തിരുവനന്തപുരം: എസ്എസ്എൽസി പരീക്ഷാ സർട്ടിഫിക്കറ്റ് വിതരണം അടുത്ത ആഴ്ച ആരംഭിക്കും. പരീക്ഷാഭവനിൽ സർട്ടിഫിക്കറ്റ് അച്ചടി പൂർത്തിയായതായും അടുത്ത ആഴ്ച ആദ്യം ഡിഇഒ ഓഫിസുകളിലേക്ക് അയയ്ക്കുമെന്നും പരീക്ഷാഭവൻ സെക്രട്ടറി എസ്.സന്തോഷ് കുമാർ അറിയിച്ചു. ഇവിടെനിന്ന് സ്കൂൾ അധികൃതർ വാങ്ങി വിതരണം ചെയ്യും. ഉപരിപഠനത്തിന് സർട്ടിഫിക്കറ്റ് ആവശ്യമായവർക്ക് സോഫ്റ്റ്കോപ്പി ഡിജിലോക്കറിൽനിന്ന് ഡൗൺലോഡ് ചെയ്യാനുള്ള സൗകര്യം നേരത്തേ എർപ്പെടുത്തിയിട്ടുണ്ടെന്നും പരീക്ഷാഭവൻ അറിയിച്ചു.
നാലേകാൽ ലക്ഷത്തിലേറെ വിദ്യാർഥികളുടെ സർട്ടിഫിക്കറ്റുകളാണുള്ളത്. സേ–ഇംപ്രൂവ്മെന്റ് പരീക്ഷാഫലം അടക്കം ഉൾപ്പെടുത്തിയാണ് സർട്ടിഫിക്കറ്റ് തയാറാക്കിയിരിക്കുന്നത്. സുരക്ഷാ സംവിധാനങ്ങൾ ഉൾപ്പെടുത്തിയുള്ള സർട്ടിഫിക്കറ്റ് ആദ്യം സംസ്ഥാനത്തിനു പുറത്തുള്ള സെക്യൂരിറ്റി പ്രസിൽ അച്ചടിച്ച ശേഷം അതിലേക്ക് കുട്ടികളുടെ ബയോഡേറ്റയും മാർക്കും പരീക്ഷാ ഭവനിലെതന്നെ പ്രിന്റിങ് മെഷീനുകൾ ഉപയോഗിച്ച്് അച്ചടിക്കുകയാണു ചെയ്യുന്നത്. കുട്ടികളുടെ വ്യക്തിപരമായ വിവരങ്ങളുടെ സുരക്ഷ പരിഗണിച്ചാണ് അതിന്റെ അച്ചടി പുറത്തു നൽകാത്തത്. മാർക്ക് ലിസ്റ്റ് ആവശ്യമുള്ള കുട്ടികൾക്ക് ഓഗസ്റ്റ് രണ്ടാം ആഴ്ച മുതൽ ലഭ്യമാകും.
