അമേരിക്കൻ മറൈൻ കോർപ്സിന്റെ F-35 യുദ്ധവിമാനം തകർന്നു; പൈലറ്റ് സുരക്ഷിതമായി രക്ഷപ്പെട്ടു

പ്രസാദ് തീയാടിക്കൽ

സാൻ ഡിയാഗോ, കാലിഫോർണിയ: അമേരിക്കൻ മറൈൻ കോർപ്സിന്റെ അത്യാധുനിക F-35B ലൈറ്റ്നിംഗ് II സ്റ്റെൽത്ത് യുദ്ധവിമാനം വെള്ളിയാഴ്ച കാലിഫോർണിയയിലെ മറൈൻ കോർപ്സ് എയർ സ്റ്റേഷൻ മിറാമാർ (MCAS Miramar) റൺവേയ്ക്ക് സമീപം തകർന്നു വീണു. അപകടത്തിന് തൊട്ടുമുമ്പ് പൈലറ്റ് വിജയകരമായി ഇജക്ട് ചെയ്തതിനാൽ സുരക്ഷിതമായി രക്ഷപ്പെടുകയും തുടർന്ന് പരിക്കുകളോടെ ആശുപത്രിയിലേക്ക് മാറ്റുകയും ചെയ്തതായി സൈനിക അധികൃതർ അറിയിച്ചു.

രാവിലെ പരിശീലന പറക്കലിനിടെയാണ് അപകടമുണ്ടായത്. വിമാനം നിലത്തുവീണ് തീപിടിച്ചതോടെ അഗ്നിശമന സേന ഉടൻ സ്ഥലത്തെത്തി തീ നിയന്ത്രണവിധേയമാക്കി. അപകടത്തെ തുടർന്ന് സമീപപ്രദേശത്ത് ചെറിയ തോതിൽ പുല്ലുതീയും ഉണ്ടായതായി റിപ്പോർട്ടുകളുണ്ട്.

അപകടത്തിന്റെ കൃത്യമായ കാരണം ഇതുവരെ വ്യക്തമായിട്ടില്ല. അമേരിക്കൻ മറൈൻ കോർപ്സ് സംഭവത്തെ “Class A Mishap” എന്ന ഗൗരവമേറിയ സൈനിക വിമാനാപകടമായി പ്രഖ്യാപിച്ച് സമഗ്ര അന്വേഷണം ആരംഭിച്ചിട്ടുണ്ട്. ഒരു F-35B യുദ്ധവിമാനത്തിന്റെ വില ഏകദേശം 109 മില്യൺ ഡോളറാണ്.
ലോകത്തിലെ ഏറ്റവും നൂതനമായ അഞ്ചാം തലമുറ സ്റ്റെൽത്ത് യുദ്ധവിമാനങ്ങളിലൊന്നായ F-35B അമേരിക്കൻ മറൈൻ കോർപ്സ്, നേവി, വ്യോമസേന എന്നിവ ഉപയോഗിച്ചുവരുന്ന പ്രധാന യുദ്ധവിമാനമാണ്.