അമേരിക്കയില്‍ ‘ബീവർ ഫീവർ’ പടരുന്നു; വളര്‍ത്തുപൂച്ചകളില്‍ പതിനഞ്ചില്‍ ഒരെണ്ണത്തിന് രോഗം, ജാഗ്രതാ നിര്‍ദേശം

വാഷിംഗ്ടൺ: വീടുകളിൽ വളർത്തുന്ന പൂച്ചകളിൽ വലിയൊരു വിഭാഗത്തിനും മനുഷ്യരിലേക്ക് പകരാൻ സാധ്യതയുള്ള ‘ബീവർ ഫീവർ’ എന്ന രോഗബാധ ഉണ്ടായേക്കാമെന്ന് പുതിയ പഠന റിപ്പോർട്ട്. അമേരിക്കയിലെയും കാനഡയിലെയും പൂച്ചകളിൽ നടത്തിയ വിപുലമായ പഠനത്തിലാണ്, പതിനഞ്ചിൽ ഒരു പൂച്ചയ്ക്ക് വീതം ‘ജിയാർഡിയ ഡുവോഡിനാലിസ്’ എന്ന ദഹനനാളിയിലെ പരാദബാധ ഉള്ളതായി കണ്ടെത്തിയത്. രോഗബാധിതരായ പൂച്ചകളിൽ അഞ്ചിൽ ഒന്നിന് ഇത് മനുഷ്യരിലേക്ക് പകർത്താൻ കഴിയുമെന്നും അന്താരാഷ്ട്ര ശാസ്ത്ര ജേണലായ ‘PLoS One’-ൽ പ്രസിദ്ധീകരിച്ച പഠനം വ്യക്തമാക്കുന്നു.

മനുഷ്യരിലും മൃഗങ്ങളിലും ഒരുപോലെ കഠിനമായ വയറിളക്കത്തിനും മറ്റ് ദഹനപ്രശ്നങ്ങൾക്കും കാരണമാകുന്ന ഒന്നാണ് ജിയാർഡിയ പരാദങ്ങൾ. 1970-കളിൽ നീർനായ്ക്കൾ ജീവിച്ചിരുന്ന പ്രദേശങ്ങളിലെ മലിനജലത്തിലൂടെ പടർന്നുപിടിച്ചതോടെയാണ് ഇതിന് ‘ബീവർ ഫീവർ’ എന്ന പേര് ലഭിച്ചത്.

രോഗബാധയേറ്റാൽ മനുഷ്യരിൽ ദിവസം അഞ്ച് തവണ വരെ വയറിളക്കം, വയറുവേദന, വയർ വീർക്കൽ എന്നിവ ഉണ്ടാകാം. എന്നാൽ രോഗബാധിതരായ പൂച്ചകളിൽ പലപ്പോഴും യാതൊരുവിധ ലക്ഷണങ്ങളും കാണാറില്ല എന്നത് അപകടസാധ്യത വർദ്ധിപ്പിക്കുന്നു. അണുബാധ കഠിനമായാൽ വർഷങ്ങളോളം നീണ്ടുനിൽക്കുന്ന സന്ധിവാതം, വിട്ടുമാറാത്ത വയറിളക്കം, പോഷകാഹാരക്കുറവ് എന്നിവയ്ക്ക് ഇത് കാരണമാകുമെന്ന് യു.എസ്. സെന്റേഴ്സ് ഫോർ ഡിസീസ് കൺട്രോൾ ആൻഡ് പ്രിവൻഷൻ (സിഡിസി) മുന്നറിയിപ്പ് നൽകുന്നു. കുട്ടികൾ, മുതിർന്നവർ, പ്രതിരോധശേഷി കുറഞ്ഞവർ എന്നിവരിലാണ് രോഗം കൂടുതൽ സങ്കീർണ്ണമാകുന്നത്.

ജാഗ്രതാ നിർദ്ദേശങ്ങൾ
ബീവർ ഫീവർ എളുപ്പത്തിൽ ചികിത്സിച്ചു ഭേദമാക്കാവുന്നതാണെങ്കിലും കർശനമായ പ്രതിരോധ നടപടികൾ സ്വീകരിക്കണമെന്ന് വെറ്ററിനറി വിദഗ്ധർ നിർദ്ദേശിക്കുന്നു.
വളർത്തുമൃഗങ്ങളുമായി ഇടപഴകിയ ശേഷം കൈകൾ സോപ്പുപയോഗിച്ച് നന്നായി കഴുകുക, പൂച്ചകൾ മുഖത്തോ വായയിലോ നക്കാൻ അനുവദിക്കരുത്., ലിറ്റർ ബോക്സുകൾ, ഭക്ഷണപ്പാത്രങ്ങൾ എന്നിവ കൃത്യമായ ഇടവേളകളിൽ വൃത്തിയാക്കുക, വർഷത്തിലൊരിക്കലെങ്കിലും വളർത്തുമൃഗങ്ങളുടെ ആരോഗ്യപരിശോധനയുടെ ഭാഗമായി ജിയാർഡിയ പരിശോധനയും നടത്തുക. വീട്ടിൽ കുട്ടികളോ പ്രതിരോധശേഷി കുറഞ്ഞവരോ ഉണ്ടെങ്കിൽ കൂടുതൽ തവണ പരിശോധന നടത്തുന്നത് സുരക്ഷിതമായിരിക്കും.