ജീമോൻ റാന്നി
ന്യൂയോർക്ക്: കോവിഡ് മഹാമാരിയുടെ ആഗോള പ്രതിസന്ധി മനുഷ്യജീവിതത്തെ തളർത്തിയ 2020-ൽ, “സംഗീതത്തിലൂടെ ആരാധന” എന്ന ദർശനത്തിൽ ന്യൂയോർക്ക് ശാലേം മാർത്തോമാ ഇടവക മിഷൻ ആരംഭിച്ച ആത്മീയ സംഗീതപരിപാടിയാണ് സീയോൻ സഞ്ചാരി. വെർച്വൽ പ്ലാറ്റ്ഫോമിലൂടെ തുടക്കം കുറിച്ച ഈ പ്രോഗ്രാം, കഴിഞ്ഞ വർഷങ്ങളിലായി അനവധി വിശ്വാസികൾക്ക് ആശ്വാസവും പ്രത്യാശയും പകർന്ന ഒരു ആരാധനാ വേദിയായി മാറിയിട്ടുണ്ട്. അമേരിക്കയിലെ വിവിധ സംസ്ഥാനങ്ങളിൽ നിന്നുള്ള നിരവധി അനുഗ്രഹീത ഗായകരുടെ പങ്കാളിത്തം ഈ സംഗീതയാത്രയെ കൂടുതൽ സമ്പന്നമാക്കി.
ഈ ആത്മീയ സംഗീതപരമ്പരയുടെ 53- എഡിഷൻ ഏപ്രിൽ 18 ശനിയാഴ്ച വൈകുന്നേരം 5 മണിക്ക് ഈസ്റ്റേൺ ലോങ്ങ് ഐലന്റിലുള്ള ശാലേം മാർത്തോമാ പള്ളിയിൽ വച്ച് നടത്തപ്പെടും.ആത്മീയ സംഗീതസാന്നിധ്യം സൃഷ്ടിക്കുന്ന ഈ പ്രത്യേക സന്ധ്യ, വിശ്വാസികൾക്ക് ഒരുമിച്ച് ആരാധനാനുഭവത്തിൽ പങ്കുചേരാനുള്ള ഒരു വിലപ്പെട്ട അവസരമായി മാറും.
മാരാമൺ കൺവെൻഷൻ ഗാനങ്ങൾ ഉൾപ്പെടെ ആയിരക്കണക്കിന് ക്രൈസ്തവ ഗാനങ്ങൾക്ക് സംഗീതം നൽകിയിട്ടുള്ള പ്രശസ്ത ക്രൈസ്തവ സംഗീതജ്ഞൻ ശ്രീ. ജോസി പുല്ലാട് ഈ സംഗീതസന്ധ്യയ്ക്ക് നേതൃത്വം നൽകുന്നു. ദശാബ്ദങ്ങളായി ക്രൈസ്തവ സംഗീതലോകത്തെ സമ്പന്നമാക്കിയ അദ്ദേഹത്തിന്റെ സംഗീതസപര്യ, ഈ പരിപാടിയെ ആത്മീയതയും സംഗീതമാധുരിയും നിറഞ്ഞ ഒരു അനുഭവമായിരിക്കും.
കൂടുതൽ വിവരങ്ങൾക്ക്: റവ. ഏബ്രഹാം വർഗീസ് – 631‑431‑1271 തോമസ് ജേക്കബ് (ഷാജി) – 631‑747‑7862
