എറണാകുളം: കളമശ്ശേരി സ്ഫോടനത്തിൽ ഒരാൾ കൂടി മരണമടഞ്ഞു. സ്ഫോടനത്തിൽ പരിക്കേറ്റ് ചികിത്സയിലായിരുന്ന തൊടുപുഴ സ്വദേശി കുമാരിയാണ്(53) മരിച്ചത്. 90 ശതമാനത്തിലേറെ പൊള്ളലേറ്റ് കളമശ്ശേരി മെഡിക്കൽ കോളേജിൽ തീവ്രപരിചരണ വിഭാഗത്തിൽ ചികിത്സയിലായിരുന്നു. ഇതോടെ സ്ഫോടനത്തിൽ മരണം രണ്ടായി.
സംഭവ സ്ഥലത്തു വച്ച് തന്നെ ലിബിന എന്ന് പേരുള്ള സ്ത്രീ മരിച്ചിരുന്നു. ഇവരുടെ സ്വദേശം, പ്രായം തുടങ്ങിയ വിവരങ്ങൾ പോലീസ് വ്യക്തമാക്കിയിട്ടില്ല. പരിക്കേറ്റ ആറുപേരുടെ നില അതീവ ഗുരുതരമായി തുടരുകയാണ്. അമ്മയും കുട്ടിയുമടക്കം അതീവ ഗുരുതരാവസ്ഥയിലുണ്ട്.
വിവിധ ആശുപത്രികളിലായി ഇനി 17 പേരാണ് തീവ്രപരിചരണ വിഭാഗത്തിലുള്ളത്. കളമശ്ശേരി മെഡിക്കൽ കോളജ്, ആസ്റ്റർ മെഡിസിറ്റി, സൺറൈസ്, രാജഗിരി അടക്കമുള്ള ആശുപത്രികളിലാണ് പരിക്കേറ്റവരെ പ്രവേശിപ്പിച്ചിരിക്കുന്നത്.
