റിയാദ്: സൗദി അറേബ്യയുടെ സാമ്പത്തിക വിപണിയിലെ പണലഭ്യതയിൽ റെക്കോർഡ് വളർച്ച. 2026 ഫെബ്രുവരി അവസാനത്തെ കണക്കുകൾ പ്രകാരം രാജ്യത്തെ ആഭ്യന്തര ലിക്വിഡിറ്റിയിൽ 8.4 ശതമാനത്തിന്റെ വർധനവുണ്ടായതായി സൗദി സെൻട്രൽ ബാങ്ക് അറിയിച്ചു. ഇതോടെ ആകെ പണലഭ്യത 3.28 ലക്ഷം കോടി റിയാലിലെത്തി. 2025-ലെ ഇതേ കാലയളവിൽ 3.033 ലക്ഷം കോടി റിയാലായിരുന്ന ലിക്വിഡിറ്റി, ഒരു വർഷത്തിനിടെ 25,570 കോടി റിയാലിലധികമാണ് വർധിച്ചത്.
ആകെ പണലഭ്യതയുടെ 45.2 ശതമാനവും ഡിമാൻഡ് ഡെപ്പോസിറ്റുകളാണ്. 1.488 ലക്ഷം കോടി റിയാലാണിത്. ഉപഭോക്താക്കൾക്ക് എപ്പോൾ വേണമെങ്കിലും പിൻവലിക്കാൻ കഴിയുന്ന ഈ നിക്ഷേപങ്ങളാണ് പണലഭ്യതയിൽ മുൻപന്തിയിലുള്ളത്. ടൈം ആന്റ് സേവിങ്സ് നിക്ഷേപങ്ങൾ 16,710 കോടി റിയാൽ വർധിച്ച് 1.198 ലക്ഷം കോടി റിയാലിലെത്തി. വിദേശ കറൻസികളിലെ നിക്ഷേപങ്ങളും റെപ്പോ ട്രാൻസാക്ഷനുകളും ഉൾപ്പെടുന്ന ക്വാസി-മോണിറ്ററി ഡിപ്പോസിറ്റുകളിലും കാര്യമായ വർധനവുണ്ടായി.
