ന്യൂഡൽഹി: ഇന്ത്യയും പാകിസ്താനും തമ്മിലുള്ള നയതന്ത്രബന്ധത്തിൽ നിലനിൽക്കുന്ന സംഘർഷങ്ങൾക്കിടെ, മൂന്ന് വർഷത്തിലേറെ ഇടവേളയ്ക്കുശേഷം പാകിസ്താൻ മന്ത്രി ഇന്ത്യ സന്ദർശിക്കുന്നു. ഈ മാസം 20 മുതൽ 22 വരെ ന്യൂഡൽഹിയിൽ നടക്കുന്ന ഷാങ്ഹായ് സഹകരണ സംഘടനയുടെ (എസ്‌സിഒ) സിവിലൈസേഷണൽ ഡയലോഗ് ഫോറത്തിൽ പങ്കെടുക്കാൻ പാക് കാലാവസ്ഥാ വ്യതിയാന മന്ത്രി മുസാദിഖ് മസൂദ് മാലിക്കിനെയാണ് പാകിസ്താൻ നിയോഗിച്ചത്.

ശനിയാഴ്ച പാകിസ്താൻ വിദേശകാര്യ മന്ത്രാലയമാണ് ഇക്കാര്യം അറിയിച്ചത്. പരസ്പര ബഹുമാനത്തിന്റെ അടിസ്ഥാനത്തിൽ നാഗരികതകൾ തമ്മിലുള്ള സംവാദവും ജനങ്ങൾ തമ്മിലുള്ള ബന്ധവും പ്രോത്സാഹിപ്പിക്കുന്നതിന് എസ്‌സിഒ ചട്ടക്കൂടിനുള്ളിൽ പാകിസ്താൻ പ്രതിജ്ഞാബദ്ധമാണെന്ന് മന്ത്രാലയത്തിന്റെ പ്രസ്താവനയിൽ പറയുന്നു.

പാക് ദേശീയ പൈതൃക-സാംസ്കാരിക മന്ത്രി ഔറംഗസേബ് ഖാൻ ഖിച്ചിക്കായിരുന്നു ഇന്ത്യ ആദ്യം ക്ഷണം നൽകിയത്. എന്നാൽ അദ്ദേഹത്തിന് പകരം കാലാവസ്ഥാ വ്യതിയാന മന്ത്രിയെ നിയോഗിച്ചതിന്റെ കാരണം പാകിസ്താൻ വ്യക്തമാക്കിയിട്ടില്ല. ഇന്ത്യയുടെ ക്ഷണം സ്വീകരിക്കുമോയെന്ന കാര്യത്തിൽ നേരത്തെ അനിശ്ചിതത്വം നിലനിന്നിരുന്നു.

2025 മേയിൽ നടന്ന ഓപ്പറേഷൻ സിന്ദൂറിനുശേഷം ഒരു പാകിസ്താൻ മന്ത്രി ഇന്ത്യ സന്ദർശിക്കുന്നത് ആദ്യമായാണ്. 2023 മേയിൽ ഗോവയിൽ നടന്ന എസ്‌സിഒ വിദേശകാര്യ മന്ത്രിമാരുടെ യോഗത്തിൽ അന്നത്തെ പാക് വിദേശകാര്യ മന്ത്രി ബിലാവൽ ഭൂട്ടോ സർദാരി പങ്കെടുത്തതാണ് ഇതിനു മുമ്പുള്ള അവസാനത്തെ മന്ത്രിതല സന്ദർശനം.

2025 ഏപ്രിലിൽ പഹൽഗാമിലുണ്ടായ ഭീകരാക്രമണത്തിനും തുടർന്ന് ഇന്ത്യ നടത്തിയ ഓപ്പറേഷൻ സിന്ദൂറിനും പിന്നാലെ ഇരുരാജ്യങ്ങളും തമ്മിലുള്ള ബന്ധം കൂടുതൽ വഷളായിരുന്നു. അതിനുശേഷം നയതന്ത്രതലത്തിലുള്ള ഉന്നത കൂടിക്കാഴ്ചകൾ വളരെ പരിമിതമായി. ഈ സാഹചര്യത്തിൽ എസ്‌സിഒ വേദി ഇരുരാജ്യങ്ങൾക്കും ഔദ്യോഗികമായി ഇടപെടാനുള്ള അപൂർവ അവസരമായി തുടരുകയാണ്.

പ്രധാനമന്ത്രി നരേന്ദ്ര മോദി 2025 സെപ്റ്റംബറിൽ ചൈനയിലെ ടിയാൻജിനിൽ നടന്ന എസ്‌സിഒ ഉച്ചകോടിയിലാണ് സിവിലൈസേഷണൽ ഡയലോഗ് ഫോറം എന്ന ആശയം മുന്നോട്ടുവെച്ചത്. നവംബർ 20 മുതൽ 22 വരെ ഡൽഹിയിലെ പുരാന ഖിലയിലാണ് ആദ്യ പതിപ്പ് നടക്കുന്നത്. ചൈന, കസാഖ്സ്ഥാൻ, ഇറാൻ, താജിക്കിസ്ഥാൻ, ഉസ്ബെക്കിസ്ഥാൻ ഉൾപ്പെടെ 15 രാജ്യങ്ങൾ ഇതിനകം പങ്കെടുക്കുമെന്ന് സ്ഥിരീകരിച്ചിട്ടുണ്ട്.

അതേസമയം, 2027 ഓഗസ്റ്റിൽ എസ്‌സിഒ നേതാക്കളുടെ ഉച്ചകോടിക്ക് പാകിസ്താനാണ് ആതിഥേയത്വം വഹിക്കുന്നത്. നിലവിലെ സംഘർഷങ്ങൾക്കിടയിലും ബഹുരാഷ്ട്ര വേദികളിലൂടെ ഇന്ത്യയും പാകിസ്താനും ബന്ധം നിലനിർത്തുന്നത് നയതന്ത്രപരമായി ശ്രദ്ധേയമാണ്.