സുരക്ഷാ മാനദണ്ഡങ്ങളില്ലാതെ ജിംനാസ്റ്റിക്സ് പ്രകടനം: സാഹസിക ദമ്പതികൾ ന്യൂയോർക്കിൽ പിടിയിലായി

ദുബായ്: യുഎഇയുടെ ആകാശഗോപുരങ്ങൾക്ക് മുകളിൽ സുരക്ഷാ മാനദണ്ഡങ്ങളൊന്നുമില്ലാതെ കയറി ജിംനാസ്റ്റിക്സ് പ്രകടനങ്ങളിലൂടെ ദുബായ് നിവാസികളെ ശ്വാസമടക്കിപ്പിടിച്ചു നിറുത്തിയ റഷ്യൻ സാഹസിക ദമ്പതികൾ ഒടുവിൽ ന്യൂയോർക്കിൽ പിടിയിലായി.

പ്രശസ്ത റഷ്യൻ ഇൻഫ്ലുവൻസർമാരായ ആഞ്ചല നിക്കോളാവും പങ്കാളി ഇവാൻ ബീർക്കസുമാണ് അമേരിക്കൻ പൊലീസിന്റെ പിടിയിലായത്. മാൻഹട്ടനിലെ വിഖ്യാതമായ എംപയർ സ്റ്റേറ്റ് ബിൽഡിങ്ങിന്റെ ഏറ്റവും മുകളിലെ അഗ്രഭാഗത്ത് തൂങ്ങിക്കിടന്ന് അതിസാഹസികത കാട്ടിയതിനാണ് ന്യൂയോർക്ക് പൊലീസ് ഇവരെ വട്ടംചുറ്റി പിടികൂടിയത്. കെട്ടിടത്തിന് മുകളിൽ വച്ചുള്ള നാടകീയമായ പ്രണയാഭ്യർഥനയ്ക്ക് തൊട്ടുപിന്നാലെയായിരുന്നു സുരക്ഷാ ഉദ്യോഗസ്ഥരെ പോലും വെട്ടിച്ച് ഇരുവരും ആകാശസീമയിൽ അപകടകരമായ നീക്കം നടത്തിയത്.

ഭൂമിയിൽ നിന്ന് ഏകദേശം 1454 അടി ഉയരത്തിലുള്ള കെട്ടിടത്തിന്റെ അഗ്രഭാഗത്താണ് യാതൊരുവിധ സുരക്ഷാ ഉപകരണങ്ങളുടെയും സഹായമില്ലാതെ ഇരുവരും ജീവൻ പണയം വെച്ച് തൂങ്ങിക്കിടന്നത്. കറുത്ത വസ്ത്രങ്ങൾ ധരിച്ച് മേഘങ്ങൾക്കിടയിലൂടെ ഇവർ നടത്തുന്ന പ്രകടനങ്ങളുടെ ദൃശ്യങ്ങൾ ‘ബാറ്റ്മാൻ – ക്യാറ്റ് വിമൻ എൻഗേജ്മെന്റ്’ എന്ന പേരിൽ സമൂഹമാധ്യമങ്ങളിൽ നിമിഷനേരം കൊണ്ടാണ് തരംഗമായത്.

ലോകത്തിലെ ഏറ്റവും ഉയർന്ന കെട്ടിടങ്ങളുള്ള ദുബായിലെ ആകാശവിസ്മയങ്ങൾക്കിടയിലാണ് ഈ റഷ്യൻ ദമ്പതികൾ തങ്ങളുടെ കരിയറിലെ ഏറ്റവും ശ്രദ്ധേയമായ പ്രകടനങ്ങൾ പലതും നടത്തിയിട്ടുള്ളത്. ആകാശചുംബികളായ കെട്ടിടങ്ങളാൽ സമ്പന്നമായ ദുബായിൽ ഇവർ മുൻപും സമാനമായ രീതിയിൽ സുരക്ഷാ സംവിധാനങ്ങളെ വെല്ലുവിളിച്ച് കയറിയിട്ടുണ്ട്. 2022-ൽ ദുബായ് ഷെയ്ഖ് സായിദ് റോഡിലെ എഎച്ച്എസ് ടവറിന് മുകളിൽ കയറി ആഞ്ചല നടത്തിയ അതിശയിപ്പിക്കുന്ന ജിംനാസ്റ്റിക്സ് പ്രകടനം യുഎഇയിൽ വലിയ ചർച്ചയായിരുന്നു. ദുബായിലെ ആകാശപ്പരപ്പിൽ സുരക്ഷാ വലയങ്ങളില്ലാതെ കെട്ടിടത്തിന്റെ വശങ്ങളിലൂടെ ഇവർ നടത്തുന്ന പ്രകടനങ്ങൾ കാണാൻ സമൂഹമാധ്യമങ്ങളിൽ വൻ ആരാധകവൃന്ദമാണുള്ളത്.

ദുബായ്ക്ക് പുറമെ മലേഷ്യയിലെ ലോകത്തിലെ ഏറ്റവും ഉയർന്ന രണ്ടാമത്തെ കെട്ടിടമായ മെർദേക്ക 118, ചൈനയിലെ ഗോൾഡിൻ ഫിനാൻസ് തുടങ്ങിയ വൻ ഗോപുരങ്ങളും ഇവർ കീഴടക്കിയിട്ടുണ്ട്. ആഗോളതലത്തിൽ ശ്രദ്ധേയരായ ഇവരുടെ പ്രണയവും അതിസാഹസികമായ ജീവിതവും പശ്ചാത്തലമാക്കി 2024-ൽ പ്രമുഖ ഒടിടി പ്ലാറ്റ്‌ഫോമായ നെറ്റ്ഫ്ലിക്സ് ഒരു ഡോക്യുമെന്ററിയും പുറത്തിറക്കിയിരുന്നു.

റഷ്യയിലെ സർക്കസ് കലാകാരന്റെ മകളായ ആഞ്ചല പ്രഫഷണൽ ജിംനാസ്റ്റിക്സ് പരിശീലനം നേടിയ വ്യക്തിയാണ്. കുട്ടിക്കാലത്ത് മാതാപിതാക്കളുടെ വേർപിരിയലിനെ തുടർന്ന് കടുത്ത ദാരിദ്ര്യവും പട്ടിണിയും അനുഭവിച്ചറിഞ്ഞിട്ടുണ്ടെന്നും ആ കഠിനമായ അനുഭവങ്ങളാണ് ഭയമില്ലാതെ ഉയരങ്ങൾ കീഴടക്കാൻ തനിക്ക് കരുത്തുപകർന്നതെന്നും ആഞ്ചല മുൻപ് വ്യക്തമാക്കിയിട്ടുണ്ട്.

അതേസമയം, മകളുടെ അറസ്റ്റിൽ തനിക്ക് യാതൊരുവിധ ആശങ്കയുമില്ലെന്നാണ് ആഞ്ചലയുടെ പിതാവ് പ്രതികരിച്ചത്. മുന്നുംപിന്നും നോക്കാതെ നിയമങ്ങൾ ലംഘിച്ച് കെട്ടിടങ്ങൾക്ക് മുകളിൽ കയറുന്നത് തങ്ങളുടെ കുടുംബത്തിൽ ഒരു സാധാരണ കാര്യമാണെന്നായിരുന്നു അദ്ദേഹത്തിന്റെ വിചിത്രമായ പ്രതികരണം. ലോകത്തെ പല നഗരങ്ങളിലും അധികൃതരുടെ കണ്ണുവെട്ടിച്ച് ഇത്തരം സാഹസികതകൾ കാട്ടാറുണ്ടെങ്കിലും ന്യൂയോർക്കിലെ കർശന സുരക്ഷാ പരിശോധനയിലാണ് ഇത്തവണ ദമ്പതികൾക്ക് നിയമത്തിന് കീഴടങ്ങേണ്ടി വന്നത്.