പാരീസ്: സൂപ്പര്‍ താരം ലിയോണല്‍ മെസിക്ലബ്ബ് വിട്ടതിന് പിന്നാലെ നെയ്മറെയും കൈവിടാനൊരുങ്ങുകയാണ് ഫ്രഞ്ച് ക്ലബ്ബ് പി എസ് ജി. പി എസ് ജിയില്‍ ഫ്രഞ്ച് സൂപ്പര്‍ താരം കിലിയന്‍ എംബാപ്പെയുമായി അത്ര രസത്തിലല്ലാതിരുന്നതാണ് കരാര്‍ കാലാവധി തീരും മെസിക്ക് പിന്നാലെ ക്ലബ്ബ് വിടാന്‍ നെയ്മറെയും പ്രേരിപ്പിക്കുന്നത്. എന്നാല്‍ മെസിക്കും നെയ്മറിനും പിന്നാലെ എംബാപ്പെ തന്നെ പി എസ് ജി വിട്ടേക്കുമെന്ന പുതി റിപ്പോര്‍ട്ടുകളാണ് ഇപ്പോള്‍ പുറത്തുവരുന്നത്.
2024 സീസണ്‍ അവസാനം വരെയാണ് 23കാരനായ എംബാപ്പെയ്ക്ക് പി എസ് ജിയുമായി കരാറുള്ളത്. പരസ്പര ധാരണയില്‍ ഇത് ഒരു വര്‍ഷം കൂടി നീട്ടാം എന്നാണ് കരാര്‍. എന്നാല്‍ അടുത്ത വര്‍ഷം കരാര്‍ അവസാനിക്കുന്നതോടെ ക്ലബ്ബ് വിടാനാണ് എംബാപ്പെ ഇപ്പോള്‍ ആലോചിക്കുന്നത്. എംബാപ്പെക്കായി ദീര്‍ഘനാളായി രംഗത്തുള്ള റയല്‍ മാഡ്രിഡ് തന്നെയാണ് സൂപ്പര്‍ താരത്തിന്‍റെ ലക്ഷ്യം.
അടുത്ത വര്‍ഷം പി എസ് ജിയുമായുള്ള കരാര്‍ തീരുമ്പോള്‍ വീണ്ടും ഒരു വര്‍ഷത്തേക്ക് കൂടി കരാര്‍ നീട്ടാതെ ക്ലബ്ബ് വിടാന്‍ ആലോചിക്കുന്ന എംബാപ്പെയെ ഫ്രീ ഏജന്‍റായി കൈവിടുന്നത് നഷ്ടമാകുമെന്ന തിരിച്ചറിവില്‍ ഈ സീസണില്‍ തന്നെ താരത്തെ വിറ്റാലോ എന്ന ആലോചനയിലാണ് പി എസ് ജി എന്നാണ് റിപ്പോര്‍ട്ട്.
