ക്രൈസ്തവ പീഡനവും എഫ്.സി.ആർ.എ. ഭേദഗതിയും: ആശങ്കയുമായി ഫിയാക്കൊനാ; ഡോ. ബാബു വർഗീസിനും സിജു തോമസിനും മതസ്വാതന്ത്ര്യ പ്രവർത്തനങ്ങൾക്കുള്ള പുരസ്കാരം

ആഷ്ബൺ (വിർജീനിയ): ഇന്ത്യയിൽ ക്രൈസ്തവർക്കെതിരേ വർധിച്ചുവരുന്ന അക്രമങ്ങൾ, പാസ്റ്റർമാർക്കും വിശ്വാസികൾക്കും നേരെയുള്ള ആക്രമണങ്ങളും ഭീഷണികളും, മതപരിവർത്തന നിരോധന നിയമങ്ങളുടെ ദുരുപയോഗം, വിദേശ സംഭാവന നിയന്ത്രണ നിയമത്തിൽ (എഫ്.സി.ആർ.എ.) നിർദേശിച്ചിരിക്കുന്ന ഭേദഗതികൾ എന്നിവയിൽ ഫിയാക്കൊനാ മതസ്വാതന്ത്ര്യ ദേശീയ സമ്മേളനം 2026 ഗൗരവമായ ആശങ്ക രേഖപ്പെടുത്തി.
വടക്കേ അമേരിക്കയിലെ ഇന്ത്യൻ ക്രൈസ്തവ സഭകളെയും സംഘടനകളെയും ഒരുമിപ്പിച്ച് മതസ്വാതന്ത്ര്യത്തിനും മനുഷ്യാവകാശങ്ങൾക്കും വേണ്ടി പ്രവർത്തിക്കുന്ന ഫെഡറേഷൻ ഓഫ് ഇന്ത്യൻ അമേരിക്കൻ ക്രിസ്ത്യൻ ഓർഗനൈസേഷൻസ് ഓഫ് നോർത്ത് അമേരിക്ക (ഫിയാക്കൊനാ) സംഘടിപ്പിച്ച സമ്മേളനം ഓഗസ്റ്റ് എട്ടിന് വിർജീനിയയിലെ ആഷ്ബേണിലാണ് നടന്നത്.

സഭാ നേതാക്കൾ, പാസ്റ്റർമാർ, മതസ്വാതന്ത്ര്യ പ്രവർത്തകർ, നിയമവിദഗ്ധർ, സാമൂഹിക-രാഷ്ട്രീയ രംഗത്തെ പ്രതിനിധികൾ, വിവിധ സംഘടനാ നേതാക്കൾ എന്നിവർ സമ്മേളനത്തിൽ പങ്കെടുത്തു.
ഇന്ത്യയുടെ വിവിധ ഭാഗങ്ങളിൽ ക്രൈസ്തവ സമൂഹം നേരിടുന്ന വെല്ലുവിളികൾ സമ്മേളനം വിശദമായി ചർച്ച ചെയ്തു. പാസ്റ്റർമാർക്കും വിശ്വാസികൾക്കും നേരെയുള്ള അക്രമങ്ങൾ, പ്രാർഥനായോഗങ്ങളും ആരാധനകളും തടസ്സപ്പെടുത്തൽ, വിശ്വാസികളെ ഭീഷണിപ്പെടുത്തൽ, മതപരിവർത്തന നിരോധന നിയമങ്ങൾ ഉപയോഗിച്ച് പാസ്റ്റർമാർക്കും വിശ്വാസികൾക്കുമെതിരേ കേസെടുക്കുന്നതായുള്ള പരാതികൾ എന്നിവയിൽ സമ്മേളനം ഉത്കണ്ഠ രേഖപ്പെടുത്തി.
ക്രൈസ്തവർക്കെതിരേ വർധിച്ചുവരുന്ന അക്രമങ്ങളും ഭീഷണികളും വിവേചനപരമായ സമീപനങ്ങളും രാജ്യത്തെ മതസ്വാതന്ത്ര്യത്തിന് ഗുരുതരമായ വെല്ലുവിളിയാണെന്ന് സമ്മേളനം വിലയിരുത്തി. മതഭേദമില്ലാതെ ഓരോ ഇന്ത്യൻ പൗരനും ഭയവും ഭീഷണിയുമില്ലാതെ സ്വന്തം വിശ്വാസം സ്വീകരിക്കാനും ആചരിക്കാനും പ്രചരിപ്പിക്കാനുമുള്ള ഭരണഘടനാപരമായ അവകാശം സംരക്ഷിക്കപ്പെടണമെന്ന് ഫിയാക്കൊനാ ആവശ്യപ്പെട്ടു.

എഫ്.സി.ആർ.എ. ഭേദഗതി: ക്രൈസ്തവ സഭകളുടെ ആശങ്ക പരിഹരിക്കണമെന്ന് ഫിയാക്കൊനാ

കേന്ദ്രസർക്കാർ മുന്നോട്ടുവച്ച ഫോറിൻ കോൺട്രിബ്യൂഷൻ (റെഗുലേഷൻ) ഭേദഗതി ബിൽ 2026 ക്രൈസ്തവ സഭകളുടെയും സന്നദ്ധ-ജീവകാരുണ്യ സംഘടനകളുടെയും പ്രവർത്തനങ്ങളെ പ്രതികൂലമായി ബാധിക്കാനിടയുള്ള വ്യവസ്ഥകൾ ഉൾക്കൊള്ളുന്നതായി സമ്മേളനം ആശങ്ക രേഖപ്പെടുത്തി.
എഫ്.സി.ആർ.എ. രജിസ്ട്രേഷൻ റദ്ദാകുകയോ പുതുക്കപ്പെടാതിരിക്കുകയോ ചെയ്യുന്ന സാഹചര്യങ്ങളിൽ വിദേശ സംഭാവന ഉപയോഗിച്ച് സമ്പാദിച്ച സ്വത്തുക്കളുടെയും മറ്റ് ആസ്തികളുടെയും നിയന്ത്രണം സർക്കാർ നിയോഗിക്കുന്ന പ്രത്യേക സംവിധാനത്തിന്റെ കീഴിലാക്കാൻ വഴിയൊരുക്കുന്ന നിർദേശങ്ങൾ സമ്മേളനം പ്രത്യേകം ചർച്ച ചെയ്തു. സഭകളുടെയും ക്രൈസ്തവ സ്ഥാപനങ്ങളുടെയും ഉടമസ്ഥതയിലുള്ള സ്വത്തുക്കളെയും ആരാധനാലയങ്ങളെയും ബാധിക്കാനിടയുള്ള ഇത്തരം വ്യവസ്ഥകൾ ക്രൈസ്തവ സമൂഹത്തിൽ ഗൗരവമായ ആശങ്ക സൃഷ്ടിക്കുന്നതായി പ്രതിനിധികൾ ചൂണ്ടിക്കാട്ടി.
പതിറ്റാണ്ടുകളായി വിശ്വാസികളുടെ സംഭാവനകളിലൂടെയും നിയമാനുസൃതമായി ലഭിച്ച വിദേശസഹായത്തിലൂടെയും രൂപപ്പെട്ട സഭകളുടെയും വിദ്യാഭ്യാസ, ജീവകാരുണ്യ, സാമൂഹിക സേവന സ്ഥാപനങ്ങളുടെയും സ്വത്തുക്കളുടെ മേൽ സർക്കാർ നിയന്ത്രണം വരാനുള്ള സാഹചര്യം ഉണ്ടാകരുതെന്ന് ഫിയാക്കൊനാ ആവശ്യപ്പെട്ടു. എഫ്.സി.ആർ.എ. രജിസ്ട്രേഷനുമായി ബന്ധപ്പെട്ട ഭരണപരമായ നടപടികളുടെ പേരിൽ ഒരു സഭയുടെയോ സ്ഥാപനത്തിന്റെയോ സ്വത്തവകാശവും മതപരമായ പ്രവർത്തനങ്ങളും അപകടത്തിലാകുന്ന സാഹചര്യം ഒഴിവാക്കണമെന്നും സമ്മേളനം അഭിപ്രായപ്പെട്ടു.
ഭേദഗതി നിർദേശങ്ങളിലെ സ്വത്തുക്കളുടെ നിയന്ത്രണം, അവ കൈകാര്യം ചെയ്യുന്നതിനായി പ്രത്യേക അധികാര സംവിധാനങ്ങൾ രൂപീകരിക്കൽ, ആരാധനാലയങ്ങളെയും മതസ്ഥാപനങ്ങളെയും ബാധിക്കാവുന്ന വ്യവസ്ഥകൾ എന്നിവ പുനഃപരിശോധിക്കണമെന്ന് ഫിയാക്കൊനാ ആവശ്യപ്പെട്ടു. ക്രൈസ്തവ സഭകളും മതന്യൂനപക്ഷ സ്ഥാപനങ്ങളും ഉയർത്തുന്ന ആശങ്കകൾ കേൾക്കുകയും അവ പരിഹരിക്കുന്നതിനാവശ്യമായ മാറ്റങ്ങൾ ബില്ലിൽ വരുത്തുകയും വേണം. മതസ്വാതന്ത്ര്യത്തെയും സഭകളുടെ സ്വതന്ത്രമായ പ്രവർത്തനത്തെയും സ്വത്തവകാശത്തെയും ബാധിക്കാനിടയുള്ള വ്യവസ്ഥകൾ പിൻവലിക്കുകയോ ആവശ്യമായ സംരക്ഷണ വ്യവസ്ഥകൾ ഉൾപ്പെടുത്തി തിരുത്തുകയോ ചെയ്യണമെന്നും സമ്മേളനം ആവശ്യപ്പെട്ടു.
വിദേശ സംഭാവനകളുടെ വിനിയോഗത്തിൽ സുതാര്യതയും സാമ്പത്തിക ഉത്തരവാദിത്വവും ഉറപ്പാക്കേണ്ടതിന്റെ ആവശ്യകത ഫിയാക്കൊനാ അംഗീകരിക്കുന്നു. എന്നാൽ അതിന്റെ പേരിൽ നിയമാനുസൃതമായി പ്രവർത്തിക്കുന്ന സഭകൾക്കും ക്രൈസ്തവ വിദ്യാഭ്യാസ-ജീവകാരുണ്യ സ്ഥാപനങ്ങൾക്കും അനാവശ്യമായ നിയന്ത്രണങ്ങളോ പ്രതിസന്ധികളോ ഉണ്ടാകരുത്. നിയമം നടപ്പാക്കുന്നതിൽ നീതിപൂർവമായ നടപടിക്രമവും സമയബന്ധിതമായ തീരുമാനങ്ങളും ഫലപ്രദമായ അപ്പീൽ സംവിധാനവും ഉറപ്പാക്കണമെന്നും മതത്തിന്റെ പേരിലുള്ള വിവേചനത്തിനോ ഏകപക്ഷീയ നടപടികൾക്കോ അവസരമുണ്ടാകരുതെന്നും സമ്മേളനം ആവശ്യപ്പെട്ടു.
എഫ്.സി.ആർ.എ. ഭേദഗതിയുമായി ബന്ധപ്പെട്ട് ഇന്ത്യൻ ക്രൈസ്തവ സമൂഹം ഉയർത്തുന്ന ആശങ്കകൾ ബന്ധപ്പെട്ട അധികാരികളുടെയും നയരൂപീകരണ കേന്ദ്രങ്ങളുടെയും ശ്രദ്ധയിൽ കൊണ്ടുവരാനും, സഭകളുടെ മതസ്വാതന്ത്ര്യവും സ്വത്തവകാശവും നിയമാനുസൃതമായ മത-ജീവകാരുണ്യ പ്രവർത്തനങ്ങളും സംരക്ഷിക്കപ്പെടുന്നതിനാവശ്യമായ മാറ്റങ്ങൾക്കായി തുടർന്നും ഇടപെടാനും ഫിയാക്കൊനാ തീരുമാനിച്ചു.

ഡോ. ബാബു വർഗീസിനും സിജു തോമസിനും മതസ്വാതന്ത്ര്യ പ്രവർത്തനങ്ങൾക്കുള്ള പുരസ്കാരം

സമ്മേളനത്തോടനുബന്ധിച്ച് മതസ്വാതന്ത്ര്യത്തിനും പീഡനം നേരിടുന്ന ക്രൈസ്തവർക്കുവേണ്ടിയുള്ള പ്രവർത്തനങ്ങൾക്കും നൽകിയ സംഭാവനകൾ പരിഗണിച്ച് ഡോ. ബാബു വർഗീസിനും എ.ഡി.എഫ്. ഇന്ത്യ ദേശീയ ഡയറക്ടർ സിജു തോമസിനും ഫിയാക്കൊനാ മതസ്വാതന്ത്ര്യ ചാമ്പ്യൻ പുരസ്കാരം 2026 സമ്മാനിച്ചു.
മുംബൈയിൽ നിന്നുള്ള പത്രപ്രവർത്തകനും ചരിത്രകാരനും ഭാഷാപണ്ഡിതനും എഴുത്തുകാരനും ബൈബിൾ അധ്യാപകനുമായ ഡോ. ബാബു വർഗീസിനെ, മൂന്നു പതിറ്റാണ്ടിലേറെയായി ക്രൈസ്തവ പീഡനവും മതസ്വാതന്ത്ര്യവുമായി ബന്ധപ്പെട്ട വിഷയങ്ങളിൽ നടത്തുന്ന പ്രവർത്തനങ്ങൾ പരിഗണിച്ചാണ് ആദരിച്ചത്. ലെറ്റ് ദേർ ബി ഇന്ത്യ, ബേൺറ്റ് എലൈവ് എന്നിവ അദ്ദേഹത്തിന്റെ ശ്രദ്ധേയ കൃതികളാണ്. അദ്ദേഹത്തിന്റെ രചനകളെ ആസ്പദമാക്കി നാല് ചലച്ചിത്രങ്ങൾ നിർമ്മിച്ചിട്ടുണ്ട്. ഏറ്റവും പുതിയ ചലച്ചിത്രമായ ഗവാഹ് ഓഗസ്റ്റ് 29-ന് ന്യൂയോർക്കിൽ ലോക പ്രീമിയർ നടത്തും.
സിജു തോമസിനെ മതസ്വാതന്ത്ര്യ സംരക്ഷണത്തിനും പീഡനം നേരിടുന്ന ക്രൈസ്തവർക്കുവേണ്ടിയുള്ള നിയമപോരാട്ടങ്ങളിലെ നേതൃത്വത്തിനുമാണ് ആദരിച്ചത്. സമ്മേളനത്തിൽ അവതരിപ്പിച്ച വിവരങ്ങൾ പ്രകാരം, അദ്ദേഹത്തിന്റെ നേതൃത്വത്തിൽ എ.ഡി.എഫ്. ഇന്ത്യ 200-ലധികം കേസുകളിൽ അനുകൂല കോടതി വിധികൾ നേടുകയും, ഏകദേശം 3,400 ക്രൈസ്തവരുടെ മോചനത്തിന് സഹായിക്കുകയും, 1,100-ലധികം ആരാധനാലയങ്ങൾ വീണ്ടും തുറക്കാൻ ഇടപെടുകയും ചെയ്തിട്ടുണ്ട്. ഒരു ലക്ഷത്തിലധികം വിശ്വാസികൾക്കും പാസ്റ്റർമാർക്കും സഭാ നേതാക്കൾക്കും അഭിഭാഷകർക്കും പരിശീലനം നൽകിയതായും സമ്മേളനത്തിൽ അറിയിച്ചു.
അസോസിയേഷൻ ഓഫ് ക്രിസ്ത്യൻ സ്കൂൾസ് ഇന്റർനാഷണൽ വൈസ് പ്രസിഡന്റ് മൈക്ക് എപ്പ്, ട്രാക്ട് ലീഗ് ഡയറക്ടർ ഫിൽ ബോണ്ടെസ്മ എന്നിവർ പുരസ്കാരങ്ങൾ സമ്മാനിച്ചു.
കാലിഫോർണിയ, മിഷിഗൺ, ഒക്ലഹോമ, കൊളറാഡോ, വാഷിംഗ്ടൺ ഡി.സി., വിർജീനിയ, പെൻസിൽവേനിയ, ഇല്ലിനോയിസ്, ഫ്ലോറിഡ എന്നിവിടങ്ങളിൽനിന്നായി പ്രതിനിധികൾ സമ്മേളനത്തിൽ പങ്കെടുത്തു. ഇന്ത്യയിൽനിന്നും ബ്രിട്ടനിൽനിന്നുമുള്ള പ്രതിനിധികളുടെ സാന്നിധ്യം സമ്മേളനത്തിന് അന്താരാഷ്ട്ര സ്വഭാവം നൽകി.
വിർജീനിയ പത്താം കോൺഗ്രസ് മണ്ഡലത്തിലെ റിപ്പബ്ലിക്കൻ സ്ഥാനാർഥി ഡേവ് ബെക്വിത്ത്, വിർജീനിയയിലെ റിപ്പബ്ലിക്കൻ നേതാവ് മൈക്ക് ക്ലാൻസി, സിജു തോമസ്, ഡോ. കെ. ബാബു വർഗീസ്, റവ. മനോ ഡാനിയേൽ തുടങ്ങിയവർ മുഖ്യ പ്രാസംഗികരായിരുന്നു..
ഫിയാക്കൊനാ പ്രസിഡന്റ് ബിമൽ ജോൺ, സാം തോമസ്, പാസ്റ്റർ റൂഫസ് ബിമനപ്പള്ളിൽ, സ്റ്റാൻലി ജോർജ്, നിക്സൺ ജോർജ്, പാസ്റ്റർ മാർക്ക് ഹാവോകിപ്, വിജയേന്ദർ ഡോമ എന്നിവരുൾപ്പെടെയുള്ള സംഘടനാ ഭാരവാഹികൾ സമ്മേളനത്തിന് നേതൃത്വം നൽകി. ബ്രദർ യേശുദാസ് പരിപാടികളുടെ ഏകോപനം നിർവഹിച്ചു.
പ്രാർഥനാ കമ്മിറ്റി ചെയർമാൻ പോൾ വർക്കി പ്രാർഥനയ്ക്ക് നേതൃത്വം നൽകി. ടി.സി.എഫ്. ചർച്ച് ആരാധനയ്ക്ക് നേതൃത്വം നൽകിയപ്പോൾ ഹെവൻലി ഫീസ്റ്റ് ഗായകൻ സാംസൺ ഗാനശുശ്രൂഷ നടത്തി. ഇന്ത്യയിൽ പീഡനം നേരിടുന്ന ക്രൈസ്തവർക്കായി പ്രത്യേക പ്രാർഥനയും നടന്നു.
ഇന്ത്യയിലെ ക്രൈസ്തവ സഭകളും വിശ്വാസികളും നേരിടുന്ന പ്രശ്നങ്ങൾ ദേശീയ-അന്താരാഷ്ട്ര വേദികളിൽ തുടർന്നും ഉയർത്തിക്കൊണ്ടുവരുമെന്നും മതസ്വാതന്ത്ര്യം, മനുഷ്യാന്തസ്സ്, നിയമത്തിനു മുന്നിലെ തുല്യത, മതഭേദമില്ലാതെ എല്ലാ പൗരന്മാരുടെയും ഭരണഘടനാപരമായ അവകാശങ്ങൾ എന്നിവ സംരക്ഷിക്കുന്നതിനായി പ്രവർത്തനം ശക്തമായി തുടരുമെന്നും ഫിയാക്കൊനാ വ്യക്തമാക്കി.