ന്യൂയോർക്ക്: ആർട്ടിഫിഷ്യൽ ഇന്റലിജൻസിന്റെ (എഐ) നേട്ടങ്ങൾ ലഭിക്കുന്നതിനായി സാങ്കേതികവിദ്യയുടെ ചില ദോഷഫലങ്ങൾ കൂടി സമൂഹം അംഗീകരിക്കാൻ തയാറാകണമെന്ന് ഓപ്പൺഎഐ സിഇഒ സാം ഓൾട്ട്മാൻ. എഐയുടെ വ്യാപകമായ ഉപയോഗവും അതിലൂടെ ലഭിക്കുന്ന ഗുണങ്ങളും ഉറപ്പാക്കുന്നതിന് ചില അപകടസാധ്യതകൾ സഹിക്കേണ്ടിവരുമെന്നാണ് ഓൾട്ട്മാന്റെ നിലപാട്.

പൊളിറ്റിക്കോയുടെ സാങ്കേതികവിദ്യാ വാർത്താക്കുറിപ്പായ ‘Decoded’ന് നൽകിയ അഭിമുഖത്തിലാണ് ഓൾട്ട്മാൻ നിലപാട് വ്യക്തമാക്കിയത്. എഐയുടെ ഗുണങ്ങൾക്കായി ചില മോശം കാര്യങ്ങൾ സംഭവിക്കുന്നത് ലോകം അംഗീകരിക്കേണ്ടിവരുമെന്നും സാങ്കേതികവിദ്യയിലൂടെ ആളുകൾക്ക് ലഭിക്കുന്ന സ്വാതന്ത്ര്യവും നിയന്ത്രണശേഷിയും പ്രധാനമാണെന്നും അദ്ദേഹം പറഞ്ഞു.

എഐയുടെ ഉപയോഗത്തിലൂടെ വലിയ ഹാക്കുകൾ, ദുരുപയോഗം, തട്ടിപ്പുകൾ തുടങ്ങിയവ പൂർണമായും ഇല്ലാതാക്കാമെന്ന് ഉറപ്പുനൽകാൻ കഴിയില്ലെന്നും ഓൾട്ട്മാൻ വ്യക്തമാക്കി. എന്നാൽ ഇത്തരം ദോഷങ്ങളെക്കാൾ എഐയിലൂടെ ഉണ്ടാകുന്ന ഗുണങ്ങൾ വളരെ വലുതായിരിക്കുമെന്നാണ് അദ്ദേഹത്തിന്റെ വിലയിരുത്തൽ.

എഐയുടെ നിയന്ത്രണം സംബന്ധിച്ച് ഓപ്പൺഎഐക്കും എതിരാളിയായ ആന്ത്രോപിക്കിനും ഇടയിൽ അഭിപ്രായവ്യത്യാസങ്ങളുണ്ടെന്നും ഓൾട്ട്മാൻ പറഞ്ഞു. അത്യാധുനിക എഐയെ ഒരൊറ്റ കമ്പനിയുടെ നിയന്ത്രണത്തിലാക്കുന്നത് അംഗീകരിക്കാനാകാത്ത സാഹചര്യമാണെന്നാണ് അദ്ദേഹത്തിന്റെ നിലപാട്. എഐ പൊതുജനങ്ങൾക്ക് വ്യാപകമായി ലഭ്യമാകണമെന്നും അദ്ദേഹം അഭിപ്രായപ്പെട്ടു.

അതേസമയം, എല്ലാ അപകടസാധ്യതകളും അംഗീകരിക്കണമെന്ന നിലപാടല്ല തന്റേതെന്നും ഓൾട്ട്മാൻ വ്യക്തമാക്കി. മനുഷ്യർക്ക് എഐയുടെ നിയന്ത്രണം നഷ്ടപ്പെടുന്നതു പോലുള്ള അതീവ ഗുരുതരമായ അപകടസാധ്യതകൾ അംഗീകരിക്കാനാകില്ലെന്നും അദ്ദേഹം പറഞ്ഞു. മനസ്സിലാക്കാൻ കഴിയുന്ന, നിയന്ത്രിതമായ ചില അപകടസാധ്യതകൾ എഐയുടെ നേട്ടങ്ങൾക്കും മനുഷ്യരുടെ സ്വാതന്ത്ര്യത്തിനും പകരമായി സ്വീകരിക്കാമെന്നാണ് അദ്ദേഹത്തിന്റെ നിലപാട്.

എഐയുടെ വേഗത്തിലുള്ള വികസനത്തിനൊപ്പം അതിന്റെ സുരക്ഷയെക്കുറിച്ചുള്ള ചർച്ചകളും ശക്തമായിക്കൊണ്ടിരിക്കുന്ന സാഹചര്യത്തിലാണ് ഓൾട്ട്മാന്റെ പുതിയ പരാമർശം. അടുത്തിടെ ഐ സിസ്റ്റങ്ങളുടെ ദുരുപയോഗവും നിയന്ത്രണവുമായി ബന്ധപ്പെട്ട ആശങ്കകൾ സാങ്കേതികവിദ്യാ രംഗത്ത് ചർച്ചയായിട്ടുണ്ട്.

എഐയുടെ അപകടസാധ്യതകളെക്കുറിച്ച് ഓപ്പൺഎഐയുടെ നിലപാടിൽ സുരക്ഷയ്ക്ക് പ്രാധാന്യമുണ്ടെന്ന് വ്യക്തമാക്കുന്ന മുൻ പ്രസ്താവനകളും പുറത്തുവന്നിട്ടുണ്ട്. സെപ്റ്റംബറിൽ യുഎൻ സുരക്ഷാ കൗൺസിലിൽ സംസാരിച്ച ഓൾട്ട്മാൻ, ശക്തമായ എഐ സംവിധാനങ്ങൾ മനുഷ്യ നിയന്ത്രണത്തിൽ തുടരേണ്ടതിന്റെ ആവശ്യകതയും അന്താരാഷ്ട്രതലത്തിലുള്ള എഐ സുരക്ഷാ സഹകരണത്തിന്റെ പ്രാധാന്യവും ചൂണ്ടിക്കാട്ടിയിരുന്നു.