നിർത്തിയിട്ടിരുന്ന കാറിന് തീപിടിച്ച് 5 മാസം പ്രായമുള്ള കുഞ്ഞ് വെന്തുമരിച്ചു; രണ്ടുവയസ്സുകാരനായ സഹോദരനെ രക്ഷപെടുത്തിയത് 12-കാരൻ

പി പി ചെറിയാൻ

വാഷിംഗ്ടൺ: പിതാവ് വീട്ടിനുള്ളിലേക്ക് കയറിയ സമയം നിർത്തിയിട്ടിരുന്ന കാറിന് തീപിടിച്ച് 5 മാസം പ്രായമുള്ള കുഞ്ഞിന് ദാരുണാന്ത്യം. വാഷിംഗ്ടണിലെ ടംവാട്ടറിന് സമീപം ജൂലൈ 21ചൊവ്വാഴ്ച ഉച്ചയോടെയാണ് ദുരന്തമുണ്ടായത്.

മൂന്ന് മക്കളുമായി പുറത്തേക്ക് പോകാനിറങ്ങിയ പിതാവ്, കാറിന്റെ എഞ്ചിൻ പ്രവർത്തിപ്പിച്ച ശേഷം ചെറിയൊരു ആവശ്യത്തിനായി വീട്ടിനുള്ളിലേക്ക് പോയ സമയത്താണ് വാഹനത്തിനുള്ളിൽ പുക ഉയർന്നത്. കാറിലുണ്ടായിരുന്ന 12-കാരൻ ഉടൻ തന്നെ 2 വയസ്സുള്ള സഹോദരനെ വണ്ടിയിൽ നിന്ന് പുറത്തിറക്കി പിതാവിനെ വിവരമറിയിക്കാൻ ഓടി. എന്നാൽ ഇവർ തിരിച്ചെത്തിയപ്പോഴേക്കും കാർ പൂർണ്ണമായും കത്തിയമർന്നിരുന്നു.

പിതാവും അയൽവാസികളും ചേർന്ന് കുഞ്ഞിനെ രക്ഷിക്കാൻ ശ്രമിച്ചെങ്കിലും സാധിച്ചില്ല. രക്ഷാപ്രവർത്തനത്തിനിടെ പിതാവിനടക്കം ചിലർക്ക് പൊള്ളലേറ്റു. സംഭവത്തിൽ പൊലീസും ഫയർഫോഴ്സും എ.ടി.എഫ് (ATF) ഏജൻസിയും അന്വേഷണം ആരംഭിച്ചിട്ടുണ്ട്.