പി പി ചെറിയാൻ
വയോമിങ് : വയോമിങ്ങിനെ പ്രതിനിധീകരിച്ചിരുന്ന മുൻ റിപ്പബ്ലിക്കൻ പ്രതിനിധി ലിസ് ചെനി വൈസ് പ്രസിഡന്‍റ് കമല ഹാരിസിന് പ്രസിഡന്‍റ് തിരഞ്ഞെടുപ്പിൽ പിന്തുണ പ്രഖ്യാപിച്ചു. ഡെമോക്രാറ്റുകൾ പിന്തുണയിൽ സന്തോഷം പ്രകടിപ്പിച്ചു. ഡ്യൂക്ക് യൂണിവേഴ്‌സിറ്റിയുടെ സാൻഫോർഡ് സ്‌കൂൾ ഓഫ് പബ്ലിക് പോളിസിയിൽ പങ്കെടുക്കുന്നതിനിടെയാണ് ചെനി നിലപാട് വ്യക്തമാക്കിയത്.
” മുൻ യുഎസ് പ്രസിഡന്‍റ് ഡോണൾഡ് ട്രംപ് ഉയർത്തുന്ന അപകടം കാരണം, ഞാൻ അദ്ദേഹത്തിന് വോട്ട് ചെയ്യുന്നില്ലെന്ന് മാത്രമല്ല, കമല ഹാരിസിന് വോട്ട് ചെയ്യും,” ചെനി പറഞ്ഞു. മുൻ പ്രസിഡന്‍റ് ഡോണൾഡ് ട്രംപിനെ വിമർശിച്ചതിന് പുറത്താക്കപ്പെടുന്നതിന് മുൻപ് ചെനി മുമ്പ് റിപ്പബ്ലിക്കൻ കോക്കസ് നേതൃനിരയിൽ സേവനമനുഷ്ഠിച്ചിട്ടുണ്ട്. ട്രംപ് രണ്ടാം തവണയും തിരഞ്ഞെടുക്കപ്പെട്ടാൽ നാല് വർഷത്തിനപ്പുറം അധികാരത്തിൽ തുടരാൻ ശ്രമിക്കുമെന്നും ചെനി പറഞ്ഞു.
“ചെനി ഈ രാജ്യത്തെ സ്നേഹിക്കുകയും നമ്മുടെ ജനാധിപത്യത്തിനും നമ്മുടെ ഭരണഘടനയ്ക്കും പ്രഥമസ്ഥാനം നൽകുകയും ചെയ്യുന്ന ഒരു രാജ്യസ്നേഹിയാണ്”– കമല ഹാരിസ് പ്രചാരണ സംഘം അധ്യക്ഷൻ ജെൻ ഒ മാലി ഡിലൺ ബുധനാഴ്ച രാത്രി പ്രസ്താവനയിൽ പറഞ്ഞു.
