തമിഴ്നാട്ടിൽ ‘തായ് മാമൻ’ പദ്ധതി; സർക്കാർ ആശുപത്രികളിൽ ജനിക്കുന്ന കുഞ്ഞുങ്ങൾക്ക് സ്വർണമോതിരം

ചെന്നൈ: തമിഴ്നാട്ടിൽ സർക്കാർ ആശുപത്രികളിൽ ജനിക്കുന്ന നവജാത ശിശുക്കൾക്ക് ഒരു ഗ്രാം സ്വർണമോതിരം നൽകുന്ന ‘തായ് മാമൻ തങ്ക മോതിരം’ പദ്ധതി മുഖ്യമന്ത്രി സി. ജോസഫ് വിജയ് ഉദ്ഘാടനം ചെയ്തു. മധുരയിലെ സർക്കാർ രാജാജി ആശുപത്രിയിൽ തിങ്കളാഴ്ച നടന്ന ചടങ്ങിലായിരുന്നു പദ്ധതിയുടെ സംസ്ഥാനതല ഉദ്ഘാടനം.

പദ്ധതിയുടെ ഭാഗമായി സർക്കാർ ആശുപത്രികളിലും സർക്കാർ പ്രാഥമികാരോഗ്യ കേന്ദ്രങ്ങളിലും ജനിക്കുന്ന അർഹരായ ഓരോ കുഞ്ഞിനും ഒരു ഗ്രാം, 22 കാരറ്റ് സ്വർണമോതിരമാണ് നൽകുന്നത്. 2026 ജൂൺ 22-ന് ഉച്ചയ്ക്ക് 12 മണി മുതൽ ജനിച്ച കുഞ്ഞുങ്ങൾക്കും പദ്ധതിയുടെ ആനുകൂല്യം ലഭിക്കും. തമിഴ്നാട് സർക്കാർ പുറത്തിറക്കിയ വിവരമനുസരിച്ചാണ് ഈ തീയതി മുതൽ പദ്ധതി പ്രാബല്യത്തിൽ വരുന്നത്.

പദ്ധതിയുടെ ആദ്യഘട്ടത്തിനായി 1.28 ലക്ഷം സ്വർണമോതിരങ്ങൾ സർക്കാർ സംഭരിച്ചിട്ടുണ്ട്. ഓരോ മോതിരത്തിനും പ്രത്യേക സീരിയൽ നമ്പർ ഉണ്ടായിരിക്കും. സുരക്ഷ ഉറപ്പാക്കുന്നതിനായി ടാംപർ പ്രൂഫ് പാക്കേജിങ്ങിലാണ് മോതിരങ്ങൾ വിതരണം ചെയ്യുന്നത്. അർഹരായ നവജാത ശിശുക്കൾക്ക് ആശുപത്രിയിൽ നിന്ന് മടങ്ങുന്നതിന് മുമ്പ് തന്നെ മോതിരം നൽകാനാണ് പദ്ധതി.

തമിഴ് പാരമ്പര്യത്തിൽ നവജാത ശിശുവിന് മാതൃസഹോദരൻ നൽകുന്ന സമ്മാനമായ ‘തായ് മാമൻ സീർ’ എന്ന ആചാരവുമായി ബന്ധപ്പെടുത്തിയാണ് പദ്ധതിക്ക് ‘തായ് മാമൻ തങ്ക മോതിരം’ എന്ന പേര് നൽകിയിരിക്കുന്നത്. പ്രസവത്തെ ആഘോഷിക്കുകയും മാതൃത്വത്തെ ആദരിക്കുകയും സർക്കാർ ആശുപത്രികളിലെ പ്രസവങ്ങളുടെ എണ്ണം വർധിപ്പിക്കുകയും പൊതുജനാരോഗ്യ സ്ഥാപനങ്ങളിലുള്ള വിശ്വാസം കൂടുതൽ ശക്തിപ്പെടുത്തുകയും ചെയ്യുകയാണ് പദ്ധതിയുടെ ലക്ഷ്യങ്ങളെന്ന് തമിഴ്നാട് സർക്കാർ വ്യക്തമാക്കിയിട്ടുണ്ട്.

പദ്ധതിയുടെ ഭാഗമായി മധുര സർക്കാർ രാജാജി ആശുപത്രിയിൽ മുഖ്യമന്ത്രി വിജയ് നവജാത ശിശുക്കൾക്ക് സ്വർണമോതിരങ്ങൾ വിതരണം ചെയ്തു. സർക്കാർ കണക്കുകൾ പ്രകാരം പദ്ധതിക്കായി പ്രതിവർഷം 755.83 കോടി രൂപയാണ് വകയിരുത്തിയിരിക്കുന്നത്.