് മുന്നറിയിപ്പുണ്ട്.
ആരോഗ്യമുള്ള മുതിർന്നവരും വീടിനകത്ത് കഴിയുന്നതായിരിക്കും നല്ലതെന്ന വിദഗ്ദർ പറയുന്നു.
ക്യൂബെക്കിൽ നിന്ന് താഴേക്ക് ഒഴുകുന്ന പുക മേഘങ്ങൾ ദിവസങ്ങളോളം ന്യു യോർക്ക് നഗരത്തിന് മുകളിൽ തുടരുമെന്നാണ് സൂചന. ഇത് എണ്ണമറ്റ അപകടകരമായ കണികകളെ വായുവിലേക്ക് വിടുന്നു, ഡോക്ടർമാർ പറയുന്നു.
കുട്ടികൾ, പ്രായമായവർ, ഗർഭിണികൾ, ശ്വാസകോശ സംബന്ധമായ പ്രശ്‌നങ്ങൾ ഉള്ളവർ എന്നിവർ മേയർ എറിക് ആഡംസിന്റെ ഉപദേശം ശ്രദ്ധിക്കുകയും ബുധനാഴ്ച വീടിനുള്ളിൽ തന്നെ തുടരുകയും വേണം, മറ്റുള്ളവരും ഇത് പിന്തുടരുന്നതാണ് ബുദ്ധി, ഡോ. കെന്നത്ത് സ്‌പേത്ത് ന്യു യോർക്ക് പോസ്റ്റിനോട് പറഞ്ഞു.
“ആരോഗ്യമുള്ള ഒരു വ്യക്തിക്ക് അപകടസാധ്യത കുറവാണ്. എന്നാൽ യഥാർത്ഥത്തിൽ അപകടസാധ്യതയുണ്ട്, ”ന്യൂ ഹൈഡ് പാർക്കിലെ നോർത്ത്വെൽ ഹെൽത്തിലെ ഒക്യുപേഷണൽ ആൻഡ് എൻവയോൺമെന്റൽ മെഡിസിൻ മേധാവിയായ സ്‌പേത്ത് പറഞ്ഞു.
കണ്ണിനു നീറ്റൽ, തൊണ്ടക്ക് പ്രശ്നം ഒക്കെ ആകാം തുടക്കം.
