വേനൽച്ചൂടിൽ നിന്ന് തൊഴിലാളികൾക്ക് സംരക്ഷണം നൽകാൻ കർശന നടപടികളുമായി കുവൈത്ത്

കുവൈത്ത് സിറ്റി: കഠിനമായ വേനൽച്ചൂടിൽ നിന്ന് തൊഴിലാളികൾക്ക് സംരക്ഷണം നൽകാൻ കർശന നടപടികളുമായി കുവൈത്ത് ആഭ്യന്തര മന്ത്രാലയം. ജൂൺ ഒന്നു മുതൽ ആഗസ്റ്റ് 31 വരെയുള്ള മൂന്ന് മാസങ്ങളിൽ ഉച്ചയ്ക്ക് 11:00 മണി മുതൽ വൈകുന്നേരം 4:00 മണി വരെ തുറസ്സായ സ്ഥലങ്ങളിലെ ജോലി പബ്ലിക് അതോറിറ്റി ഫോർ മാൻപവർ പൂർണമായും നിരോധിച്ചു.

ഇതിന്റെ ഭാഗമായി ഈ സമയങ്ങളിൽ ഡെലിവറി കമ്പനികളുടെ മോട്ടോർ സൈക്കിളുകൾ നിരത്തിലിറക്കുന്നതിനും കർശന വിലക്കുണ്ട്. രാജ്യത്തെ എല്ലാ റോഡുകളിലും പ്രദേശങ്ങളിലും ഈ നിയമം ബാധകമായിരിക്കും. നിയമം ലംഘിക്കുന്ന കമ്പനികൾക്കെതിരെ പെർമിറ്റ് റദ്ദാക്കൽ ഉൾപ്പെടെയുള്ള കടുത്ത നിയമനടപടികൾ സ്വീകരിക്കുമെന്ന് ട്രാഫിക് ആൻഡ് ഓപ്പറേഷൻസ് വിഭാഗം മുന്നറിയിപ്പ് നൽകി.

തൊഴിലാളികളുടെ ആരോഗ്യവും സുരക്ഷയും മുൻനിർത്തി നടപ്പാക്കുന്ന ഈ തീരുമാനത്തോട് സ്ഥാപനങ്ങളും തൊഴിലുടമകളും പൂർണമായി സഹകരിക്കണമെന്ന് മന്ത്രാലയം ആവശ്യപ്പെട്ടു. കടുത്ത വേനലിൽ ഇരുചക്ര വാഹനങ്ങൾ ഓടിക്കുന്ന ഡെലിവറി തൊഴിലാളികളുടെ സുരക്ഷ ഉറപ്പാക്കുകയാണ് ഈ പ്രത്യേക നിരോധനത്തിന്റെ പ്രധാന ലക്ഷ്യം. നിയമലംഘനങ്ങൾ കണ്ടെത്താൻ രാജ്യത്തുടനീളം കർശന പരിശോധനകൾ ഉണ്ടാകും. സുസ്ഥിരവും മാനുഷികവുമായ ഒരു തൊഴിൽ സംസ്‌കാരം വളർത്തിയെടുക്കുന്നതിന്റെ ഭാഗമായാണ് ഈ നടപടിയെന്നും, നിയമങ്ങൾ പാലിക്കാത്തവരോട് യാതൊരു വിട്ടുവീഴ്ചയും ഉണ്ടാകില്ലെന്നും അധികൃതർ ബിസിനസ് സ്ഥാപനങ്ങളെ ഓർമിപ്പിച്ചു.