വാഷിംഗ്ടണ്: ഇന്ത്യയുമായി വ്യാപാര കരാര് ഉടന് ഉണ്ടാകുമെന്ന് വ്യക്തമാക്കി അമേരിക്കന് പ്രസിഡന്റ് ഡൊണാള്ഡ് ട്രംപ്. ഇന്ത്യയുമായി വലിയ ഒരു കരാറില് ഏര്പ്പെടുമെന്ന സൂചനയാണ് ട്രംപ് നല്കിയത്. ചൈനയുമായുള്ള വ്യാപാര കരാര് ഒപ്പിട്ടുവെന്നും അദ്ദേഹം അറിയിച്ചു. ബിഗ് ബ്യൂട്ടിഫുള് ബില് പരിപാടിയില് സംസാരിക്കവെയാണ് ട്രംപ് ഇക്കാര്യം പറഞ്ഞത്.
‘എല്ലാവരും ഒരു കരാര് ഉണ്ടാക്കാനും അതില് പങ്കാളികളാകാനുമാണ് ആഗ്രഹിക്കുന്നത്. ഇന്നലെയാണ് ഞങ്ങള് ചൈനയുമായി കരാര് ഒപ്പുവെച്ചത്. ഞങ്ങള്ക്ക് വേറെയും ചില മികച്ച കരാറുകള് ഉണ്ട്. വരാനിരിക്കുന്നത് ഒരുപക്ഷേ ഇന്ത്യയുമായായിരിക്കും. വളരെ വലിയ ഒന്നായിരിക്കുമത്,” ട്രംപ് പറഞ്ഞു. യുഎസും ഇന്ത്യയും തമ്മിലുള്ള കരാറുമായി ബന്ധപ്പെട്ടുള്ള ചര്ച്ചകള് പുരോഗമിക്കുകയാണ്.
